Shu yil 22 sentyabr' kuni O'zbekiston Bosh vaziri o'rinbosari, investitsiyalar va tashqi savdo vaziri S.Umurzakov videokonferentsiya shaklida Islom taraqqiyot banki (ITB) Prezidenti B.Hadjar bilan muzokara o'tkazdi.

Samimiy muloqot chog'ida tomonlar pandemiya vaqtida aholini samarali muhofaza qilish, kasallangan kishilarni o'z vaqtida davolash maqsadida O'zbekiston sog'liqni saqlash tizimini mustahkamlash va global pandemiyadan keyin iqtisodiyotni tiklash bo'yicha kelgusidagi hamkorlik masalalarini muhokama qilishdi.

ITB Prezidenti O'zbekistonda pandemiyaga qarshi kurash va makroiqtisodiy barqarorlikni saqlash bo'yicha amalga oshirilayotgan samarali strategiyaning xalqaro miqyosda tan olinishini alohida ta'kidladi.

O'z navbatida B.Hadjar ITB ixtisoslashgan klinikalar uchun tibbiyot uskuna va materiallar xaridini moliyalashtirish uchun strategik tayyorgarlik va javob choralari paketi (umumiy miqdori 2,3 milliard AQSh dollar) imkoniyatidan foydalangan holda koronavirus tarqalishiga qarshi kurashish va aholiga zarur yordam ko'rsatishda O'zbekistonni har tomonlama qo'llab-quvvatlashga tayyorligini bildirdi. Jumladan, mamlakatda o'pkani sun'iy shamollatish apparatlari ishlashi uchun markazlashtirilgan kislorod ta'minoti tizimini sotib olish uchun Paket mablag'lari bir qismini qayta yo'naltirish masalasi ko'rib chiqildi.

Shuningdek, muzokaralar davomida 2021 yilda ITB Boshqaruvchilar Kengashining 46- yillik yig'ilishini O'zbekistonda tashkil etish va o'tkazish masalalari muhokama qilindi. Ushbu tadbir xorijiy ishbilarmon doiralar va xalqaro hamjamiyat e'tiborini O'zbekistonda amalga oshirilayotgan islohot va mamlakatning yaxshilanayotgan investitsiyaviy muhitiga qaratish va ITB Guruhi bilan ko'p qirrali hamkorlikni kengaytirish imkonini beradi.

Muloqotlar yakunida barcha muhokama etilgan yo'nalishlar bo'yicha birgalikda ish olib borishni faollashtirish va ITB Boshqaruvchilar Kengashining yillik yig'ilishini O'zbekistonda o'tkazishga tayyorgarlik ko'rish doirasida yaqin hamkorlikni yo'lga qo'yish to'g'risida kelishuvga erishildi.

O'zbekiston musulmonlari idorasi matbuot xizmati