So‘nggi vaqtlarda ayrim “shovvoz” turfirmalar SOXTA umra vizasini rasmiylashtirib, Saudiya Arabistoni viza nizomiga zid ravishda O‘zbekiston fuqarolarini Saudiyaga kiritishga urinmoqda.

2019 yil 26 noyabr kuni Andijon viloyatida joylashgan turistik firmalardan biri tomonidan Jidda shahriga borgan 14 nafar o‘zbekistonlik vatandoshimizning vizasi qalbaki bo‘lib chiqdi.

Ushbu turfirma 14 nafar yurtdoshimizga qalbaki vizalarni rasmiylashtirgan va Saudiya Arabistoniga yuborgan. Saudiya Arabistoni chegara xizmatining ma’lum qilishicha, ularning vizasi bekor qilinib, mamlakatga kiritilmasdan deportatsiya qilindi.

Saudiya aeroportida zahmat va mashaqqat chekib, ko‘z yosh to‘kkan yurtdoshlarimizning hasratlari aks etgan foto va videolavhalar Din ishlari bo‘yicha qo‘mitaga taqdim etilgan.

Jidda shahridagi Bosh konsulxona va “O‘zbekiston havo yo‘llari” AKning Saudiyadagi vakillari bilan hamkorlikda holat yuzasidan barcha zaruriy tashkiliy tadbirlar amalga oshirilib, 27 noyabr kuni “Jidda-Toshkent” aviaqatnovi bilan yuqoridagi 14 nafar fuqaro O‘zbekistonga qaytarildi.

Hurmatli yurtdoshlar! Unutmang, biz ibodatlaringiz mukammal, safaringiz xavfsiz va xotirjam bo‘lishi tarafdorimiz. O‘z navbatida, sizdan turli firibgarlar aldoviga uchmasdan, hukumat tomonidan tashkil etilayotgan rasmiy, xavfsiz va ishonchli “Umra ziyorati”dan foydalanishingizni tavsiya etamiz!

Din ishlari bo‘yicha qo‘mita