“Vaqf” xayriya jamoat fondining Samarqand viloyati filiali vakillari muborak Ramazon oyi munosabati bilan ijtimoiy qiynalgan insonlarga mehr-muruvvat ko‘rsatish, moddiy-ma’naviy ko‘mak berish barobarida ular holidan xabar olishdi.

Filial rahbari tashabbusi bilan homiylarni jalb qilgan holda Samarqand shahrida istiqomat qilib kelayotgan 15 nafar turli sabablarga ko‘ra ijtimoiy vaziyati nochor, boquvchisi yo‘q va bemor kimsalar holidan xabar olindi. Shu kuni ular yashayotgan xonadonlarga kirib borilib, kundalik zaruriy oziq-ovqat mahsulotlaridan iborat xayriya jamlanmalari topshirildi. Muxtojlarning duosi olindi.

....

O‘zbekiston ko‘pmillatli davlat hisoblanadi. Azal-azaldan yurtimizda turli millat vakillari tinchlik-xotirjamlikda umguzaronlik qilib kelmoqda. Ayni saxovat va bag‘rikenglik oyida islom diniga e’tiqod qiluvchi yurtdoshlarimiz qatorida boshqa millat va din vakillari ham Ramazon xayr-saxovati, shukuhidan bebahra qolmayapti.

Jumladan, yaqinda Jizzax viloyati hokimligi, O‘zbekiston musulmonlari idorasi viloyat vakilligi hamda “Vaqf” xayriya jamoat fondi viloyat filiali hamkorligida tashkil etilgan xayriya tadbirlari davomida Jizzax shahrida yashovchi nogiron, boquvchisini yo‘qotgan, kam ta’minlangan, ijtimoiy himoyaga muhtoj o‘zga din vakillariga muruvvat ko‘rsatildi. Homiylarni jalb qilgan holda ko‘plab ehtiyojmand kishilarga oziq-ovqat mahsulotlari xayriya qilindi. Ikki nafariga dam olish maskaniga yo‘llanma berildi.

Nabiy alayhissalom har bir kishining qaysi dinga mansubligidan qat’i nazar, avvalo, uning insonligi uchun odamiylik nuqtayi nazaridan hurmat qilish lozimligini ta’kidlaganlar. Abdurahmon Abu Laylo rivoyat qiladilar: «Bir kuni Rasululloh sollallohu alayhi va sallamning yonlaridan odamlar tobut ko‘tarib o‘tishdi. Shunda u zot o‘rinlaridan turdilar. Keyin sahobalar uning yahudiy ekanini aytishdi. Shunda Rasululloh: “U ruh egasi – inson emasmi?!” dedilar».

Xayriya tadbirlari davom etmoqda.

Ramazon oyida ijtimoiy himoyaga muhtoj insonlarga iliqlik ulashgan, ularga g‘amxo‘rlik ko‘rsatgan saxovatli homiylardan Alloh rozi bo‘lsin!

O‘zbekiston musulmonlari idorasi
Matbuot xizmati