Shu kunlarda yurtimizning ayrim hududlarida hijriy 1442 yil uchun (milodiy 2020-2021 yil) mo‘ljallangan namoz vaqtlari taqvim kitobining qalbaki nusxasi tarqatilayotgani kuzatilgan.
Ta’kidlaymizki, O‘zbekiston musulmonlari idorasi ulamolari tomonidan shakllantirilgan, soha mutaxassislari va astronomiya instituti bilan muvofiqlashtirilgan haqiqiy namoz vaqtlari taqvim kitobi ayni paytda Diniy idora huzuridagi “Shamsuddinxon Boboxonov” nashriyot-matbaa ijodiy uyida chop etish jarayonidadir.

Shu yilning 20 avgust sanasidan taqvim kitobini sotuvga chiqarish rejalashtirilgan. Ushbu taqvim kitobiga Din ishlari bo‘yicha qo‘mitaning xulosasi ham olingan.

Mo‘min-musulmonlarni ogoh etamizki, namoz vaqtida farz ekanini inobatga olgan holda haqiqiy namoz vaqtlari taqvim kitobini xarid qilishingiz juda ham muhimdir. Shariatimiz ta’limotida namoz vaqtlari Quyoshning chiqishi, qiyomga kelishi va botishi holatlari bilan bog‘liqligi alohida ta’kidlangan. Diniy idora tomonidan chop etilayotgan taqvim kitobida aynan mana shu jihatlarga katta e’tibor qaratilgan.

Qalbaki taqvimdagi namoz vaqtlarining to‘g‘ri ekaniga hech kim kafolat bermaydi.

Eslatib o‘tamizki, Diniy idora tomonidan chop etilgan taqvim kitobining muqova qismida haqiqiyligini ifoda etuvchi maxsus himoya belgisi mavjuddir.

Aziz o‘quvchilar, ishonchli, mazmundor va har tomonlama sifatli taqvimni 20 avgustdan keyin respublikamizdagi barcha kitob do‘konlaridan xarid qiling.

Nashriyotning o‘zidan ham xarid qilsangiz, yanada qulay narxlarda olishingiz mumkin.

Murojaat uchun telefon: 71-240-05-19

“Shamsuddinxon Boboxonov” nashriyot-matbaa ijodiy uyi