Сўнгги юз йилда эмлаш туфайли кўплаб хасталикларнинг зиёнини кескин камайтириш имкони туғилди. 1969 йили қизамиққа қарши илк вакцина юзага келгунича қизамиқ дунё бўйлаб ҳар йили 2 миллион б00 минг инсонни ёстиғини қуритган.

Жаҳон соғлиқни сақлаш ташкилотининг маълумотларига кўра, 2000 йилдан 2017 йилгача дунё бўйлаб қизамиқдан ўлимлар сони 80 фоизга камайган.

Атиги бир неча ўн йил олдин миллионлаб инсонлар полиомиелит қурбонига айланган. Уни юқтирганлар ё ҳалок бўлган ёки бир умр фалаж бўлиб қолган. Бугунги кунда бу хасталик деярли йўқ бўлган. Агар жамиятдаги аҳолининг катта қисми касалликка қарши эмланган бўлса, бутун жамият, шу жумладан эмланмаганлар ҳам ушбу касалликдан ҳимояланади. 

Фарғона шаҳрида Дин ишлари бўйича қўмита, Ўзбекистон мусулмонлари идораси, Санепидқўмита ва УНИСEФ ҳамкорлигида “Эмлаш: илмий ва диний асослар” мавзусида дин етакчилари иштирокида ташкил этилган семинар-тренинг айни шу мавзуга бағишланди. 

Тадбирнинг асосий мақсади — аҳоли саломатлигини муҳофаза қилишда эмлашнинг аҳамиятини илмий ва диний манбалардаги асослар орқали тушунтириш, шунингдек имом-хатиблар ва отинойилар билан биргаликда соғлом турмуш тарзини тарғиб қилиш ишларини кучайтиришдан иборат экани қайд этилди.

Тадбирда эмлашнинг моҳияти ва организмни ҳимоя қилишдаги ўрни, миллий эмлаш дастурининг амалий натижалари, аҳоли орасида учрайдиган савол ва муаммолар, илмий асосланган диний нуқтаи назарлар бўйича иштирокчиларга батафсил маълумот берилди.

Шунингдек, имом-хатиб ва отинойилар билан очиқ мулоқот ўтказилиб, жойлардаги эмлаш бўйича вазият, аҳолидаги саволлар, таклифлар ва мавжуд муаммолар муҳокама қилинди.

Семинар якунида иштирокчилар ҳамкорликни янада мустаҳкамлаш, аҳолига эмлаш тўғрисида тўғри ва ишончли маълумот етказиш ҳамда соҳа мутахассислари билан доимий мулоқотда иш юритиш бўйича келишиб олдилар.

Ўзбекистон мусулмонлари идораси

Фарғона вилояти вакиллиги Матбуот хизмати