Rasululloh sallallohu alayhi vasallam marhamat qiladilarki: 

“Mo‘min barcha insonlarning ishonchli kishisidir”. 

“Mo‘min mo‘minning ko‘zgusidir. Va mo‘min mo‘minni orqasidan ham himoya qiladigan va uni qo‘llab quvvatlaydigan birodaridir”.

“Mo‘minlar bir-biriga yopishgan imorat kabidir”.

“Mo‘min kishi do‘st bo‘ladi va do‘st tutiladi. Do‘stlasha olmaydigan va do‘st tutilmaydigan kishida xayr-yaxshilik yo‘qdir. Insonlarning xayrlisi insonlarga foydasi tegadiganidir”. 

“Mo‘min kishi g‘ayratli-rashkli bo‘ladi. Alloh taolo esa eng g‘ayratli- rashklidir”. 

“Mo‘min kishi juda zakovatli, qobiliyatli, ziyrak va hushyordir”. 

“Mo‘min gunohiga tavba qilguvchidir”.

“Mo‘min banda ikki xavf o‘rtasidadir. Birinchisi: o‘tgan gunohlaridan qo‘rqadiki, ularni Alloh nima qilganini bilmaydi. Ikkinchisi: umrining qolgan qismida boshiga nima halokatlar kelishini bilmaydi”.

“Mo‘minning yelkasi yumshoq bo‘ladi, birodariga kenglik qiladi, munofiq esa to‘ngdir, birodariga tanglik qiladi. Mo‘min avval salom beradi, munofiq esa menga salom bersin deb turaveradi”. 

“Haqiqiy mo‘min birovga og‘irligi tushmaydigan kishidir”. 

“Insonlar mollari va jonlarini ishonib topshiradigan kishi haqiqiy mo‘mindir”. 

“Insonlarga aralashib yuradigan va ularning aziyatlariga sabr qiladigan mo‘min kishi, odamlarga aralashmaydigan va ularning aziyatlariga sabr qilmaydigan mo‘min kishidan afzalroqdir”.

Davron NURMUHAMMAD

tayyorladi