Quyida keltiriladigan fikrlar, hikmatlar ijtimoiy tarmoqlardagi turli sahifalardan olib tarjima qilingan. Bundan tashqari sahobai kiromlar, ulug‘ olimlar, Yaqin Sharq, Osiyo, Yevropa va Amerika mutafakkirlarining bir qator fikrlari ham berilgan. 

*****

Dunyo o‘tish joyidir, doimiy yashash joyi emas. Modomiki, boshqalarga yaxshilik yetishini orzu qilar ekansan, demak, yaxshilikdasan. Go‘zal niyatli bo‘lishga haris bo‘l! Chunki, go‘zal niyat qilish ham savob deb yoziladi. Bas, niyatlaringizga qarab rizqlanasizlar.

«Xovatir roqiya jurnali»

*****

Ey Robbim! Qalblarimizni nifoqdan, amallarimizni riyodan, tillarimizni yolg‘ondan, ko‘zlarimizni xiyonatdan poklagin! Zero, Sen ko‘zlarning xiyonatini va qalblar yashirgan narsani bilasan.

 *****

Kim havoyi nafsni ulfat qilib olsa, qulaydi.

Kim taqvoni ulfat qilib olsa, yuksaladi.

 *****

«Agar insonlarning qalblarini ko‘rishga imkoningiz bo‘lganda, har bir qalbda og‘riqli qissa borligini ko‘rgan bo‘lardingiz. Shunday ekan, bir-birimizga nisbatan rahmli bo‘laylik! Shoyadki, Alloh taolo bizga ham rahm qilsa!»

*****

«Ixtiro qildi» emas, «Kashf qildi» deyiladi! Inson hech qachon biror narsani yaratolmaydi, ya’ni yo‘qdan bor qilolmaydi, hosil qilolmaydi! Balki, bor narsani kashf qilishi, ya’ni bor narsadan hosil qilishi mumkin.

*****

«Falonchining shogirdiman» deyishning o‘zi bilan shogird bo‘lib qolinmaydi. Avvalo, ustozning go‘zal xulqi, odobi, ilmi o‘zlashtiriladi va qoldirgan ilmiy merosiga, ko‘rsatmalariga amal qilishda bardavom bo‘linadi. Qolaversa, o‘sha olim ham uni shogirdim, deb bilishi kerak. «Falonchining shogirdiman» degan gapni brend kabi qilib olmaslik lozim. Biror olim bilan ko‘p birga bo‘lgan, hatto bir uyda ko‘p yil birga istiqomat qilgan insonlar bor bo‘ladi, lekin o‘zlarini hadeb shogirdiman, shogirdiman deb ko‘z-ko‘z qilverishmaydi.

*****

Qiyinchilik haqida gapiradilar va og‘riqlar to‘g‘risida yozadilar. Hatto botiniy aqllari mahzunlik uchun dastur ishlab chiqadi.

Ofiyat ne’matini anglamoqchi bo‘lsang, shifoxonaga bor.

Hurriyat ne’matini anglamoqchi bo‘lsang, qamoqxonaga bor.

Hayot ne’matini anglamoqchi bo‘lsang, qabristonga bor.

Mazkur joylardagi kishilarga nisbatan sening mahzunligingning vazni qancha?!

Ey Robbim! Ne’matlaring uchun O‘zingga hamd bo‘lsin!

 *****

— Agar Alloh taolo bandasini yaxshi ko‘rsa, nima qiladi?

— Xato qilgan paytda uni istig‘for aytishga ilhomlantirib qo‘yadi.

*****

Qabrga Munkar va Nakirning qo‘rqinchli suratda kirishi mayyitning azoblanishiga kifoya qiladi. (Qabrdagi boshqa azoblar gapirilmayapti.)

*****

Umar roziyallohu anhu yaxshilik qilishda Abu Bakr roziyallohu anhuga yetolmadilar, lekin qolgan barchadan o‘zib ketdilar. Yaxshilik qilishdan to‘xtamaylik!

*****

— Yoshingiz nechchida?

— Sog‘lig‘im joyida.

— Pulingiz bormi?

— Qarzim yo‘q.

«Xovatir roqiya jurnali»

***** 

Rasululloh sollallohu alayhi vasallam Allohning elchisi bo‘la turib tavoze’li holda yashadilar va shunday holda vafot etdilar.

Biz kim bo‘libmiz takabburlik qilgani?!

*****

Ey Robbim! Ko‘zlarimizni uyqudan uyg‘otganingdek, qalbimizni g‘aflatdan uyg‘ot!

***** 

Internet materiallaridan to‘plab, tarjima qiluvchi

Nozimjon Iminjonov