Rasululloh sollallohu alayhi vasallam shunday dedilar:

«Burni yerga ishqalansin! Burni yerga ishqalansin! So‘ngra yana burni yerga ishqalansin!

Aytildi: «Kim, yo Rasululloh?»

U zot dedilar: «Kim ota-onasini keksalik paytlarida birlarini yoki har ikkovlarini topsayu, so‘ng jannatga kirmagan bo‘lsa».

Imom Muslim rivoyat qilganlar.

Bu duoibadni Alloh taoloning eng sevikli, eng erka, eng ulug‘ bandasi, eng afzal Payg‘ambari qilyaptilar. Allohning fazli bilan u zot alayhissalomning duolari ijobat bo‘lmay qolmaydi. Shunday ekan, hushyor bo‘laylik!

Imom Ahmad rahimahulloh «Ota-onaga yaxshilik qilish kabira gunohlarga kafforot bo‘ladi» deganlar.

Ota-onamizga yaxshilik qilishimiz bizga olamlar Robbi tomonidan buyurilganini, shuningdek, bu yaxshilik, bu xizmat jannatning kalitlaridan biri hamda gunohlarimizga kafforot ekanini esimizdan chiqarmaylik!

Har birimiz Robbimizning amriga itoat qilib, gunohlarimiz kechirilib, Jannatga kirishni istaymiz.

Alloh taolo bizni ota-onamizga yaxshilik qilishda bardavom bo‘lishimizni nasib etib, dunyo va oxiratda xor bo‘lishimizdan asrasin!

Internet ma’lumotlari asosida Nozimjon Hoshimjon tayyorladi