1. Eng yaxshi duo – arafakunidagi duo. Nabiy sollallohu alayhi vasallam: “Duoning eng yaxshisi arafa kunidagi duodir. Men va mendan oldingi Payg'ambarlar aytgan so'zning eng yaxshisi — “Laa ilaaha illallohu vahdahu laa shariyka lah. Lahul mulku va lahul hamdu va huva 'alaa kulli shayˋin qodiyr”dir”.

Ma'nosi: Allohdan boshqa iloh yo'q, U yolg'iz, Uning sherigi ham yo'q, butun mulk Uniki, hamd ham Unga xos va U har bir narsaga qodirdir.

1. Arafa kuni odamlar do'zaxdan ozod bo'ladi. Nabiy sollallohu alayhi vasallam aytdilar: “Arafa kuni Alloh bandalarni do'zaxdan ko'p ozod qilganchalik boshqa biror kun yo'q!”(Imom Muslim rivoyati).

Allohim! Bizlarni, ota-onalarimizni, farzandlarimizni, ayollarimizni, do'stlarimizni va barcha mo'min-musulmonlarni jahannam olovidan asra!

1. Arafa kunining bomdod namozidan boshlab takbir aytiladi. “Allohu akbar! Allohu akbar! Allohu akbar! Laa ilaaha illallohu vallohu akbar! Allohu akbar va lillaahil hamd”.

1. Arafa kuni tutilgan ro'za ikki yillik gunohlarga kafforat bo'ladi. Rasululloh sollallohu alayhi vasallam: “Arafa kunining ro'zasi undan oldingi va undan keyingi yillardagi gunohlarga kafforat bo'ladi deb Allohdan umid qilaman”, dedilar (Imom Muslim rivoyati).

G'aflatda qolmang! Arafa kuni ro'zasini tutishni o'tkazib yubormang! Buni boshqalarga ham eslating. Ehtimol siz sababli boshqalar ham ro'za tutar.

Davron NURMUHAMMAD