13 Сентябр, 2025, 21 Рабиъул аввал, 1447
13 Сентябр, 2025, 21 Рабиъул аввал, 1447
#xabar #muftiy
Бугун, 11 сентябрь куни Бишкек шаҳрида Туркий давлатлар муфтийлари кенгашининг VI йиғилиши ўтказилди.
Унда Ўзбекистон мусулмонлари идораси раиси, муфтий Шайх Нуриддин Холиқназар ҳазратлари, Туркия диёнат ишлари бошқармаси раиси, доктор Али Эрбош, Кавказ мусулмонлари идораси раиси, шайхулислом Оллоҳшукур Пошозода, Қозоғистон мусулмонлари диний идораси раиси, бош муфтий Наврўзбой ҳожи Тағанули ва Қирғизистон мусулмонлари диний идораси раиси, муфтий Абдулазиз қори Зокиров қатнашди.
Нутқ қилган муфтийлар Туркий давлатлар диний идоралари ўртасидаги ҳамкорлик жадал ривожланаётганидан мамнун эканини изҳор этиб, ушбу анъанавий анжуман аҳиллик, иноқлик, дўстлик, бирдамлик, таҳликали замонда тинчлик-осойишталик ва тотувликни таъминлашга ҳисса қўшишдек муштарак мақсадларга хизмат қилаётганини эътироф этишди. Бундай эзгу ишлар ва уммат бирлигига Қуръони карим ва ҳадиси шарифларда ҳам чорланганини далиллар билан келтиришди.
Глобал муаммоларга биргаликда ечим топиш ва Ислом дини софлигини асраш борасидаги имкониятларни бирлаштириш бугунги кунда жуда ҳам муҳимлигини таъкидладилар. Фитналар, бузғунчи ғоялар ва ахборот хуружлари авж олган бир пайтда ғоявий таҳдидлар қаршисида Туркий дунё халқлари бирдамликда муаммоларни бартараф этишга янада жидду жаҳд қилиш кераклигини айтиб ўтишди.
Йиғилишда мазкур тузилма ҳузуридаги Фатво ҳайъати томонидан атрофлича муҳокама қилиниб, Кенгашга кўриб чиқиш ва имзоланиш учун тақдим этилган оила, никоҳ, инсон органларини кўчириш, ҳаж ва умра, айрим озиқ-овқат маҳсулотлари истеъмоли борасидаги бешта муҳим фатво имзоланди. Ушбу фатволарнинг мазмун-моҳиятини келгусида батафсил ёритиш режалаштирилди.
Кенгаш доирасида жамоавий фатволар чиқарилиши муҳим тарихий қадам бўлиб, туркий мамлакатлардаги диний-маърифий ишлар ва фиқҳий масалаларни ҳал этишда якдиллик ва ҳамкорликни таъминлайди.
Туркий давлатлар муфтийлари ҳозирги кунда долзарб бўлиб турган Исломда уммат бирлиги номли Баёнот ҳамда иқлим ўзгаришининг олдини олиш, атроф-муҳитни муҳофаза қилиш ва экологик муаммоларни ҳал қилиш тўғрисидаги Мурожаатни ҳам қабул қилишди.
Йиғилишда Туркий давлатлар муфтийлари Ўзбекистон мусулмонлари идораси раиси, муфтий Шайх Нуриддин Холиқназар ҳазратларини муҳтарам Президентимизнинг фармонларига кўра “Олий Даражали Имом Бухорий” ордени билан мукофотланганлари муносабати ила самимий қутладилар. Ўз навбатида Муфтий ҳазратлари қардош давлатлар диний идоралари раҳбарларига ташаккур айтдилар.
Шундан сўнг Кенгаш йиғилиши Ўзбекистон мусулмонлари идораси раиси, муфтий Шайх Нуриддин Холиқназар ҳазратларининг дунё мусулмонларига тинчлик-офият сўраш, туркий халқлар бирдамлиги янада мустаҳкам бўлиши ҳақидаги хайрли дуолари билан якунланди.
