Mustaqil Respublikamiz O‘zbekistonning Birinchi Prezidenti Islom Abdug‘aniyevich Karimov nomini faxru iftixor, sog‘inchu ehtirom bilan tilga olamiz. U aziz insonning samimiy tabassum, atrofidagilarga birday mehru e’tibor yog‘ilib turadigan chehrasi... xalqiga qaynoq muhabbatining nafasi ufurib turadigan suhbat, muloqotlari... jamiyatimiz hayoti va mamlakatimiz qiyofasining bilimdon muhandisi sifatida ilm va tajribalar bilan asoslab tuzilgan tarixiy rejalari bayon etilgan ma’ruzalari... jahonning obro‘li minbarlaridan dunyo xalqlarining tinchligu osoyishtaligi himoyachisi, jonkuyari sifatida so‘zlagan nutqlari millionlab qalblarda, ona yurtimiz hamda bashariyat tarixi sahifalarida o‘chmas bo‘lib qoldi. Avvalo chin insoniylik fazilatlarini alohida e’tirof etging keladi, arboblik, aniq va ijtimoiy fanlar bo‘yicha bilimdonlik, hayotsevarlik, mardlik, jo‘mardlik, yaxshi niyatlarni dilga tugib Allohga tavakkul bilan mehnat va izlanuvchanlikda barchaga o‘rnak bo‘lish... milliy qadriyatlar, an’analarga hurmatu sadoqat... o‘zidan kattalarga farzand kabi hurmat va kichiklarga ota misoli izzat-g‘amxo‘rlik ko‘rsatishlari... – Islom Karimov shunday olijanob hislatlari bilan jonajon O‘zbekistonimiz mustaqilligining tamal toshini qo‘ydi. Keksalar chorak asrda xalqimizning yuz yillik orzulari ro‘yobga chiqqanini hayajonlanib, to‘lqinlanib so‘zlaydilar. O‘tgan asrning oxirgi o‘n yilliklariga kelib ich-ichidan aftodahol bo‘lib qolgan sobiq davrning korchalonlari yemirilib bo‘lgan tuzumni saqlab qolish uchun turli nayrang, respublikamiz xalqiga tuhmat va kamsitishni avj oldirgan o‘ta murakkab paytda – 1991 yilning 1 sentyabr kuni sobiq ittifoqdosh respubliklar orasida birinchi bo‘lib O‘zbekistonni mustqil davlat deb e’lon qilgan Islom Karimov qalbida jasorat, o‘ziga va xalqiga ishonch qanchalar yuksak ekanini chorak asrlik faoliyati isbotlab, asoslab ketdi.
Mamlakatimizning markaziy va chekka xududlarida birdek amalga oshirilgan obodonlashtirish; tibbiyot, madaniy-maishiy, xalq ta’limi sohasidagi islohotlarning ijobiy samaralari; shaharu qishloqlarni, viloyatlarni bir-biriga bog‘laydigan keng zamonaviy trassalar hamda ko‘priklar; har tomonlama sog‘lom ona va bola – barkamol avlodni voyaga yetkazish uchun amalga oshirilgan izchil tabdirlarning natijasi – onalar va bolalar o‘limining kamayishi; respublikamizning dunyo avtomobilsiz davlatlari qatoridan o‘rin olishi; yerning haqiqiy egasi – dehqonga topshirilishi tufayli bozorlarimizdagi mo‘l-ko‘lligu arzonchilik, dasturxonlarimiz to‘kinligi; xalqaro sport musobaqalarida shohsupaning yuqorisidan o‘rin olgan o‘g‘il-qizlarimizni va ular timsolida O‘zbekistonni sharaflab madhiyamiz yangrashi; Ibn Sino, Beruniy, Farg‘oniy, Mirzo Ulug‘bek kabi dunyo ilm-fani osmonining yulduzlari avlodi – bizning o‘smir, yoshlar farzandlarimizning xalqaro olimpiadalar, tanlovlarda mutloq g‘olib bo‘lishlari... – eh-he, jonajon Vatanimiz hayotining barcha sohalarida erishilgan yutuqlar sanog‘ining adog‘i yo‘q. Zero, Birinchi Prezidentimiz bu ishlarning barchasini aqlu tafakkur torozusida sarhisob qilib taraqqiyotning “o‘zbek modeli”ni yaratdilar, hayotga tatbiq etdilar.
