Alloh taolo bandasini turli yo‘llar bilan sinar ekan. Birovga dard berib, boshqa birovning moliga, joniga va shunga o‘xshash turli usullari bilan sinovdan o‘tkazar ekan.

Yaqinda poytaxtimizning “Hazrati Imom” masjidi ro‘parasi – Qorasaroy ko‘chasi 248-xonadonga ham Allohning buyuk sinovi kelib, ushbu xonadonning kichkina oshxonasidan tashqari barcha uylari yong‘indan kul bo‘lgandi.

Ushbu holatdan xabardor bo‘lgan Diniy idora rahbariyatining tavsiyasi bilan homiylik xayriyasi uyushtirildi.

Saxovatpesha xalqimiz, Toshkent shahri imomlarining sa’y-harakatlari bilan, bugun ushbu xonadonga 90 000 000 so‘mdan ziyod xayriya mablag‘lari topshirilib, musibatzadalarning duoi-xayrlari odindi.

 Alloh taolo elimizni, yurtimizni turli balo-ofatlardan O‘zi asrasin.

Muhammadnazar Qayumov

O‘zbekiston musulmonlari idorasi Masjidlar bo‘limi mudiri