Og‘ir kunlarda doimo bir-biriga yelkadosh bo‘lgan xalqimiz shu kunlarda Qozog‘istonda ro‘y bergan fojiadan halok bo‘lgan hamyurtlarimiz oila a’zolari va yaqinlariga hamdardlik bildirib, ta’ziya bildirishda davom etishmoqda. Hatto qo‘shni va olis viloyatlardan ham kelib, bunday qayg‘uli kunlarida sherik ekanlarini izhor qilishmoqda. Savobli ishlarda peshqadam bo‘lgan imom-xatiblarimiz bu ishda ham ibrat bo‘lishmoqda. Zero, mo‘min-musulmonlar og‘a-ini ekanlari Qur’oni karimda ta’kidlangan: “Albatta, mo‘minlar dinda o‘zaro birodardirlar...” (Hujurot, 10).
Mana shu xitobni o‘zlariga shior qilgan Toshkent viloyati imom-xatiblari bosh imom-xatib Xayrullo Turmatov boshchiligida fojiada qurbon bo‘lganlarga hamdardlik bildirish uchun kecha, 22 yanvar kuni Namangan viloyatiga borishdi. Viloyatdagi har bir xonadonga kirib, mash’um fojiada halok bo‘lganlarning haqlariga tilovati Qur’on o‘qib, duolar qilindi. Dinimizda biror fojia bilan vafot etgan mo‘minning darajasi yuqori bo‘lishi, Payg‘ambarimiz sollallohu alayhi va sallam hadislarining birida kishi suvga g‘arq bo‘lib, o‘tda kuyib, tom ostida qolib, ayol kishi tulg‘oq paytida vafot etsa, shahidlik maqomini topishini aytib, musibat egalariga tasalli berildi.
Imom-domlalar Yaratgan Parvardigordan halok bo‘lganlarning solih amallarini o‘zlariga hamroh qilishini, gunohlarini mag‘firat etishini, yotgan joylarini jannat bog‘laridan bir bog‘ qilishini iltijo qilib so‘rashdi. Ularning oila a’zolari va yaqinlarining musibatlariga sherik ekanlarini bildirib, sabru jamil tilashdi.
O‘z navbatida musibat egalari hamdardlik izhor qilinganidan mahzun ko‘ngillari yorishgani va ulamolar qayg‘ulariga sherik ekanlari boshlariga kelgan qayg‘uni biroz aritganini ta’kidlashdi.


O‘zbekiston musulmonlari idorasi Matbuot xizmati
Bugundan boshlab Umra dasturi bo‘yicha “Uzbekistan Airways” aviakompaniyasining reyslari orqali Saudiya Arabistoniga olib borilgan O‘zbekiston fuqarolarini vatanga qaytarish maqsadida Jidda–Toshkent yo‘nalishida repatriatsiya reyslari tashkil etiladi, deb xabar bermoqda “Dunyo” AA muxbiri.
Aviakompaniya ma’lumotlariga ko‘ra, O‘zbekiston aviatsiya rasmiylarining ko‘rsatmasiga binoan, mamlakatimizdagi barcha aviakompaniyalarga keyingi ogohlantirishgacha O‘zbekiston ziyoratchilarini Umra dasturi bo‘yicha Saudiya Arabistoniga olib borishni to‘xtatib turish vazifasi yuklatildi. Bu cheklov, shu jumladan, “Uzbekistan Airways”ning Toshkent–Jidda–Toshkent yo‘nalishidagi reyslariga ham taalluqlidir.
"Dunyo" AA