Bu haqda Misr parlamenti Vakillar majlisi (quyi palata) Ijtimoiy birdamlik, oila va nogironlar qo'mitasi raisi professor Abdulhadi al-Qasabiy O'zbekiston Respublikasining Misrdagi turizm elchisi etib tayinlangani munosabati bilan O'zbekistonning Misrdagi favqulodda va muxtor elchisi Oybek Usmonovdan tegishli sertifikatni olish chog'ida xabar qildi.
“Ayni paytda davlatlarimiz o'rtasida ko'ptomonlama hamkorlikni, xususan iqtisodiyot, sarmoya, savdo, turizm, madaniyat, sport va boshqa sohalarda rivojlantirish uchun muntazam aviaqatnovlarni yo'lga qo'yish maqsadga muvofiqdir. Misr Prezidentining Toshkentga amalga oshirgan davlat tashrifidan so'ng Misr bosh imomi Al-Azhar shayxi professor Ahmad at-Tayib O'zbekistonda bo'lib, mamlakat rahbariyati bilan samarali uchrashuvlar o'tkazdi. Shu kunlarda O'zbekiston talabalari uchun Al-Azhar ta'lim muassasalarida grantlar miqdorini oshirish masalasi muhokama qilinmoqda va u yaqinda ijobiy hal bo'lishiga ishonchim komil”, - misrlik olim so'zlariga iqtibos keltirmoqda “Dunyo” AA.
Ta'kidlash joizki, ma'muriy fanlar doktori Abdulhadi al-Qasabiy parlamentda ko'pchilik o'ringa ega “Misrni qo'llab-quvvatlash” koalitsiyasi rahbari hamda Misr Sufiy tariqatlar Oliy kengashi raisi sifatida faoliyat yuritadi.

O'zbekiston musulmonlari idorasi matbuot xizmati