Mamlakatimizning Tehrondagi elchixonasi Turizmni rivojlantirish davlat qo'mitasi bilan birgalikda O'zbekiston va Eron sayyohlik kompaniyalari vakillari o'rtasida onlayn videokonferentsiya tashkil etdi, xabar bermoqda «Dunyo» AA.
Tadbir davomida ikki mamlakat sayyohlik industriyasi vakillari o'rtasida O'zbekistonning qadimiy shaharlariga sayyohlik oqimini ko'paytirish borasidagi hamkorlik istiqbollari ham muhokama qilindi.
Videokonferentsiyada Eron sayyohlik operatorlari assotsiatsiyasi (ESOA) raisi Ibrohim Purfaraj va uning maslahatchisi Mahmud Bonakdarnia, Eronning "Zagros Airlines" aviakompaniyasi vakillari va Eronning 20 dan ortiq etakchi ixtisoslashgan kompaniyalari hamda 15 nafar O'zbekiston sayyohlik agentligi rahbarlari ishtirok etdi.
Uchrashuvda ishtirokchilar "Uzbekistan – Safe Travel Guaranteed" shiori ostida sayyohlar uchun xavfsiz sayohat maskani sifatida mamlakat imijini faol targ'ib etib, pandemiya sharoitida O'zbekiston sayyohlik sohasini tiklash va rivojlantirish borasida amalga oshirilayotgan keng ko'lamli chora-tadbirlar bilan tanishdi.
Bundan tashqari, O'zbekistonning pandemiya paytida xorijiy aviatashuvchilar va sayyohlik agentliklarini rag'batlantirish niyati alohida ta'kidlandi. Jumladan, O'zbekistonga charter reyslarini tashkil etish uchun xorijiy aviatashuvchilarni tovon puli bilan ta'minlash, aeroportlar xizmat ko'rsatish servisi (Ground handling)ni kamaytirish, shuningdek, SWIFT xalqaro to'lov tizimining bu mamlakatda yo'qligi tufayli Eron fuqarolarining elektron vizaga to'lash bilan bog'liq masalalarni hal qilish rejalari ta'kidlandi. Oxirgi masala 2021 yildan boshlab O'zbekistondagi xalqaro aeroportlarga to'g'ridan-to'g'ri kelishda kirish vizalari uchun to'lovning yangi tizimini joriy etish orqali amalga oshiriladi.
Eron tomoni, o'z navbatida, ikki xalqning mushtarak tarixi, urf-odatlari va madaniyatini hisobga olgan holda, O'zbekiston va Eron turizm sohasidagi aloqalarini oshirishi lozimligini ta'kidladi. Samarqand, Buxoro va Hiva kabi qadimiy o'zbek shaharlari eronliklar orasida juda mashhur bo'lib, mamlakatlarimiz me'morchiligi va madaniyati hamisha ruhi bo'yicha juda yaqin bo'lgan.
ESOA raisi Ibrohim Pourfaraj 2019 yilda elektron vizani joriy etish orqali Eron fuqarolari uchun viza tizimining soddalashtirishini qo'llab-quvvatladi, bu ikki mamlakat o'rtasida turizm sohasidagi hamkorlikni rivojlantirish uchun muhim qadam bo'ldi. ESOA rahbari O'zbekiston hukumati tomonidan qabul qilingan yuqorida qayd etilgan qarorlar O'zbekiston tomonining Eron bilan sayyohlik sohasidagi hamkorlikni mustahkamlash borasidagi qat'iy niyatini namoyish etayotganini alohida ta'kidladi. Ibrohim Purfaraj O'zbekiston tarixiy shaharlarining chiroyi, betakror me'morchiligi, bularning barchasi o'zbek xalqining boy tarixi, madaniyati va mehmondo'stligi bilan birgalikda turizm industriyasining rivojlanishi uchun ulkan salohiyat yaratayotganini ham qayd etdi.
