Rasululloh sollallohu alayhi vasallam: “Sizlardan birortangiz uyqudan tursa, burnini uch marta qoqib tashlasin, zero shayton uning dimog'ida tunagan bo'ladi”, dedilar (Imom Buxoriy, Imom Muslim rivoyati).
Doktor Mustafo Shahota aytadi: “Burun bo'shlig'ida mikroblarning bir necha turlari paydo bo'ladi va rivojlanadi. Har kuni tahoratda burun bo'shlig'ining yuvilishi, uning yallig'lanishi va mikroblarning ko'payishini ketkizadi”.
Qarang, bu juda ham oson, ammo savobi ulkan, gunohlarni ketkazuvchi, jannatga etkazuvchi bo'lgan amaldir. Lekin dangasaligimiz, beparvoligimiz oqibatida bunga e'tibor bermaymiz, amal qilmaymiz. Ko'pchiligimiz hatto bilmaymiz ham. Avval bilmasak, endi bilib oldik. Endi bilganimizga amal qilaylik va boshqalarga ham etkazaylik.
Zero, Rasululloh sollallohu alayhi vasallamning sunnatlarini yoyilishiga xizmat qilish u zotga bo'lgan muhabbat va ehtiromning yuksak namunasi hisoblanadi. U zot sollallohu alayhi vasallam sunnatlarini aniqlik bilan etkazganlarning haqqiga: “Mening gapimni eshitib, yodlab, singdirib, so'ngra etkazgan odamni Alloh ne'matlantirsin”, deb duo qilganlar (Imom Termiziy rivoyati).
Alloh taolo barchamizga har bir ishda Rasululloh sollallohu alayhi vasallamning sunnatlariga amal qilishimizga tavfiq ato etsin, omiyn!
Allohumma solli va sallim 'ala Muhammadin va 'ala aali Muhammad
Davron NURMUHAMMAD
Qoraqalpog‘iston musulmonlari qoziyoti qozisi Bahramaddin domla Razovning navbatdagi xizmat safari Chimboy tumaniga bo‘ldi.
Tashrifdan maqsad masjidlardagi yaratilgan sharoitlar, atrofdagi tozalik, obodonlashtirish, kuz-qish mavsumiga tayyorgarlik ishlari bilan yaqindan tanishish hamda «Xon» jome masjidiga yangi tayinlangan imom noibini jamoatga tanishtirish.
Qozi tumandagi markaziy «Xon» jome masjidida jamoat bilan uchrashar ekan, «To‘y berish odobi» mavzusida ma’ruza qildi. Ma’ruzasi davomida isrofgarchilikning oldini olish, bid’at-xurofatlarga qarshi kurashish, shuningdek, ota-onalar, ustozlar va jamiyat birgalikda yoshlarning ma’naviy, ilmiy va jismoniy rivojlanishiga e’tibor qaratish, ularni ilm olishga yo‘naltirish va uning fazilati, yurtimizdagi tinchlik, xotirjamlik va farovonlikning qadriga yetish haqida gapirdi. Maruzasi davomida yurtimizda hukm surayotgan tinchlikning qadriga yetish, amalga oshirilayotgan ezgu ishlarga o‘zimizning insoniylik hissamizni qo‘shish, yoshlar tarbiyasi, farzandlarimizga ilm o‘rgatish, halol kasb egallashga qiziqtirishimiz, shuningdek, migratsiya masalasiga ham alohida to‘xtalib o‘tdi.
Qozi domla shu yili Toshkent islom institutini tugatgan, Chimboy tumani «Xon» jome masjidiga imom noibi bo‘lib tayinlangan Raxim Baymuratovni jamoatga tanishtirdi va uning kelgusi ishlarida omadlar tilab, duolar qildi.
B.Abbazov, Qoraqalpog‘iston musulmonlari qoziyoti xodimi.