17-aprel' kuni Iordaniya Hoshimiylar davlati podshohi “Abdulloh II” hazrati oliylari Qur'oni Karimni tajvid qoidasi asosida yoddan tilovat qilib berish bo'yicha xalqaro va mahalliy Hoshimiylar Qur'on musobaqasi g'oliblarini taqdirladi.
Qirol Abdulla II hazrati oliylari 37 nafar mahalliy g'olib, 5 nafar xalqaro tanlov ishtirokchisi, 9 nafar hakamlar hay'ati a'zosi va tanlov bosh nazoratchisiga sertifikatlarni topshirdi.
Iordaniya poytaxti Ammandagi Qirol Husayn Bin Talal jome' masjidi binosida o'tkazilgan yopilish marosimida g'oliblarga tashakkurnoma va sovg'alar topshirildi.
Yurtimizdan Toshkent islom instituti talabasi Habibulloh qori Olimjonov mazkur nufuzli xalqaro musobaqada qatnashib, 98.32 ball to'plab, 14-o'rin sohibi bo'ldi. Qorimizga navbatdagi xalqaro musobaqalarda Allohdan muvaffaqiyatlar tilab qolamiz.
Ushbu musobaqada barcha yoshdagi ming nafar mahalliy tanlov ishtirokchilari, islom davlatlaridan 43 nafar xalqaro tanlov ishtirokchisi qatnashdi.
O'MI xodimi Ilyos Ahmedov tayyorladi.
Inson qadri ulug‘lanayotgan Yangi O‘zbekistonda odamlarni hayotdan rozi qilish, har bir odamning huquq va erkinliklarini ta’minlash hamda turli soha vakillariga ehtirom ko‘rsatish muhim vazifa etib belgilangan.
Ayniqsa, yon-atrofimizni obod va ozoda qiladigan kasb egalarini qadrlash — insonparvar jamiyatning asosiy belgisidir.
Shu maqsadda, 30 dekabr kuni O‘zbekiston musulmonlari idorasi tomonidan "Hazrati Imom" majmuasida poytaxtimiz obodligi va ko‘rkamligiga hissa qo‘shib kelayotgan obodonlashtirish xodimlari uchun ehson dasturxoni yozilib, iliq so‘zlar ila hadyalar ulashildi.
Tadbirda O‘zbekiston musulmonlari idorasi raisi, muftiy Shayx Nuriddin Xoliqnazar hazratlari, Toshkent shahar Obodonlashtirish bosh boshqarmasi mas’ullari va 200 nafardan ziyod xodimlar ishtirok etdi.
Muftiy hazratlari o‘z so‘zlarida so‘nggi yillarda yurtimizda Davlatimiz Rahbari tomonidan inson qadrini yuksaltirish yo‘lida ko‘plab xayrli ishlar amalga oshirilayotgani va bu har bir hamyurtimiz hayotida o‘z aksini topayotganini alohida ta’kidlash barobarida mazkur kasb egalarining jamiyat hayotidagi o‘rni beqiyos ekani, ular tufayli yurtimiz obod, ko‘chalarimiz orasta, atrof-muhitimiz pokiza va qalblarimiz ravshan bo‘lishini alohida qayd etdilar.
Shuningdek, Shayx Nuriddin Xoliqnazar hazratlari so‘zlarida ana shunday fidoyi insonlar dinimizda yuksak qadrlanishini ta’kidlab, yo‘ldan ozorni ketkazish ham iymondan sanalishini, Islomda poklikka alohida e’tibor qaratilishi uning iymon bilan bog‘langanidan ham yaqqol ko‘rinishini aytib o‘tdilar. Payg‘ambarimiz sollallohu alayhi vasallamning: “Poklik iymonning yarmidir”, degan hadislarini yodga oldilar.
Muxtasar qilib aytganda, tadbirda jamiyat farovonligi, avvalo, insonga bo‘lgan e’tibor, uning mehnatini qadrlash va munosib rag‘batlantirishdan boshlanishi ta’kidlandi. Poytaxtimiz obodligi yo‘lida sidqidildan xizmat qilayotgan obodonlashtirish xodimlariga ko‘rsatilayotgan bunday ehtirom va g‘amxo‘rlik davlatimizda har bir insonning mehnati va qadri e’zozlanishining yaqqol namunasi ekani qayd etildi.
Tadbir yakunida Muftiy hazratlari tomonidan sohada faollik ko‘rsatayotgan jonkuyar xodimlarga qimmatbaho sovg‘alar, barcha ishtirokchilarga esa oziq-ovqat jamlanmalari hadya etildi.
O‘zbekiston musulmonlari idorasi
Matbuot xizmati