Ispaniyaning Kordova viloyati Almodovar-del-Rio shahriga o‘tgan asrning 90-yillarida musulmonlar ko‘chib kela boshladi – bular, asosan, Islomni qabul qilgan ispanlardir. Shunday qilib, bu yerda 20 yildan ortiqroq muddat davomida musulmonlar istiqomat qiladi va musulmonlar jamoasi faol ish olib boradi, deya yozadi suffagah.com sayti.

O‘tgan asrning 80-yillarida Ispaniyada demokratiyaning rivojlanishi natijasida Islomni qabul qilgan ilk ispanlar paydo bo‘la boshladi. Yangi musulmonlar Sociedad para el retorno del Islam en Espana (Ispaniyaga Islomning qaytishini xohlovchilar jamiyati) tashkilotini tuzishdi. 1989 yilda Ispaniyada e’tiqod erkinligi to‘g‘risida qonun qabul qilingandan so‘ng, Islom “Ispaniyada tan olingan, chuqur ildizlarga ega bo‘lgan” din sifatida e’tirof etildi.

Yangi musulmon bo‘lganlar Granadada “Islom kengashi”ni tashkil etishdi. Keyin uning a’zolari Almodovar-del-Rioga ko‘chib o‘tishdi. U yerda jamiyat mana 20 yildirki muvaffaqiyatli faoliyatini olib bormoqda.

“Islom kengashi”ning asoschisi psixiatr Mansur Eskudero shaharda “Dorussalom” masjidini ochdi. Mana 20 yildirki ushbu masjid “Islom kengashi”, Halol instituti va nashriyot markazining manzilgohi hisoblanadi. Har juma “Dorussalom” masjidiga nafaqat bu shahardan, balki boshqa joylardan ham musulmonlar namozga kelishadi. Mahalliy hokimiyat musulmonlar uchun alohida qabriston uchun joy ajratdi.

Hozirgi kunda Ispaniyada milliondan ortiq musulmonlar istiqomat qiladi.

Manba: http://fitrat.uz