2022-2023 o'quv yilida Imom Buxoriy nomidagi Toshkent islom institutini 76 nafar talaba bitirmoqda. Shundan 10 nafari ayol-qizlar hisoblanadi. Bitiruvchilar bakalavr darajasini olishlari uchun diplom mavzularini tanlab, yil davomida kichik ilmiy tadqiqot olib borishdi.

Bitiruv malakaviy ishi himoyalari kunduzgi ta'lim yo'nalishi 4-kurs talabalari uchun bo'yicha shu yil 12-24 iyun' kunlari o'tkaziladi. Shuningdek, kunduzgi ta'lim shakli 4-kurs talabalari uchun “Umumkasbiy fanlar – arab tili” va “Ixtisoslik fanlari – aqoid va fiqh” bo'yicha yakuniy attestatsiya sinovlari 6-9 iyun' kunlari bo'lib o'tadi.

Aqoid va fihqiy fanlar, Hadis va islom tarixi fanlari, Tillar, Tahfizul Qur'on va Ijtimoiy fanlar kafedrasi professor-o'qituvchilari tomonidan o'z yo'nalishlariga oid tavsiya etilgan mavzular bo'yicha talabalar bitiruv diplom ishlarini bajardi.

Bu haqda institut prorektori Soatmurod domla Primov va Ilmiy tadqiqot bo'limi boshlig'i Ma'murjon Erkayev tomonidan 4-kurs talabalarining Bitiruv diplom ishlariga bag'ishlangan yig'ilishda aytib o'tildi. Unda, shuningdek, bitiruv diplom ishlarining holati, rasmiylashtirilishi, old himoya natijalari va hulosalar, e'lon qilingan ilmiy maqolalar kabi masalalar muhokama qilindi.

O'zbekiston musulmonlari idorasi
Matbuot xizmati