Bugun 31.08.2016 y. O‘zbekiston musulmonlari idorasining Toshkent viloyat vakilligida mamlakatimiz mustaqilligining 25 yilligiga bag‘ishlangan bayram tadbiri o‘tkazildi. Tadbirda shahar va tuman bosh imom-xatiblari, viloyatda uzoq yillardan buyon samarali xizmat qilib kelayotgan nuroniy imom-xatiblar taklif qilindilar.

O‘zbekiston musulmonlari idorasi raisi o‘rinbosari Ibrohimjon Inomov yig‘ilganlarni eng ulug‘, eng aziz bayramimiz bilan qutlar ekan, istiqlol davrida erishilgan yutuqlar, jumladan din sohasida olib borilgan ezgu ishlar haqida alohida to‘xtalib o‘tdi. Istiqlol sharofati bilan ajdodlarimizga ko‘rsatilgan ehtirom, ularnigng merosini tiklash borasida amalga oshirilgan ishlar, masjidlarimizdagi obodonlik va qulayliklar,  diniy ta’lim, haj va umra borasidagi ezgu ishlar barcha-barchani quvontirayotganini mamnuyat bilan tilga oldi.

Yig‘ilishda so‘z olgan O‘zbekiston musulmonlari idorasi xodimi Muzaffarjon Kamolov, “Zangiota” ziyoratgohi yodgorlik majmuasi raisi Sobirjon Murodov, Zangiota tumani “Umir” jome masjidi imom-xatibi Nurali Mavlonov, Parkent tumani bosh imom-xatibi Mansur Mansurovlar istiqlol davri yutuqlarini, unda inson qadri, din erkinligi, milliy qadriyat va urf odatlarga ehtirom ko‘rsatilganini yaqin tarixiy davr misollari asosida tushuntirib, bugun barchaning dilida shukronalik va mamnuyat hissi to‘lib toshayotganining guvohi bo‘lib turganimizni ta’kidlab o‘tdilar.

O‘zbekiston musulmonlari idorasining buyrug‘iga binoan viloyatda ko‘p yillar davomida imom-xatib sifatida samarali faoliyat yuritgan Quyi Chirchiq tumani bosh imom-xatibi Nurullo Hojiyev, Zangiota tumani “Abdulloh ibn Abbos” jome masjidi imom-xatibi G‘ulomiddin Ergashev, Ohangaron tumani “Payg‘ambar ota” jome masjidi imom-xatibi Abduqodir Jakbarovlarga bayram munosabati bilan esdalik sovg‘alar topshirildi.

Yig‘ilganlarga bayram dasturxoni yozildi.

Yurtimiz tinchligi, osmonimiz musaffoligi, istiqlolimiz abadiy bo‘lishini tilab duolar qilindi.

Yurtimiz mustaqilligi uchun jon fido qilgan ajdodlarimiz, shuningdek, sohada xizmat qilib o‘tgan imom-xatiblarimiz xotirlanib, ularning haqlariga Qur’on talovati savoblari baxshida qilindi.

M.Nasriyev