O‘zbekiston islom sivilizatsiyasi markazi haqidagi yuqoridagi savollarga Xalqaro Press-klubda spiker sifatida qatnashayotgan Islom sivilizatsiyasi markazi direktori Shoazim Minovarov javob berdi.

Sh.Minovarovning ta’kidlashicha, markaz 20 ga yaqin turdosh markaz bilan ilmiy aloqada bo‘ladi.

Shuningdek, markazning o‘z axborotnomasi mavjud bo‘lib, u xalqaro me’yorlarga asoslanadi. Islom sivilizatsiya markazi Misrning Al-Azhar universiteti bilan ham onlayn tarzda ilmiy muhokamalar olib boradi.

Markazning o‘z rasmiy sayti tashkil etiladi. Sayt avvalo arab tilida va boshqa tillarda ham ishlab turadi.

Sh.Minovarovning aytishicha, xalqaro aloqalar Islom sivilizatsiyasi markazining asosiy maqsadlaridan biri bo‘ladi va u xalqaro ilmiy jamoatchilik markazidagi ilm dargohi bo‘lishi kutilmoqda.

Samarqand va Termizdagi islom markazlaridan farqi shundaki, Islom sivilizatsiyasi markazida ilmiy tekshirish laboratoriyalari, ko‘rgazmalar majmui tashkil etiladi. Markazda III asrdan boshlab hozirgacha millatimiz yaratgan asarlar o‘rin oladi. Soha bo‘yicha tahsil olayotgan magistrlar ilmiy ishlarini olib boruvchi tadqiqot xonalari quriladi. Bir so‘z bilan aytganda, Islom sivilizatsiyasi markaziga kirgan inson islom dini haqidagi tasavvurlarini boyitadi.

O‘zbekiston musulmonlari idorasi Matbuot xizmati