BAAning Abu Dabi shahrida 2 dekabr kuni Shayx Zayid nomidagi Abu Dabi madaniy meroslar festivali boshlandi. Festivalda eng kombinatsiyalashgan o‘zbek paviloniga tashrif buyurgan turistlar soni ko‘pchilikni tashkil etmoqda.
Festivaldagi O‘zbek paviloni Registon maydoni shaklida qurilgan. Yon-atrofidagi hujralarda hunarmandchilik, naqsh o‘ymakorligi, gilamdo‘zlik, so‘zana tikish san’ati kabi o‘zbek milliy madaniy meroslari ekspozitsiyalari, miniatyura rassomlari o‘rin egallagan. Turistlar o‘zbek amaliy san’ati namunalarini qiziqish bilan tomosha qilishmoqda.
Festivalning ochilish marosimida sozandalar o‘zbek milliy cholg‘ulari: karnay, surnay, doira va nog‘ora bilan musiqiy kompozitsiyalarni ijro etishdi. Tashrif buyuruvchilar o‘zbek maqomchilari ijrosida “Tanovar”ni tinglashdi.
Pavilonda o‘zbek oshxonasi, meva va sabzavot mahsulotlari ham namoyish qilindi.
“Abu Dabi festivalidagi pavilonlar 2018 yil Shahrisabzda o‘tkazilgan Xalqaro maqom san’ati forumidagi har bir viloyat uchun alohida tiklangan pavilonlarni yodga soladi, – deydi o‘zbek delegatsiyasi vakillaridan biri Sardor Babayev. – Maqom festivalida 14 ta pavilon 14 ta hududning o‘ziga xos madaniyati, san’ati va an’analarini namoyon etgan bo‘lsa, Abu Dabi festivalida o‘sha pavilonlar yaxlit bir holda, O‘zbekiston madaniyati va san’atini dunyoga tanishtirmoqda”. Madaniy meroslar festivali 26 yanvargacha davom etadi.


O‘zbekiston musulmonlari idorasi Matbuot xizmati
Bugun, 23 dekabr kuni O‘zbekiston musulmonlari idorasi raisi, muftiy Shayx Nuriddin Xoliqnazar hazratlari va Din ishlari bo‘yicha qo‘mita raisi Sodiqjon Toshboyev Saudiya Arabistonining mamlakatimizdagi elchisi Yusuf al-Utaybiyni qabul qildilar.
Muloqot chog‘ida ikki davlat rahbarlarining do‘stona munosabatlari tufayli O‘zbekiston va Saudiya Arabistoni aloqalari tarixiy davrga qadam qo‘ygani, ayniqsa, mana shunday iliq munosabatlar natijasida oliy darajadagi muloqotlar, tashriflar, kelishuvlar amalga oshirilgani, ko‘p qirrali hamkorlik va keng ko‘lamli sheriklik kengaygani, shuningdek, qo‘shma korxonalar soni ortgani va ikki davlat o‘rtasidagi aviaqatnovlar ko‘paygani ta’kidlandi.
Ayniqsa, diniy-ma’rifiy sohadagi hamkorlik yangi bosqichga ko‘tarilgani, xususan, haj va umra tadbirlari namunali tarzda tashkil etilayotgani, keng ko‘lamli xayriya tadbirlari va ijtimoiy loyihalar muvaffaqiyatli yo‘lga qo‘yilgani, xalqaro anjuman va ko‘rgazmalarda ikki tomonlama faol ishtirok va hamkorlik qilinayotgani kabi jihatlarga urg‘u qaratildi.
Tomonlar haj-umra, ziyorat turizmi, ilmiy-tadqiqot, tajriba almashish va diniy-ma’rifiy sohalarda o‘zaro hamkorlikni yanada rivojlantirishga kelishib oldilar.
O‘zbekiston musulmonlari idorasi
Matbuot xizmati