Sirdaryo viloyati Baxt shahridagi “Baxt” jome masjidi viloyatning dastlabki masjidlaridan biri hisoblanadi. Hujjatlarda 1956 yildan beri faoliyat yuritib kelayotganligi qayd etilgan bo'lsada, aslida undan ham avvvalroq, o'tgan asrning 40-yillaridan beri ushbu mavjud ekanligi aytiladi.
Sobiq ittifoq davridan to mustaqillik yillarigacha viloyat bo'yicha to'rtta masjid bo'lgan. Ana shulardan biri - hozirgi “Baxt” masjidi “Malik” nomi bilan atalib, kichik bir kulbasifat bo'lgan, odamlar bo'yralarda namoz o'qishgan. Yartagan Alloh inoyati, istiqlol nasimi tufayli 90 yillar boshida masjid qaytadan qurilib, shu davrga qadar xizmat qildi. O'tgan 27 yil mobaynida masjidni ko'proq jamoat sig'dira oladigan, yanada kengroq qilib, qolaversa katta yo'l bo'yiga ko'chirishga ehtiyoj mavjudligi sababli 2019 yilda yangi loyiha asosida qurilish ishlari boshlab yuborildi”, deydi imom-xatib Nurmuhammad Narzullayev.
“Baxt” jome masjidi Toshkent-Samarqand yo'nalishidagi M-34 magistral yo'li bo'yida qurilmoqda. Bu esa nafaqat hudud aholisi balki, yo'lovchilar, qolaversa ziyorat turizmi doirasida mahalliy va xorijiy sayyohlarning ibodatlarini ado etib olishlari uchun qulaylik tug'diradi.
Masjid uchun 50 sotix er maydoni ajratilgan. Loyihaga ko'ra, asosiy xonaqoh 8 burchak shaklida 26*26 m o'lchamda bo'lib, 1500 kishini sig'diradi. Masjid tarkibidagi qo'shimcha xonaqohlar va hovli sahni bilan hisoblanganda umumiy sig'imi 3000 kishiga etadi. Ayollar uchun alohida namozxona va tahoratxonalar ham o'rin egallashi ko'zda tutilgan. Loyiha Toshkent shahrida yaqinda qurib bitkazilgan “Muhsinxonto'ra” masjididan andoza olingan.
Hozirga kelib masjidning kirish qismi devorlari ko'tarilgan. Asosiy xonaqohning tomlari yopilib, gumbaz o'rnatildi. 32 metrlik minoraning metall-konstruktsiya ishlari olib borilmoqda. Avtotururgoh va manzarali ko'chatlar ekish uchun 15 sotix er ajratilganligi ahamiyatga molik. Chunki ba'zi masjid atroflarida jamoat namozlarida avtomobillarning tirbandligi va betartib qo'yilishi bilan bog'liq muammolar paydo bo'layotgan vaqtda avtoturargohlar masjid sig'imiga yarasha qanchalik keng bo'lsa shuncha muammolarning oldi olingan bo'ladi.
Masjid kelgusi yili bitkazilishi rejalashtirilmoqda. Qurilish ishlariga bosh bo'layotgan imom-xatib, masjid jamoasi, mehnat qilayotgan quruvchilar, ularga har taraflama ko'mak berib, bu savobli ishga hissasi qo'shilayotgan barcha muxlis kishilardan niyatlari va g'ayratlariga yarasha Alloh taolodan ko'plab ajrlar nasib bo'lishini tilaymiz. Inshalloh, ushbu ibodatgoh shaharga ko'rk bag'ishlab, o'z nomiga yarasha unga tashrif buyuruvchilarning ikki dunyoda baxtli va saodatli bo'lishlari uchun ma'rifiy go'sha bo'ladi.
O'zbekiston musulmonlari idorasi Masjidlar bo'limi
Saudiya Arabistoni Haj va umra vazirligi “Haj – 2026” mavsumida ziyoratchida “Nusuk” platformasidan olingan tibbiy sog‘lomlik to‘g‘risida guvohnoma bo‘lgan taqdirda unga haj vizasi berilishi haqida bayonot e’lon qildi.
Saudiya Arabistoni Sog‘liqni saqlash vazirligi haj safari bilan shug‘ullanuvchi vazirlik va idoralarga har bir ziyoratchini sinchkovlik bilan tibbiy ko‘rikdan o‘tkazish va haj safariga borish layoqatiga mos kelmaydigan kasallik bor-yo‘qligini aniqlash majburiyatini yukladi. Bu talab hojilar xavfsizligi va salomatligini ta’minlashga qaratilgan.
Haj-2026 hojilari diqqatiga:
Tibbiy ko‘riklardan o‘tmasdan va tegishli guvohnoma olmasdan haj vizasini rasmiylashtirish imkoni yo‘q.
Bayonotda, quyidagi kasalliklarga chalingan ziyoratchilar haj safariga yuborilmasligini ma’lum qildi:
Dializ talab qiladigan buyrak yetishmovchiligi;
Minimal jismoniy yuklamada ham namoyon bo‘luvchi yurak yetishmovchiligi;
Davriy yoki doimiy ravishda kisloroddan foydalanishni talab qiluvchi o‘pkaning surunkali kasalliklari;
Jigar yetishmovchiligi belgilari bilan kechuvchi jigar sirrozining og‘ir bosqichi;
Og‘ir ruhiy va nevrologik buzilishlar;
Qarilik demensiyasi kasalliklari;
Homiladorlikning oxirgi uch oyi, shuningdek, yuqori xavfga ega bo‘lgan har qanday homiladorlik;
Faol yuqumli kasalliklar (shu jumladan, silning ochiq shakli, gemorragik isitmalar va hokazo);
Kimyoterapiya yoki boshqa immunitetni susaytiruvchi muolajalardan o‘tayotgan faol onkologik kasalliklar;
Saudiya Haj vazirligining mazkur talablari buzilgan yoki yolg‘on ma’lumot berilgan taqdirda, Haj vazirligi tomonidan chora ko‘rilishi bildirilgan.
“Haj” va “Umra” tadbirlarini tashkil etish va o‘tkazish bo‘yicha Respublika jamoatchilik kengashi ziyoratchilarni ushbu talablarga to‘liq amal qilishga chaqiradi, hamda ushbu talablar haj ishtirokchilarining hayotini va salomatligini saqlashga qaratilganini ma’lum qiladi.
O‘zbekiston musulmonlari idorasi
Haj va Umra markazi