Toshkentda "Terrorizm, ekstremizm va radikalizmga qarshi kurashishda yoshlarning o'rni" mavzusida xalqaro anjuman bo'lib o'tdi.

Ushbu anjuman o'tkazilishi haqida saytimizda xabar bergan edik. 

Anjuman O'zbekiston Respublikasi Yoshlar ishlari agentligi, Tashqi ishlar vazirligi, BMTning O'zbekistondagi vakolatxonasi, Taraqqiyot dasturi, Giyohvand moddalar va jinoyatchilikka qarshi kurashish bo'yicha boshqarmasi, shuningdek, YeHHTning O'zbekistondagi loyihalari koordinatori, Osiyoda hamkorlik va o'zaro ishonch choralari bo'yicha kengash, Germaniya xalqaro hamkorlik jamiyati (GIZ) kabi xalqaro tashkilotlar hamkorligida tashkil etildi.

Tadbirda ushbu tuzilmalarga a'zo mamlakatlar yoshlari o'rtasida terrorizm, ekstremizm va radikalizmga qarshi kurashishga e'tiborni yanada kuchaytirish, shuningdek, birgalikda samarali faoliyat olib borishga doir masalalar muhokama qilindi.

O'zA xabariga ko'ra, tadbirda ishtirok etgan O'zbekiston Respublikasi Bosh vaziri o'rinbosari Aziz Abduhakimov davlatimiz rahbari tashabbusi bilan 2021 yil – Yoshlarni qo'llab-quvvatlash va aholi salomatligini mustahkamlash yili deb e'lon qilinganini qayd etarkan, shu munosabat bilan qabul qilingan Davlat dasturida yoshlarning jamiyatdagi o'rnini mustahkamlashga alohida e'tibor qaratilganini ta'kidladi. So'nggi uch yilda mamlakatimizdagi oliy ta'lim muassasalari soni 60 foizga oshib, ayni damda 116 taga etgani ham ushbu yo'nalishda amalga oshirilayotgan islohotlar samarasidir.

Anjumanda, shuningdek, onlayn tarzda Turkiy tilli davlatlar hamkorlik kengashi Bosh kotibi Bag'dat Amreev, OHIChK Kotibiyati Ijrochi direktori Qayrat Saribay, MDH Ijroiya qo'mitasi Raisi – Ijrochi kotibi Sergey Lebedev, BMT Bosh kotibi o'rinbosari Vladimir Voronkov va boshqa qator nufuzli xalqaro tuzilmalar mas'ul vakillari ham so'zga chiqishdi.

– Bugungi kunga kelib er yuzida istiqomat qilayotgan qariy 8 milliard kishining 2,3 milliardi yoshlar, – deydi A.Abduhakimov. – O'zbekistonda 30 yoshgacha bo'lgan o'g'il-qizlar mamlakat aholisining 55 foizini, ya'ni 18 million nafarini tashkil etadi. Shu ma'noda ko'pgina davlatlarda ekstremizm, terrorizm va radikalizm kabi g'oyaviy tahdidlarning yoshlar ongiga salbiy ta'siri boshqa xavfli omillarga nisbatan birmuncha yuqori. Halqaro hamjamiyat, xorijiy va mintaqaviy tashkilotlar tomonidan jahon miqyosida ushbu xatarlarga qarshi kurashish borasida muayyan ishlar olib borilmoqda. Tabiiyki, ayni yo'nalishda ma'lum ma'noda ijobiy natijalarga ham erishilmoqda.

Videokonferentsiya dasturidan o'rin olgan mavzular bo'yicha 4 ta sho''ba yig'ilishida xalqaro ekspertlar, xorijiy mamlakatlar kuzatuvchilari terrorizm, ekstremizm va radikalizmga qarshi samarali kurashish bo'yicha o'z tajribalari bilan o'rtoqlashdi.

O'zbekiston musulmonlari idorasi matbuot xizmati