Har yili Haj mavsumining boshlanishi mo'min-musulmonlar uchun katta shodiyona bo'ladi. Yer yuzining har bir go'shasidan zimmasiga haj ibodati farz bo'lgan insonlar katta ishtiyoq va muhabbat bilan Makkai mukarramaga qarab yo'l oladilar. Yaratganning marhamati bilan biz ham ona yurtimizdan bir guruh ziyoratchilarga ellikboshi etib yuborildik. Ayni kunlarda yo'ldoshlarimizning xizmatida bardavom bo'lib turibmiz.

Mohiyatan haj – mashaqqat. Ana shuni hisobga olgan Davlatimiz rahbariyati qulay imkoniyatdan foydalanib qolish – minglab hajga borayotgan yurtdoshlarimizning og'irini engil qilib, buning evaziga chandon-chandon savoblarga ega bo'lish maqsadida, birinchi  o'rinda hajning kvotasini yildan yilga oshirib bormoqda. Jumladan, Vatanimizdan 2019 yil 7200 nafar, 2022 yil 12000 nafar yurtdoshimiz haj amalini bajarib qaytdi. Joriy yilda esa hojilarimiz soni 15000 taga etishi kutilmoqda.

Undan keyin esa musofir yurtga hajni niyat qilib kelgan yurtdoshlarimizning istiqomatining sifati yaxshilandi. Bilasiz, hajga keluvchilarning aksari nuroniy otaxonlaru munisa onaxonlar bo'ladi. Ularning har biri e'tiborga, parvarishga muhtoj bo'lishi yosh bilan bog'liq tabiiy hol, albatta. 

Masalaning ana shu jihatini hisobga olgan Diniy Qo'mitamiz raisi Sodiqjon Toshboyev, O'zbekiston musulmonlari idorasi raisining birinchi o'rinbosari Homidjon domla Ishmatbekov, Muftiy hazratning o'rinbosari Jaloliddin Hamroqulov va boshqa ulug'larimiz ziyoratchilarimizning har birining hol-ahvolidan xabardor bo'lib, ularga zarur bo'lgan barcha sharoitlarni hozirlashga bosh-qosh bo'lib turibdilar. Ayniqsa, bu borada poytaxtliklarning mingboshisi – Toshkent shahar bosh imom-xatibi Abduqahhor Yunusov, ishchi guruh tarkibidagi Alisher Soatov boshchiligidagi malakali shifokorlar, mahoratli oshpazlar, ellikboshilar hojilarimizga astoydil xizmat qilmoqdalar.

Muzaffarxon A_''ZAM,

 Toshkent shahridagi“Pulemas ota” masjidi  imom-xatibi