Joriy yilning yanvar' oyi o'rtalarida baxtsiz hodisa sabab, poytaxtimizning Yunusobod tumani «Bobodehqon» mahallasida joylashgan uchta xonadon alanga ichida qoladi. Olov xonadon egalarining uylari bilan birga, bor-budini, kiyim-kechak va hatto hujjatlarini ham kulga aylantiradi.

Mazkur holatdan xabar topgan Vaqf fondi mutasaddilari tomonidan 29 yanvar' kuni “Obod xonadon” aktsiyasi e'lon qilinib, 18 fevralga qadar zarur bo'lgan 90 million so'm mablag' yig'ildi.
Bugun, Vaqf xayriya jamoat fondi rahbari Yahyo qori Abdurahmonov, «Bobodehqon» mahallasiga tashrif buyurib ushbu xonadon egalarining har biriga 30 million so'mdan jami 90 million so'm xayriya mablag'lari va oziq ovqat-mahsulotlarini topshirdi.

Uyi qayta qurilayotganidan xursand bo'lgan 84 yoshli Abduvali bobo: “Vaqf fondi xodimlari, xayriya qilgan va hissa qo'shgan barcha insonlardan Alloh rozi bo'lib, o'ylagan ezgu niyatlariga etkazsin”, deya duo qildi.


“Qisqa fursatda, mahallamiz aholisi va saxovatpesha vatandoshlarimiz tomonidan, ko'plab moddiy yordamlar, oziq ovqat mahsulotlari hamda qurilish mollari ehson qilindi. Aksariyat kishilar manzillaringizni Vaqf fondi xodimlaridan oldik deb aytishdi. Mahallamiz nomidan fond xodimlari va ehson sohiblariga tashakkurlar izhor etamiz”, dedi, «Bobodehqon» mahalla fuqarolar yig'ini raisi Dilmurod Bekmuhammedov.

Vaqf fondi mazkur aktsiyada ishtirok etgan barcha sahovatpesha vatandoshlarimizga o'z minnatdorligini bildiradi.






Vaqf xayriya jamoat fondi matbuot xizmati
Inson qadri ulug‘lanayotgan Yangi O‘zbekistonda odamlarni hayotdan rozi qilish, har bir odamning huquq va erkinliklarini ta’minlash hamda turli soha vakillariga ehtirom ko‘rsatish muhim vazifa etib belgilangan.
Ayniqsa, yon-atrofimizni obod va ozoda qiladigan kasb egalarini qadrlash — insonparvar jamiyatning asosiy belgisidir.
Shu maqsadda, 30 dekabr kuni O‘zbekiston musulmonlari idorasi tomonidan "Hazrati Imom" majmuasida poytaxtimiz obodligi va ko‘rkamligiga hissa qo‘shib kelayotgan obodonlashtirish xodimlari uchun ehson dasturxoni yozilib, iliq so‘zlar ila hadyalar ulashildi.
Tadbirda O‘zbekiston musulmonlari idorasi raisi, muftiy Shayx Nuriddin Xoliqnazar hazratlari, Toshkent shahar Obodonlashtirish bosh boshqarmasi mas’ullari va 200 nafardan ziyod xodimlar ishtirok etdi.
Muftiy hazratlari o‘z so‘zlarida so‘nggi yillarda yurtimizda Davlatimiz Rahbari tomonidan inson qadrini yuksaltirish yo‘lida ko‘plab xayrli ishlar amalga oshirilayotgani va bu har bir hamyurtimiz hayotida o‘z aksini topayotganini alohida ta’kidlash barobarida mazkur kasb egalarining jamiyat hayotidagi o‘rni beqiyos ekani, ular tufayli yurtimiz obod, ko‘chalarimiz orasta, atrof-muhitimiz pokiza va qalblarimiz ravshan bo‘lishini alohida qayd etdilar.
Shuningdek, Shayx Nuriddin Xoliqnazar hazratlari so‘zlarida ana shunday fidoyi insonlar dinimizda yuksak qadrlanishini ta’kidlab, yo‘ldan ozorni ketkazish ham iymondan sanalishini, Islomda poklikka alohida e’tibor qaratilishi uning iymon bilan bog‘langanidan ham yaqqol ko‘rinishini aytib o‘tdilar. Payg‘ambarimiz sollallohu alayhi vasallamning: “Poklik iymonning yarmidir”, degan hadislarini yodga oldilar.
Muxtasar qilib aytganda, tadbirda jamiyat farovonligi, avvalo, insonga bo‘lgan e’tibor, uning mehnatini qadrlash va munosib rag‘batlantirishdan boshlanishi ta’kidlandi. Poytaxtimiz obodligi yo‘lida sidqidildan xizmat qilayotgan obodonlashtirish xodimlariga ko‘rsatilayotgan bunday ehtirom va g‘amxo‘rlik davlatimizda har bir insonning mehnati va qadri e’zozlanishining yaqqol namunasi ekani qayd etildi.
Tadbir yakunida Muftiy hazratlari tomonidan sohada faollik ko‘rsatayotgan jonkuyar xodimlarga qimmatbaho sovg‘alar, barcha ishtirokchilarga esa oziq-ovqat jamlanmalari hadya etildi.
O‘zbekiston musulmonlari idorasi
Matbuot xizmati