Ўзбекистон мусулмонлари идораси Матбуот хизмати
Бисмиллаҳир Роҳманир Роҳийм
Ашажж ибн Абдулқайс розияллоҳу анҳу Набий алайҳиссаломнинг олдиларида ўтирганида, у зот соллаллоҳу алайҳи васаллам: “Сенда Аллоҳ ва Расули хуш кўрадиган икки хислат бор”, дедилар. Саҳобий қизиқиб: “У қандай хислат? Бири доим рўзадор бўлиш ва иккинчиси ухламай туни билан ибодат қилиб чиқишми?” – деди.
“Йўқ, униси ҳам, буниси ҳам эмас”, дедилар Набий алайҳиссалом. Ашажж розияллоҳу анҳу: “Ё Аллоҳнинг Расули, улар қайси хислатлар?” – деди такрор. Расулуллоҳ соллаллоҳу алайҳи васаллам жавоб бериб: “Ҳалимлик ва босиқлик”[1], дедилар.
Расулуллоҳ соллаллоҳу алайҳи васаллам бошқа бир ҳадисларида: “Одам гўзал хулқи билан кундузи рўза тутиб, тунни ибодат билан ўтказадиганларнинг даражасига етади” [2], дедилар.
Хулқи гўзал одам икки дунё саодатига эришади. Одамларнинг қалбларини маҳв этиш орқали фойда кўради ва мана шунинг натижасида охиратни ҳам қўлга киритади. Расулуллоҳ соллаллоҳу алайҳи васаллам бу хусусда шундай дедилар: “Тарозуда гўзал хулқдан-да оғирроқ тош босадиган бирор нарса йўқ”[3].
У зот яна бир ҳадисларида: “Мўминларнинг иймонда камолотга эришганлари хулқи энг чиройли бўлганлари, феъли юмшоқ, унинг бошқалар билан тил топишиши осон бўлади ва бошқалар ҳам у билан осон чиқишиб кетишади. Ҳеч ким билан келишмайдиган ва бошқалар ҳам у билан келиша олмайдиган кишида яхшилик йўқдир”[4], деганлар.
Умму Салама розияллоҳу анҳо онамиз Расулуллоҳ соллаллоҳу алайҳи васаллам билан бирга ўтириб, охиратни эсладилар: “ЁАллоҳнинг Расули, бир хотиннинг дунёда икки турмуш ўртоғи бўлган бўлса, барчалари вафот этишса ва жаннатга киришса, аёл қайси эрига бўлади?” – дедилар.
Пайғамбаримиз алайҳиссалом нима деб жавоб берган бўлишлари мумкин?! “Пулдори ёки илмлироғига бўлади”, дедиларми?! Ё илм ва фазлда юқорироғигами?! Йўқ, у зот соллаллоҳу алайҳи васаллам: “Хулқи гўзалроқ эрига бўлади”, дедилар.
Умму Салама розияллоҳу анҳо ҳайратландилар. Шунда Пайғамбар алайҳиссалом: “Эй Умму Салама, гўзал хулқ дунё ва охират яхшиликларини келтиради” [5], дедилар.
Рўза тутиб, намоз ўқиб, садақалар берадиган, лекин тили билан қўшнисига озор берадиган аёлнинг вафоти хабарини беришганида, Набий алайҳиссалом: “У аёл дўзахда” [6] деганларини юқорида ҳам айтиб ўтдик.
Расулуллоҳ соллаллоҳу алайҳи васалламнинг мана бу дуоларини, албатта, ёдингизда тутинг: “Аллоҳим! Менинг ташқи кўринишимни гўзал қилганингдек, хулқимни ҳам гўзал қил”[7].
Шунингдек, у зот соллаллоҳу алайҳи васалламнинг қуйидаги дуоларини айтиб юришни кундалик одатга айлантиринг: “Аллоҳим! Мени энг гўзал хулқлар сари бошла. Гўзал хулқлар томон етаклайдиган Зот фақат Ўзингсан. Ёмон хулқларни мендан арит. Ёмон хулқларни мендан фақатгина Сен нари қила оласан”[8].
Абдуллоҳ Абдулмуътий, Ҳуда Саъид Баҳлулнинг
“Қулоғим сенда қизим” китобидан Ғиёсиддин Ҳабибуллоҳ, Абдулҳамид Умаралиев таржимаси.
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа 