NAZM
Avvalg'i mu'man bihning sharhi
(Mavzuning davomi)
Bor ediyu hamisha bo'lg'usidur,
Nekim o'lg'usidur, ne to'lg'usidur.
Tengri kunhig'a banda yo'l topmas,
“Qachon”u “qanda” anda yo'l topmas.
Zoti Aning ne javharu ne araz,
Ishlarida ne illatu ne g'araz.
Tengrining zoti, oti eldek emas,
Fe'li birla sifoti eldek emas.
O'z boshingcha Hudog'a ot demagil,
Ham ta'aqqul qilib, sifot demagil.
Bor mavsuf ul sifot birla,
Ham musammodurur ul ot birla.
Kim O'zi oni yod qilg'andur,
Ahli din e'tiqod qilg'andur.
NASRIY BAYoN
(Mavzuning davomi)
U zot (Alloh avvaldan) bor edi va hamisha bor bo'ladi – abadiy tirik va qoim turguvchidir, na o'ladi, na ortadi – na o'zgaradi!
Allohning zoti mohiyatiga banda yo'l topa olmaydi (Uning zoti mohiyatini anglashdan banda ojizdir), “Qachon (bor bo'lgan)?”, “Qayerda (turadi)?” degan gaplar u zot haqida yo'l topmaydi (Uning zoti haqida bunday gaplarni aytish joiz emas).
Uning zoti javhar ham emas, araz ham emas. Allohning ishlarida illat – ayb, nuqson, kamchilik bo'lmaydi, shuningdek, g'araz – yomon maqsad va niyat ham bo'lmaydi (balki, faqat foydali hikmat bo'ladi).
IZOH. Javhar – parchalanishni qabul etmaydigan bir parcha, narsalarning asl moddasi, o'zagi, boshqa jismlar shu javhardan vujudga keladi. Alloh ta'olo jism emas, javhar emas. shakl, hudud, o'lchov, sanoq va bo'linishni qabul etmaydi...
Araz biror narsaning aslida bor bo'lmay, keyin bor bo'lgan vaqtli sifatidir, u faqat boshqa narsa bilan birikkanda bor bo'ladi. Alloh araz emas va arazlardan xolidir («Jomi' ul-mutun»).
Alloh ta'oloning zoti ham, nomlari ham xalqning, odamlarning, yaratilmish maxluqotning zoti va otidek emas, mutloq o'ziga xos va mosdir, Uning fe'li – qiladigan ishlari va sifatlari ham odamlarning fe'li va sifatidek emas (aksincha, odamlarning, maxluqotning barcha fe'l va sifatlarini U yaratgandir).
O'z boshingcha Alloh ta'ologa nomlar taqama, o'zingcha aql yuritib, xayolingga kelgan sifatlarni ham U zotga nisbat beraverma. Zotan, O'zi (Qur'oni karimda bildirgan) sifatlar bilan vasf etilgan vaO'zi (bildirgan eng go'zal) maxsus ismlar bilan nomlangandir. Bu sifat va nomlarni O'zi bayon qilgan va din ahli, iymon ahli shu narsalarga e'tiqod qilgan – ishongandir.
IZOH. Ilm sifati Allohning azaliy sifatlaridandir. Alloh ta'olo butun mavjudotni biladi. Uning ilmidan zarra miqdoricha bo'lsa ham hech narsa yo'q bo'lmaydi. U qorong'u kechada yurgan chumolini, havoda uchayotgan zarrachalarni, qalblarning ich-ichidan kechgan narsalarni, hofizalarda (xotirada, xayolda) jarayon etadigan narsalarni, yashirin va eng pinhon narsalarni biladi. Uning ilmi hamma narsalarga – xoh butun bo'lsin, xoh butundan bir parcha bo'lsin, xoh mavjud bo'lsin, xoh nomavjud bo'lsin, xoh mumkin bo'lsin, xoh nomumkin bo'lsin – hammasiga taalluqlidir. U maxluqotining ibtidosini va intihosini – boshlanishini va oxirini biladi. Zot va sifatlardan hamma narsani azaliy va abadiy ilmi bilan bilguvchi Udir («Jomi' ul-mutun»).
Nasriy bayon va sharh muallifi:
Mirzo KYeNJABYeK
Sog‘ tanda – sog‘lom aql
Inson tetik, bardam va baquvvat bo‘lishi uchun muntazam ravishda jismoniy tarbiya bilan shug‘ullanishi kerak. Ayniqsa, bugungi farovon hayotda – har bir oilada jon boshiga bittadan avtoulov to‘g‘ri kelayotgan davrda bu juda muhim.
O‘zbekiston musulmonlari idorasi raisi, muftiy Shayx Nuriddin Xoliqnazar hazratlari tashabbuslari bilan diniy soha xodimlari o‘rtasida «Sog‘ tanda – sog‘lom aql» shiori ostida sportning voleybol, stol tennisi, shaxmat-shashka turlari bo‘yicha musobaqalar bo‘lib o‘tyapti.
Bugun, 28 yanvar kuni poytaxtimiz imom-xatiblari va imom noiblari o‘rtasida sportning voleybol, stol tennisi, shaxmat-shashka musobaqalarining Toshkent shahar bosiqchi juda ko‘tarinki ruhda bo‘lib o‘tdi.
Musobaqani Toshkent shahar bosh imom-xatibi Abduqahhor domla Yunusov va hamkor tashkilotlar mutasaddilari ochib berdilar.
Tabiiyki, musobaqalarda tez qaror qabul qila oladigan, abjir, chaqqon va epchillarga omad kulib boqadi.
Voleybol bo‘yicha
1-o‘rin Yunusobod tumani
2-o‘rin Uchtepa tumani
3-o‘rin Sergeli tumani diniy soha xodimlariga nasib etdi.
Stol tennisi musobaqasida
1-o‘rin Yunusobod tumani «Masjidul Xayr» masjidi imom noibi Adhamxo‘ja domla Hikmatullayev;
2-o‘rin Mirzo Ulug‘bek tumani «Oltintepa» masjidi imom noibi Rahmatulloh domla Hikmatullayev;
3-o‘rin Mirobod tumani «al-Badr» masjidi imom noibi Jamshid domla Nazarov loyiq ko‘rildi.
Shashka yo‘nalishida
1-o‘rin Shayxontohur tumani «Obidxon Maxdum» masjidi imom noibi Adham domla Latipov;
2-o‘rin Uchtepa tumani «Aziz ota» masjidi imom noibi Abdurahmon domla Kamolov;
3-o‘rin Yunusobod tumani «Omina» masjidi imom noibi Abdurahim domla To‘raqulov munosib ko‘rildi.
Shaxmat bo‘yicha ham g‘oliblar aniqlandi:
1-o‘rin Bektemir tumani «Bektemir» jome masjidi imom-xatibi Ziyovuddin domla Aymuhamedovga;
2-o‘rin Sergeli tumani «Ma’ruf ota» masjidi imomi Sarvar domla Muhammadiyevga;
3-o‘rin Mirzo Ulug‘bek tumani «To‘ra buva» masjidi imom noibi Muhammadamin domla Abdullajonovga nasib etdi.
G‘oliblarga qimmatbaho sovg‘alar va faxriy yorliqlar topshirildi.
Toshkent shahar vakilligi
Matbuot xizmati