ESOA raisi maslahatchisi Mahmud Bonakdarniya o'z navbatida ikki do'st mamlakat xalqlarining madaniy yaqinligi O'zbekiston va Eron o'rtasida sayyohlik hamkorligini rivojlantirishda asosiy omillardan biri ekanini ta'kidladi. Uning fikricha, "Navro'z" xalqaro bayrami doirasida O'zbekistonda har yili o'tkaziladigan ommaviy va turli madaniy-ko'ngilochar tadbirlar eronlik sayyohlar orasida yangilik bo'lib, juda katta qiziqish uyg'otishi mumkin. Shu munosabat bilan Mahmud Bonakdarniya turoperatorlar va Eron ommaviy axborot vositalari uchun O'zbekistonning noyob sayyohlik yo'nalishlari bo'yicha maxsus info-turlar tashkil etishni taklif etdi.
Tadbir davomida ikki mamlakat sayyohlik kompaniyalari o'rtasida aloqalar almashildi va tomonlar turli sayyohlik yo'nalishlari uchun qo'shma sayohat paketlarini ishlab chiqishga ham kelishib oldilar.
O'zbekiston musulmonlari idorasi matbuot xizmati
O‘zbekiston Respublikasi Prezidentining qarori
Buyuk vatandoshimiz, islomiy ilmlar rivojiga ulkan hissa qo‘shgan benazir alloma, kalom ilmining sultoni Imom Abu Mansur Moturidiyning (keyingi o‘rinlarda – Imom Moturidiy) ibratli hayot yo‘li va boy ilmiy-ma’naviy merosini har tomonlama chuqur o‘rganishni rag‘batlantirish, moturidiylik ta’limotiga xos bag‘rikenglik va mo‘tadillik tamoyillarini xalqimiz va jahon jamoatchiligi o‘rtasida keng targ‘ib etish, yoshlarni Vatanga muhabbat, milliy va umuminsoniy qadriyatlarga hurmat ruhida tarbiyalash maqsadida qaror qilaman:
1. Din ishlari bo‘yicha qo‘mita, O‘zbekiston musulmonlari idorasi, Samarqand viloyati hokimligi, O‘zbekiston xalqaro islom akademiyasi, Imom Moturidiy xalqaro ilmiy-tadqiqot markazining 2025 yilda Imom Moturidiy tavalludining 1155 yilligini keng nishonlash to‘g‘risidagi taklifi ma’qullansin.
2. Imom Moturidiy tavalludining 1155 yilligiga bag‘ishlangan tadbirlarga tayyorgarlik ko‘rish va ularni o‘tkazish bo‘yicha tashkiliy qo‘mita (keyingi o‘rinlarda – Tashkiliy qo‘mita) tarkibi ilovaga muvofiq tasdiqlansin.
3. Tashkiliy qo‘mita (A.Aripov) ikki hafta muddatda Imom Moturidiy tavalludining 1155 yilligini allomaning islom olamidagi obro‘-e’tibori va nufuziga munosib tarzda yuqori saviyada nishonlash bo‘yicha quyidagilarni nazarda tutadigan chora-tadbirlar dasturini tasdiqlasin:
(a) 2025 yil aprel oyida Samarqand shahrida “Moturidiylik – bag‘rikenglik, mo‘tadillik va ma’rifat ta’limoti” mavzusida xalqaro ilmiy-amaliy anjuman o‘tkazish;
(b) xorijlik tadqiqotchilar o‘rtasida moturidiylik ta’limoti bo‘yicha ilmiy tanlov o‘tkazish, g‘oliblar ishtirokida O‘zbekistonda madaniy-ma’rifiy uchrashuv va seminar-treninglar tashkil etish;
(v) Imom Moturidiyning “Ta’vilot al-Qur’on” va “Kitob at-tavhid” asarlari va moturidiylik ta’limotiga oid manbalarning o‘zbek va xorijiy tillardagi ilmiy-izohli akademik tarjimalarini nashr etish;
(g) Imom Moturidiy tavalludining 1155 yilligiga bag‘ishlangan esdalik suvenirlarini muomalaga chiqarish hamda pochta markalari, taqvimlar, buyuk mutafakkirning hayoti va ilmiy merosini yoritib beradigan boshqa ko‘rgazmali axborot vositalari turkumini yaratish;
(d) Imom Moturidiyning serqirra hayot yo‘li va ilmiy merosining bugungi kundagi ahamiyatini ochib beradigan badiiy-publitsistik film yaratish;
(ye) Samarqand viloyatida Imom Moturidiy va moturidiylik ta’limoti yo‘nalishida faoliyat olib borgan allomalarning hayoti, ilmiy va ijodiy merosiga bag‘ishlangan asarlarning nodir qo‘lyozma va nashr nusxalari hamda kitoblari ko‘rgazmasini tashkil etish;
(j) Samarqand shahridagi Abu Mansur Moturidiy majmuasini qayta ta’mirlash va obodonlashtirish.
