Bugun, 14 mart kuni O‘zbekiston musulmonlari idorasi raisi, muftiy Usmonxon Alimov hazratlari Tataristondagi xizmat safarlari davomida Qozon universiteti bilan yaqindan tanishdilar va universitet rektori Ilshat Gafurov janoblari, professor o‘qituvchilar bilan samimiy muloqotlar o‘tkazdilar.
Rektor Ilshat Gafurov Qozon universiteti tarixi, faoliyati, ta’lim-tarbiya jarayonlarini olib borish yo‘nalishlari, o‘quv xonalari, kutubxona fondi va auditoriyalarda dars o‘tish uslublari to‘g‘risida o‘zbekistonlik mehmonlarga so‘zlab berdi.
Ma’lumot o‘rnida, Qozon universiteti – Rossiyaning eng keksa universitetlaridan biri. 1804 yilda Aleksandr I Qozon imperatorlik universiteti tasdiq yorlig‘i va uning Ustavini imzolagan. Oliy o‘quv yurti 200 yildan ortiq tarixi davomida saksondan ortiq mamlakat Fanlar Akademiyasining haqiqiy va muxbir a’zolarini yetishtirib bergan.
Tomonlar uchrashuvlar davomida bir-birlariga esdalik sovg‘alari taqdim etdilar va hamkorlik aloqalarini yo‘lga qo‘yish bo‘yicha hujjatlar imzoladilar.

O‘zbekiston musulmonlari idorasi Matbuot xizmati