Муҳтарам Президентимизнинг «Рамазон – саховат, бирдамлик ва бағрикенглик ойи» ғояси асосида саховат тадбирлари пойтахтимизда давом этяпти.
Рамазоннинг 24-куни (24 март) Тошкент шаҳар бош имом-хатиби Абдуқаҳҳор домла Юнусов бошчиликларида пойтахтимиздаги «Шайх Зайниддин» жоме масжидида сайёр йиғилиш ўтказилди.
Тошкент шаҳар бош имом-хатиби «Кўкча» маҳалласига ташриф буюриб, маҳалла фаоллари билан у ердаги 5 та якка-ёлғиз яшаётган, ногирон парваришланаётган хонадонга қувонч улашилиб, эҳсонлар тарқатдилар.
Фарғона вилоятида «Вақф» хайрия жамоат фондининг вилоят филиали томонидан икки юзга яқин эҳтиёжманд оилалар учун хайрия тадбирлари ташкил этилди. Бу жараёнда кам таъминланган оилаларга кўмир, иссиқ кийим-кечак, пойабзал, электр иситгичлар, озиқ-овқат маҳсулотлари ва уй-рўзғор учун маиший техникалар тақдим этилди. Шунингдек, ҳомийларимиз томонидан боқувчиси йўқ оилаларда вояга етаётган болажонларга тўкин дастурхон ёзилиб, кабобхўрлик ташкил этилди.
Қиш мавсумида янги полиз маҳсулотлари ва сархил мевалар, иссиқ кийимлар, айниқса совуқ кунларда асқатадиган кўмир билан эҳтиёжманд оилаларга илиқлик улашган, уларни хурсанд қилган барча ҳомийлардан, саховатпеша фуқароларимиздан Аллоҳ рози бўлсин.
Хайрия тадбирларининг юқори ташкилотчилик ва меҳр-мурувват билан ўтказилишига ўз ҳиссасини қўшган барча иштирокчилар, кўнгиллиларни Ўзи улкан ажр-савоблар билан мукофотласин!
Vaqf.uz