14 noyabr kuni Toshkent shahridagi “Shayx Muhammad Sodiq Muhammad Yusuf” jome masjidida otinoyilar uchun chop etilgan qo‘llanmalar taqdimoti bo‘lib o‘tdi. Tabdir Qur’oni karim tilovati bilan boshlandi.
Taqdimotda O‘zbekiston musulmonlari idorasi Kotibiyati mudiri Muhammad Ayubxon domla Homidov, mas’ul xodim Maryam Abdullayeva va Din ishlari bo‘yicha qo‘mita Xotin-qizlar bilan ishlash bo‘limi mudirasi Farida Abdurahimova hamda “Xadichai Kubro” bilim yurti mudarrisasi Odinaxon Muhammad Yusuf o‘z ma’ruzalari bilan ishtirok etdi.
Ushbu qo‘llanmalar “Qur’on saboqlari”, “Hadis”, “Aqiyda”, “Fiqh”, “Siyrat”, “Janoza” kitoblaridan iborat. Tadbirda otinoyilar uchun taqdim etilayotgan 6 ta qo‘llanmaning har biri haqida mualliflarning fikrlari tinglandi.
“Qur’on saboqlari” kitobi bo‘yicha Xadichai Kubro o‘rta maxsus islom ta’lim muassasasi o‘qituvchisi Gulobod Qurbonova, “Hadis” kitobi haqida “Hilol-nashr” nashriyoti muharriri Barno Saidrahmon, “Aqiyda” kitobi bo‘yicha Xadichai Kubro o‘rta maxsus islom ta’lim muassasasi katta o‘qituvchisi Odina Saidahmedova, “Fiqh” kitobining mazmun-mohiyati hakida Xadichai Kubro ta’lim muassasasi o‘qituvchisi Poshshaxon Eshonxon qizi, “Siyrat”– kitobi haqida Xadichai Kubro o‘rta maxsus islom ta’lim muassasasi mudirasi Nozima Ibragimova, “Janoza” kitobi haqida ustoz Rohila Xayrullayeva so‘zlab berdilar.
Xalqimizning Qur’oni karimga bo‘lgan ehtiyojini ta’minlash hamda siyrat, fiqh, aqoid masalalari, janoza odoblari borasidagi ushbu kitoblar otinoyilarimiz uchun eng kerakli qo‘llanma bo‘lib xizmat qiladi.

O‘zbekiston musulmonlari idorasi Matbuot xizmati