Xalqimizda uzoq va ibratli umr kechirib, el-yurt hurmat-e’zozini qozongan insonlarni so‘nggi yo‘lga kuzatishni “O‘sha aziz odamning to‘yi” deb atash rasmi ham bor. Tafakkur qilsak, eng ulug‘ ne’mat – umrni o‘z xalqining tinchlik-osoyishtaligi, farovonligi, ma’naviy yuksalishi, Vatan ozodligiyu yubodligi yo‘lida behisob ezgu ishlarga sarflab, Parvardigori olam xuzuriga xalqning muhabbati, ehtiromi, duolariga ko‘milib yo‘l olish chin baxt emasmi? Ha, Islom Karimovning oxiratlari ham obod bo‘lishini ko‘zlariyu yuzlarida iztirob, so‘zlarida tuganmas mehr bilan tilagan millionlab kishilarning duo va fotihalari ijobat bo‘lishini Yaratgandan so‘raymiz.
Islom Karimov hayoti va faoliyati elim, yurtim deb yonib yashashni niyat qilgan har bir inson uchun ibratdir, inshoalloh. Shuning uchun ham Respublikamiz Prezidenti Shavkat Mirziyoyevning 2017 yil 25 yanvarda e’lon qilingan “O‘zbekiston Respublikasining Birinchi Prezidenti Islom Abdug‘aniyevich Karimovning xotirasini abadiylashtirish to‘g‘risida”gi Qarori, unda har yili 30 yanvar kunini Birinchi Prezidentimiz Islom Karimov tug‘ilgan kun sifatida keng nishonlash, 2 sentyabr kunini Xotira kuni sifatida yod etish belgilab qo‘yilgani xalqimizning dilidagi gap bo‘ldi.
Yaxshilar yodi tarixda, avlodlar xotirasida iftixor bo‘lib qolaveradi, ular boshlagan xayrli yangi qutlug‘ rejalarga pillapoya bo‘ladi. Zero, Prezidentimiz Shavkat Mirziyoyev aytganlaridek, “Barchamiz uchun aziz va qadrli bo‘lgan Islom Abdug‘aniyevich Kirimov bugun oramizda yo‘q. Biroq Birinchi Prezidentimiz tomonidan ishlab chiqilgan taraqqiyotning “o‘zbek modeli”ni amalga oshirish va zamonaviy davlat barpo etish borasidagi strategik tamoyillarga biz o‘z ishimizda doimo suyanamiz”.
Muhtarama ULUG‘OVA
Munosabat
Avvalo, barcha yurtdoshlarimizni xursandchilik ayyomi – Qurbon hayiti bayrami bilan samimiy muborakbod etaman!
Mamlakatimizda Qurbon hayiti nafaqat diniy, balki umummilliy bayram sifatida ham keng nishonlanadi. Zero, ushbu kunda yurtdoshlarimiz bir-birini hayit bilan samimiy tabriklab, o‘zaro sovg‘alar ulashadi, millati, tili va dinidan qat’i nazar, yolg‘iz keksalar, kam ta’minlangan oilalar holidan xabar olinib, xayriya ishlari amalga oshiriladi.
Shu ma’noda, ushbu qutlug‘ bayram insonparvarlik va bag‘rikenglik ramzi bo‘lish bilan birga, insonlar o‘rtasida o‘zaro mehr-muhabbat va hamjihatlik kabi fazilatlarni ham o‘zida mujassam etadi.
Yurtimizda hayit bayramini munosib kutib olish va o‘tkazish, shuningdek, milliy-diniy qadriyatlarimizni asrab-avaylash, xalqimizning ko‘p asrlik an’ana va urf-odatlariga uyg‘un holda o‘tkazilishiga alohida e’tibor qaratiladi. Buning uchun barcha zarur tayyorgarliklar ko‘riladi, mamlakatimizning barcha hududlarida tom ma’noda bayram shukuhi hukm suradi.
Kezi kelganda yurtimizda “Inson qadri uchun” degan ulug‘vor g‘oya asosida barcha sohalar qatori diniy-ma’rifiy jabhada ham katta islohotlar amalga oshirilayotgani, normativ-huquqiy hujjatlar takomillashtirilib, soha faoliyati samaradorligi yangi bosqichga chiqarilayotganini alohida qayd etish lozim.
Davlatimiz rahbari tashabbusi bilan oxirgi yillarda yurtimizning har bir go‘shasidagi ulkan bunyodkorlik ishlari izchil davom ettirilmoqda. Xususan, Toshkentda Islom sivilizatsiyasi markazi binosi qurilishi yakuniga yetib bormoqda, Samarqandda Imom Buxoriy majmuasi qad rostlamoqda.
