Bugun, 13 oktyabr' kuni O'zbekiston musulmonlari idorasi raisi, muftiy Usmonxon Alimov hazratlari Toshkent shahri Shayxontohur tumanida joylashgan “Imom Hasan” jome masjidining yangi binosi poydevoriga tamal toshi qo'yish marosimida ishtirok etdilar.

Tashrif davomida muftiy hazratlari boshchiligidagi bir guruh ulamolar, imom-domlalar va nuroniy otaxonlar “Imom Hasan” jome masjidi binosining birinchi g'ishtini tabarrukona qo'yib berdilar. Ushbu ulug' insonlar masjid qurilishiga moddiy va ma'naviy yordam berayotgan barcha insonlarning haqiga duo xayrlar qildilar.

Muftiy hazratlari masjid loyihasi bilan tanishish asnosida Allohning uyi bo'lgan masjid qurishning savobi ulug' ekani haqida so'zlab berdilar. Darhaqiqat, Qur'oni karimda marhamat qilinadi: “Allohning masjidlarini faqat Allohga va oxirat kuniga iymon keltirgan, namozni to'kis ado etgan, zakotni (haqdorlarga) ato qilgan va yolg'iz Allohdangina qo'rqadigan zotlargina obod qilurlar. Ana o'shalar hidoyat topuvchi zotlar bo'lsalar ajabmas” (Tavba surasi, 18-oyat).

Hazrati Payg'ambarimiz sollallohu alayhi vasallamning hadislarida ham masjid qurish va uni obod qilish borasida ko'plab targ'iblar kelgan. Hazrati Usmon ibn Affon roziyallohu anhudan rivoyat qilinadi, Nabiy alayhissalom shunday dedilar: “Kim Alloh uchun bir masjid qursa, Alloh jannatda shuning mislicha uy bunyod qiladi” (Muttafaqun alayh).
Anas ibn Molik roziyallohu anhudan bunday rivoyat qilingan: “Kim masjidda bitta chiroq yoqsa, o'sha chiroqning nuri o'chgunicha farishtalar u kishining haqqiga istig'for aytib turadilar”.

Masjid qurish va uni obod etish mana shunday ulug' savobli amal ekanini chin qalbidan his etgan muxlis xalqimiz masjidlar binosini yangidan barpo etish ishlarida faol ishtirok etmoqdalar.

Jome masjidlarga tashrif davomida muftiy hazratlari Toshkent shahri Mirzo Ulug'bek tumanidagi “Shayx Ziyovuddinxon” va Olmazor tumanida joylashgan "Iskandarxo'ja" jome masjidlarini qaytadan qurish rejalarini muhokama etdilar. Ushbu jome masjidlar ham tez kunlarda qaytadan bunyod etilib, xalqimizga tuhfa etilishini Haq taolodan so'rab duo qildilar.

Muftiy hazratlari ushbu jome masjidlarga tashriflari chog'ida mo'min-musulmonlar uchun qulay va shinam qilish, xonaqohlarni keng va yorug' bo'lishi, atroflarini obod va ko'rkam etish, qurilish ishlarini zamonaviylik va milliylikka uyg'un holda olib borish hamda katta yo'l bo'yidagi jomelarda ayollar namoz o'qishlari uchun shart-sharoitlar hozirlashga alohida urg'u qaratish borasidagi muhim tavsiyalarni berdilar.

Tamal toshi qo'yib berilgan "Imom Hasan" jome masjidi barpo etilishiga juda katta hissa qo'shayotgan insonlar, quruvchi-muhandislar, saxovatpesha kishilar va o'z erlaridan masjid qurish uchun joy ajratib bergan muruvvatli insonlarning haqqilariga va ularning o'tgan marhumlarining ruhi pokiga Qur'oni karim oyatlari tilovat qilinib, muftiy hazratlari tomonlaridan ko'pdan-ko'p duolar qilindi.

Alloh taolo ushbu jome masjidlarni tez kunlarda bunyod etilib, xalqimizga muborak aylashini nasib etsin!

O'zbekiston musulmonlari idorasi Matbuot xizmati