Joriy yilning 20 yanvar' kuni Prezidentimiz Shavkat Mirziyoevning Oliy majlisga Murojaatnomasida bayon etilgan diniy-ma'rifiy hayotimizning ustuvor yo'nalishlari O'zbekiston musulmonlari idorasida tashkil etilgan tadbirda muhokama qilindi.

Anjumanda Diniy idora va tizim tarkibiga kiruvchi bo'linmalar rahbariyati, xodimlari, shuningdek, O'zbekiston Davlat san'at va madaniyat instituti vakillari ishtirok etdi.

Tadbir an'anaga muvofiq, Qur'oni karim tilovati va xayrli duo bilan boshlandi. Shundan so'ng yig'ilishni O'zbekiston musulmonlari idorasi raisi o'rinbosari Ibrohimjon Inomov ochib berdi.

O'zbekiston Davlat san'at va madaniyat instituti katta o'qituvchisi O'tkir Mavlonov Prezidentimiz Murojaatnomasida ijtimoiy-ma'naviy, diniy-ma'rifiy va madaniy-gumanitar sohalardagi keng ko'lamli islohotlarni davom ettirish bo'yicha belgilangan asosiy vazifalar haqida so'zlab berdi.

Shuningdek, yig'ilishda so'zga chiqqanlar bugungi kunda yurtimizda yoshlarni ilm-ma'rifatli, odob-axloqli etib tarbiyalashga alohida e'tibor qaratilayotgani, bunda yigit-qizlarimiz ilm-ma'rifat egallashlari uchun barcha imkoniyatlar yaratib berilayotgani, buning natijasida yoshlarimiz ilm-ma'rifat bilan ulkan muvaffaqiyatlarga erishayotganlarini ta'kidladilar.

Dinimizda yoshlarning odob-axloqli bo'lishi, ilm olishi eng muhim shartlardan hisoblanadi. Hadisi sharifda: “Ilm Chin-Mochin (Hitoy)da bo'lsa ham, uni izlab topib, egallangiz. Zero, ilmni talab qilish har bir musulmonga farzdir”, deyilgan.

Har inson yurtiga o'zining ilmi, ish yuritish tartibi, samara beradigan amaliy ishlari bilan yurtimiz taraqqiyoti hissa qo'shishi kerak. Ushbu fikr-mulohazalar yig'ilish ishtirokchilarining yakuniy xulosasi bo'ldi. 

Yig'ilish yakunida Ibrohimjon domla Inomov duo-xayrlar qildilar.

O'zbekiston musulmonlari idorasi matbuot xizmati