Oysha roziyallohu anhodan rivoyat qilinadi. Rasululloh sollallohu alayhi vasallam “Albatta, Alloh sizlardan biringiz ish qilganda uni yaxshilab qilishini sevadi”, dedilar (Imom Bayhaqiy rivoyati).

Musulmon har ishni puxta, chiroyli va mukammal qilishi lozim. Chala, sifatsiz, “bizdan ketguncha, egasiga yetguncha” qabilida ish qilish musulmon insonga mutlaqo munosib emas. Sifatsiz ish qilgan odam o‘zicha oz ish qilib, ko‘p narsa topganga o‘xshaydi.

Aslida esa u o‘ziga zarar qilgan bo‘ladi. O‘zi bajarmagan ishini bajargan qilib ko‘rsatish, sifatsiz ishini sifatli ish sifatida taqdim etish, xom-ashyoning arzonini ishlatib, qimmatidan foydalanganini da’vo qilish kabilar yolg‘onchilik, munofiqlik hisoblanadi. Bular “qo‘shib yozish”, “qalloblik” kabi nomlar bilan ham hammamizga tanish.

Ishdagi bu nuqsonlarni davlat, xalqaro tashkilot va shirkatlar, xususiy shirkat va shaxslar qo‘lida ish bajaryotganlar sodir etishadi. Bunga mas’ul hisobchilarning bajarilmagan rejaning ortig‘i bilan bajarilgani haqida hisobot tayyorlashlaridan tortib, suvoqchi ustaning suvalgan devorning o‘lchoviga yo‘q narsani qo‘shib haq olishigacha misol keltirish mumkin. Bunday ko‘zbo‘yamachiliklar amalga oshirilayotgan paytda oson ko‘rinsa ham, aslida koni zarardir. Bu dunyoda ham, oxiratda ham sharmandalikdir.

Shuning uchun Rasululloh sollallohu alayhi vasallam bundan qaytarganlar. Abu Hurayra roziyallohu anhudan rivoyat qilinadi: Nabiy sollallohu alayhi vasallam: “Kim bizga nisbatan aldamchilik qilsa, bizdan emas”, dedilar.

“Halol kasb-hunar – qut-baraka keltirar” kitobidan