Oldin xabar berganimizdek, AzonTV ilmiy-ma'rifiy onlayn telekanalida yurtimizning mohir qorilaridan biri, marhum ustoz Zayniddin qori Muhammad Yusuf xotiralariga bag'ishlangan Qur'on musobaqasi bo'lib o'tmoqda.

Ayni paytda “Qur'oni Karim musobaqasi 1442” tanlovining hifz va tilovot yo'nalishi bo'yicha qorilarning bellashuvi juda qizg'in kechmoqda. Jumladan, hifz yo'nalishidagi qorilarning Qur'oni karimni mukammal yod olgani, tilovat yo'nalishidagilarning mahorati bahslarning yanada qizg'in va hayajonga boy bo'lishini ta'minlamoqda.

Alloh taolo marhamat qiladi: “Va Qur'onni tartil bilan tilovat qil” (Muzzammil surasi 4-oyat). Sharh: Qur'onni tartil bilan o'qish deb uni dona-dona qilib, har bir harfini o'z o'rnidan chiqarib, oyatlarini alohida-alohida qilib, tajvid qoidalari asosida o'qishga aytiladi.

Qur'onni tartil bilan o'qishga bo'lgan farmoni ilohiy barcha mo'min musulmonlarga ommaviy farmondir. Muhammad alayhissalomga farishta Jabroil alayhissalom Qur'onni tartil bilan o'qib berganlar. O'z navbatida Payg'ambar alayhissalom ummatlariga tartil bilan o'qib berganlar.

Musulmon ummati esa avloddan avlodga o'z Payg'ambaridan qandoq qilib olgan bo'lsa, shundoq o'tkazib kelmoqda. Qorilarimiz Qur'on qiroati qoidalarini tartibga solib kitoblar qilishgan. Bu qoidalarni bilish har bir musulmon uchun zarur. Shuning uchun har bir musulmon tajvid qoidalari bo'yicha bir kitob o'qimog'i, Qur'on tilovatini tajvid ilmiga ega bo'lgan qorilardan o'rganmog'i lozim.

Qur'on musobaqasini quyidagi manzillarda tomosha qilishingiz mumkin:
youtube

O'zbekiston musulmonlari idorasi matbuot xizmati