Aziz Qur’on muxlislari bugun, 1 fevral kuni Andijon viloyatining bir necha tumanlarida Qur’on musobaqasining hududiy bosqichlariga oq fotiha beriladi. Ushbu viloyatdagi musobaqalar juda ham o‘zgacha fayzu tarovatda bo‘lib o‘tishi kutilmoqda. Sababi yurtimizdagi eng mashhur qorilar aynan Andijon zaminidan yetishib chiqqan. Qur’on musobaqasini bezab turgan Hasanxon qori, Ismoil qori, Abdulbosit qori, Avaz qori va Muhiddin qori kabi ziynat qorilar mana shu o‘lka farzandlaridir.
Qur’on musobaqasi sabab elimiz qalbiga nur kirib keldi. Zero, Alloh taolo shunday marhamat qiladi: “... Biz Qur’onni shunday nur qildikki, u bilan bandalarimizdan Biz xohlagan kishilarni hidoyat qilurmiz...» (Sho‘ro surasi, 52-oyatidan).
Shubhasiz, Qur’on sabab kishilarimiz hidoyat topmoqda. Barcha holatlarimizda hojatbarorimiz bo‘lgan Alloh taolo Qur’on ila bizni to‘g‘ri yo‘lga boshlamoqda. Mana shu sababidan yurtimizga Allohning rahmati va nuri yog‘ilmoqda, desak sira mubolag‘a bo‘lmaydi.
Aziz Qur’on muxlislari, bugun sizlar bilan Andijonda bo‘lib o‘tadigan musobaqalarni birga-birga kuzatib boramiz. Nafaqat vodiyda balki butun O‘zbekistonda qorilar tayyorlashda yetakchilik qiladigan Andijon viloyatida juda ham ko‘p qori va qoriyalar ro‘yxatdan o‘tganki, ularning soni ilk yildayoq 1182 nafarni tashkil etdi. Shuningdek, ayni daqiqadarda viloyatda musobaqaga juda ham katta tayyorgarlik ishlari nihoyasiga yetkazilmoqda.
Muhtaram Qur’on ixlosmandlari, bugun Andijon shahridagi “Andijon” to‘yxonasi, Andijon viloyat vakilligi binosi, Oltinko‘l tumani “Oltinko‘l” jome masjidi, Izbosgan tumani “Ahmadali hoji” jome masjidi, Asaka tumani “Xolid ibn Valid” jome masjidi, Shahrixon tumani “Namozgoh” jome masjidi, Xo‘jaobod tumani “Yetti chinor” jome masjidi, Qo‘rg‘ontepa tumani “Ramazon qori” jome masjidida musobaqaning hududiy bosqichlari boshlanadi. Viloyatdagi musobaqa jadvali ilova qilinadi.
Qur’onga muhabbatli insonlarni mana shunday shukuhli lahzalarni jonli kuzatib borishga chaqiramiz, bizni kuzatishda davom eting.
O‘zbekiston musulmonlari idorasi Matbuot xizmati
Bismillahir Rohmanir Rohiym.
Alloh taologa bitmas-tuganmas hamdu sanolar bo‘lsin.
Payg‘ambarimizga mukammal va batamom salavotu durudlar bo‘lsin.
Sayyid Sulaymon Nadaviy rahmatullohi alayhning ilm va fazllari mashhur bo‘layotgan va shuhrat qozonayotgan edi. U kishi o‘zlarining voqealarini quyidagicha so‘zlab beradilar: «Men «Siyratun-Nabiy sollallohu alayhi vasallam» kitobini olti jild qilib tamomladim. «Muhtaram Zotning siyratlaridagi biror jilva yoki ko‘rinish mening hayotimda ham bo‘lganmi yoki yo‘q? Agar bo‘lmagan bo‘lsa, u holda qanday bo‘ladi?» degan o‘y qayta-qayta qalbimda tinchlik bermas edi. Shu maqsad uchun Allohning biror valiysini qidirdim.
Thana Bhavandagi xonaqohda yashaydigan va Alloh taolo fayzlarini taratib qo‘ygan Mavlono Ashraf Ali Tahonaviy hazratlari haqida eshitgan edim. Shunday qilib, bir kuni Thana Bhavanga borishni niyat qildim va safarga chiqdim. Borib, hazrat bilan ko‘rishdim va bir necha kun u yerda turdim. Ortga qaytayotganimda hazrat Tahonaviy rahmatullohi alayhga: «Hazrat! Biror nasihat qiling», dedim. U zotning xayollariga o‘sha payt: «Shunday katta allomaga nima nasihat qilaman? Ilm va fazli butun dunyoga mashhur bo‘lsa», degan o‘y kelibdi. Keyin: «Ey Alloh! Qalbimga uning uchun ham foydali bo‘lgan va mening uchun ham foydali bo‘lgan narsani sol», deb duo qilibdi. Shundan keyin hazrat Tahonaviy rahmatullohi alayh Sayyid Sulaymon Nadaviy rahmatullohi alayhga xitob qilib: «Ey birodar! Bizning yo‘limizda boshidan oxirigacha o‘zingizni xokisor tutishingiz kerak», debdilar.
Sayyid Sulaymon Nadaviy rahmatullohi alayh aytadilar: «Hazrat Tahonaviy rahmatullohi alayh bu so‘zlarni aytayotganlarida qo‘llarini ko‘ksilariga olib borib, past tarafiga bir zarba berdilar, zarba xuddi mening qalbimga tushgandek bo‘ldi».
Hazratimiz Doktor Abdulhay rahmatullohi alayh aytadilar: «Bu voqeadan keyin Sayyid Sulaymon Nadaviy rahmatullohi alayh o‘zlarini shunday xokisor tutdilarki, uning misli topilishi qiyin edi. Bir kuni qarasam, xonaqohning tashqarisida hazrat Sayyid Sulaymon Nadaviy rahmatullohi alayh majlisga kelganlarning oyoq kiyimlarini tartiblayotgan ekanlar. Shunday tavoze’ va muhabbatni Alloh taolo u kishining qalbida paydo qildi va keyin yuksak darajalarga ko‘tarib qo‘ydi».
«Nasihatlar guldastasi» kitobidan