4. Oliy ta’lim, fan va innovatsiyalar vazirligi:
(a) Din ishlari bo‘yicha qo‘mita bilan birgalikda 2025 yil may va oktyabr oylarida Sharof Rashidov nomidagi Samarqand davlat universitetida Oliy ta’lim muassasalarini rivojlantirish jamg‘armasi mablag‘lari hisobidan “Moturidiylik ta’limoti va hozirgi zamon” mavzusida respublika ilmiy-amaliy konferensiyasini hamda ilmiy maqolalar tanlovini o‘tkazsin;
(b) moturidiylik ta’limotiga mansub allomalarning ilmiy merosi va noyob qo‘lyozma asarlarni o‘rganish bo‘yicha Ilm-fanni moliyalashtirish va innovatsiyalarni qo‘llab-quvvatlash jamg‘armasi mablag‘lari hisobidan amalga oshiriladigan ilmiy-tadqiqot ishlariga davlat buyurtmasini belgilangan tartibda shakllantirib borsin.
5. O‘zbekiston musulmonlari idorasiga imom-xatiblar hamda diniy ta’lim muassasalari talabalari o‘rtasida “Moturidiylik ta’limoti bilimdoni” tanlovini o‘tkazish va g‘oliblarni munosib taqdirlash tavsiya etilsin.
6.Qoraqalpog‘iston Respublikasi Vazirlar Kengashi, viloyatlar va Toshkent shahri hokimliklari Din ishlari bo‘yicha qo‘mita, Respublika Ma’naviyat va ma’rifat markazi, Yoshlar ishlari agentligi, O‘zbekiston Yozuvchilar uyushmasi bilan birgalikda 2025 yil davomida joylarda Imom Moturidiyning ilmiy merosiga bag‘ishlangan davra suhbatlarini tashkil etsin.
7. Imom Moturidiy xalqaro ilmiy-tadqiqot markazi Madaniy meros agentligi bilan birgalikda:
(a) xorijiy mamlakatlarda saqlanayotgan Imom Moturidiy va moturidiylik ta’limotiga mansub allomalarning hayoti va ilmiy merosiga oid noyob qo‘lyozma asarlar va boshqa madaniy boyliklarni aniqlash, ularning nusxalarini O‘zbekistonga olib kelish va tadqiq qilishni tizimli ravishda tashkil etsin;
(b) Imom Moturidiyning hayoti va ilmiy faoliyatiga bag‘ishlangan yuqori sifatli mediamahsulotlar hamda audiovizual asarlar yaratish, ularni mahalliy va xorijiy ommaviy axborot vositalarida e’lon qilish, internet tarmog‘i va ijtimoiy tarmoqlarda keng targ‘ib qilish choralarini ko‘rsin.
8. O‘zbekiston Milliy axborot agentligi, O‘zbekiston Milliy teleradiokompaniyasi, “Dunyo” axborot agentligi va O‘zbekiston milliy media assotsiatsiyasiga Imom Moturidiy tavalludining 1155 yilligini nishonlash bilan bog‘liq tadbirlarni keng yoritib borish tavsiya etilsin.
9. Mazkur qarorning ijrosini nazorat qilish O‘zbekiston Respublikasi Bosh vaziri A.N. Aripov hamda O‘zbekiston Respublikasi Prezidentining maslahatchisi R.Q. Davletov zimmasiga yuklansin.
O‘zbekiston Respublikasi Prezidenti
Sh. Mirziyoyev
manba: https://president.uz/uz/lists/view/7946