Yaqinda Prezidentimiz ushbu majmuaga tashrif buyurib, u yerdagi bunyodkorlik ishlari bilan tanishdi, zarur ko‘rsatmalar berdi. Zero, bu davlatimiz rahbarining uzoqni ko‘ra bilishi, ulug‘ ajdodlarga yuksak ehtiromining yorqin ifodasidir.
E’tiborga sazovor jihatlardan yana biri shuki, Prezidentimiz qo‘ng‘iroq qilib, hojilarimiz uchun yaratilgan shart-sharoitlar, ularning salomatligi va kayfiyati haqida so‘radi. Bundan hojilarimiz behad mamnun bo‘ldi, e’tibor va ehtiromdan xursand bo‘lgan ziyoratchilarimiz ko‘zlarida yosh bilan duo qildilar.
Arafot maydonida, duolar mustajob bo‘ladigan ayni onlarda Prezidentimizning Qurbon hayiti munosabati bilan O‘zbekiston xalqiga yo‘llagan tabrigini katta hayajon bilan eshitdik. Yaratgandan yurtimizga tinchlik, xalqimizga farovonlik so‘rab, duolar qildik.
Ayniqsa, tabrikda hojilarimiz alohida eslab o‘tilgani ziyoratchilarimizni cheksiz quvontirdi.
Barcha yurtdoshlarimiz qatori hojilarimiz ham ushbu tabrikdagi olijanob g‘oya va tashabbuslarga befarq emasligini izhor qildi.
Tabrikdagi “Inson qadri uchun, inson baxti uchun!” degan olijanob g‘oya barcha jabhalardagi islohotlarning asosi ekanini alohida e’tirof etish va hojilarimizning tashabbuslari ham ushbu g‘oyaga hamohang ekanini qayd etish lozim.
Bu Arafot maydonida O‘zbekiston Respublikasi Prezidentiga hojilarimizning murojaatida ham o‘z aksini topdi. Jumladan, mazkur murojaatda hojilarimiz yurtga qaytgach, “Yangi O‘zbekistonning tinchlik va ma’naviyat targ‘ibotchilari” degan ezgu tashabbusni bir ovozdan ilgari surib, Uchinchi Renessans yaratuvchilarini tarbiyalashda Prezidentimizga ko‘makchi bo‘lamiz, deb va’da berdi.
Shuningdek, Vatanimiz taraqqiyotiga xolis xizmat qilish, mahallalarda tinchlik va birdamlikni mustahkamlash, tinchlik-osoyishtalikning qadriga yetish, xalqimizni ma’nan yuksaltirish, jamiyatdagi islohotlarga daxldorlik hissini oshirish kabilarni targ‘ib etish borasida faol bo‘lishni aytib o‘tdi.
O‘z navbatida, hojilarimiz kitobxonlik madaniyatini yuksaltirish, ilm-ma’rifatga homiylikda namuna bo‘lish, to‘ylar, oilaviy tadbirlar va marosimlarda me’yorga amal qilgan holda kamxarj va ixcham o‘tkazishda bosh-qosh bo‘lish, mahallalardagi notinch oilalar, shu jumladan, tarbiyasida muammosi bor yoshlar o‘rtasida tushuntirish ishlarini olib borish, hududlardagi maktablarning ta’mirga muhtoj qismini joriy ta’mirlash ishlariga ko‘maklashish, xayriya, mehr-muruvvat va yordam ko‘rsatish ishlarini ko‘paytirish kabi tashabbuslarni qat’iy amalga oshirishga ahd qildi.
Aziz yurtdoshlar! Shubhasiz, ushbu shukuhli kunlar tom ma’noda barchamiz uchun katta bayram, xursandchilik onlaridir. Mo‘tabar manbalarda saodatli damlarni shodu xurramlik bilan o‘tkazish bo‘yicha ko‘p tavsiyalar kelgan. Ulamolarimiz: “Hayit kunlari shodlikni izhor qilish dinning shiorlaridan”, deyishadi. Demak, Qurbon hayiti kunlarida quvonchimizni, saxovatimizni har qachongidan ko‘ra ko‘proq namoyon qilishimiz lozim. Ayniqsa, kam ta’minlangan, ijtimoiy himoyaga muhtoj insonlarga yordam ko‘rsatishga shoshilishimiz lozim.
Ushbu fazilatli kunlarda muborak manzillarda turib, ona Vatanimizga tinchlik-osoyishtalik, xalqimizga yanada farovon hayot, farzandlarimizga baxtu saodat so‘rab, duolar qilmoqdamiz!
Qurbon hayitingiz muborak bo‘lsin!
Shayx Nuriddin XOLIQNAZAR,
O‘zbekiston musulmonlari idorasi raisi, muftiy