Obuna – 2024
Donishmandlardan birining: «Agar rejangiz bir yillik bo‘lsa – sholi eking. O‘n yillik bo‘lsa – daraxt o‘tqazing. Agar bir asrlik bo‘lsa – farzandlaringizga ta’lim-tarbiya bering», degan hikmatli gapi bor.
Haqiqatan, har birimizning rejamiz bir asrlik. Niyatimiz ham shunga yarasha: xonadon ahllarimizning barchasiga sof Islom ta’limotini go‘zal tarzda yetkazish, ularni ma’rifatli qilish, ma’naviyatini yuksaltirishdir. Tabiiyki, bu jarayonda bizga eng yaqin ko‘makchi bu – “Hidoyat” va “Mo‘minalar” jurnallari hamda “Islom nuri” gazetasidir.
Mazkur nashrlarga 2025 yil uchun obuna mavsumi boshlandi.
“Shamsuddinxon Boboxonov” nashriyot-matbaa ijodiy uyi Davriy nashrlar bo‘limi mudiri T.Nizomov hamda Marketing va innovatsiyalar bo‘limi mudiri A.Yusupov Navoiy va Buxoro viloyatlarida xizmat safarida bo‘lib, viloyatlar, tumanlar va shaharlar bosh imom-xatiblari bilan uchrashuvlar o‘tkazdi.
Yig‘ilishlarda “Hidoyat” va “Mo‘minalar” jurnallari hamda “Islom nuri” gazetasiga 2025 yil uchun obuna mavsumini har yilgidan ko‘ra uyushqoq va ko‘tarinki ruhda o‘tkazish, har bir xonadonga ziyo va ma’rifat kirib borishini ta’minlash zarurligi alohida qayd etildi.
– “Hidoyat” va “Mo‘minalar” jurnallari hamda “Islom nuri” gazetasi yildan-yilga mazmun-mundarijasi boyib, shaklan juda go‘zal bo‘lib boryapti, – deydi Navoiy viloyati bosh imom-xatibi Tohir domla Ro‘ziyev. – Inshoalloh, 2025 yil uchun obunani ko‘p qilamiz. Juma mav’izalarida, to‘y va marosimlarda davriy nashrlarimiz targ‘ibotni kuchaytiramiz. Aslida, bu ham amri ma’ruf va nahyi munkardir. Zero, Imom Termiziy bobomiz rivoyat qilgan hadisda Nabiy sollallohu alayhi va sallam: “Yaxshilikka dalolat qiluvchi yaxshilik qiluvchi kabidir”, deganlar.
Tadbirlar so‘ngida “Hidoyat” va “Mo‘minalar” jurnallari hamda “Islom nuri” gazetasiga 2024 yil uchun obuna mavsumida jonbozlik ko‘rsatgan masjidlar hamda tumanlar bosh imom-xatiblari “Shamsuddinxon Boboxonov” nashriyot-matbaa ijodiy uyi tomonidan sovg‘alar bilan taqdirlandi.
Hidoyat.uz
Ummu Salama roziyallohu anhodan rivoyat qilinadi: “Rasululloh sollallohu alayhi vasallam qiroat qilganlarida oyatlarni ajratib-ajratib o‘qirdilar” (Imom Abu Dovud, Imom Ahmad rivoyati).
Ummu Salama roziyallohu anhodan rivoyat qilinadi: Nabiy sollallohu alayhi vasallam qiroatalarini oyat-oyat qilib ajratardilar: «Alhamdu lillahi Robbil-’alamin» deb, so‘ng vaqf qilardilar, «Arrohmanir-Rohiym» deb, so‘ng vaqf qilardilar» (Imom Termiziy, Imom Hokim rivoyati).
Ya’lo ibn Mamlakdan rivoyat qilinadi: «U Ummu Salama roziyallohu anhodan Nabiy sollallohu alayhi vasallamning namozlari haqida so‘radi. Shunda u kishi: «Sizlar qayoqdayu, u zotning namozlari qayoqda?! U zot namoz o‘qir, so‘ng namoz o‘qiganchalk uxlar, so‘ng uxlaganlaricha namoz o‘qir, so‘ng namoz o‘qiganlaricha uxlar edilar. To tongacha shunday bo‘lar edi», dedi-da, u zotning qiroatlarini maqtay ketdi. U zotning qiroatlarini maqtay turib: «Harfma-harf, aniq-aniq o‘qirdilar», dedi» Abu Dovud, Termiziy va Ahmad ibn Hanbal rivoyat qilgan.
Qatodadan rivoyat qilinadi: «Anasdan: «Rasululloh sollallohu alayhi vasallamning qiroatlari qanday edi?» deb so‘raldi. Shunda u: «Cho‘ziq edi», dedi-da, keyin «Bismillahir-Rohmanir-Rohiym»ni «Bismillah»ni cho‘zib, «Ar-Rohman»ni cho‘zib, «Ar-Rohiym»ni cho‘zib o‘qib berdi». Ya’ni Rasululloh sollallohu alayhi vasallam mad – cho‘ziq unli bor o‘rinlarda madni aniq cho‘zib o‘qir edilar (Imom Buxoriy rivoyati).
Abdulloh ibn Abu Qaysdan rivoyat qilinadi: «Men Oisha roziyallohu anhodan Nabiy sollallohu alayhi vasallamning qiroatlari haqida: «U zot qiroatni ichlarida qilarmidilar yoki jahriy (oshkora) qilarmidilar?» deb so‘radim. U: «Har qaysisini ham qilardilar. U zot (qiroatni) gohida ichlarida, gohida oshkora qilardilar», dedi» (Muttafaqun alayh).
Ummu Honiydan rivoyat qilinadi: «Men tunda yopig‘im ustida turib olib Rasululloh sollallohu alayhi vasallamning Ka’ba oldidagi qiroatlarini eshitar edim» (Nasoiy va Ibn Moja rivoyat qilgan).
Jubayr ibn Mut’im roziyallohu anhudan rivoyat qilinadi: «Nabiy sollallohu alayhi vasallamnig shom namozida Tur surasini o‘qiyotganlarini eshitdim. «Yoki ular, hech narsadan hech narsa yo‘q, o‘zlari yaralganlarmi?! Yoki ular yaratuvchilarmi?» oyatiga kelganda qalbim uchib ketay dedi» (Imom Buxoriy rivoyati).
Baro ibn Ozib roziyallohu anhudan rivoyat qilinadi: «Nabiy sollallohu alayhi vasallamning xuftonda «Vattiyni vaz-zaytun»ni o‘qiyotganlarini eshitdim. Biror kishidan u zotning ovozlaridan ko‘ra chiroyli ovoz eshitmaganman» Muttafaqun alayh.
Abdulloh ibn Mug‘affaldan rivoyat qilinadi: «Nabiy sollallohu alayhi vasallamning tuyalarida Qur’on o‘qib ketayotganlarini ko‘rdim. Fath surasini mayin qilib o‘qib ketayotgan ekanlar. Ohang qilib o‘qib ketayotgandilar» (Imom Buxoriy rivoyati).
Avs ibn Huzayfa roziyallohu anhudan rivoyat qilinadi: «Bir kecha Rasululloh sollallohu alayhi vasallam oldimizga kech qolib chiqdilar. Biz: «Yo Allohning Rasuli, kech qolib ketdingizmi?» dedik. Shunda u zot: «Qur’ondan hizbim[1] qolib ketgan edi, o‘shani tugatmasdan chiqishni istamadim», dedilar. Keyin biz Rasululloh sollallohu alayhi vasallamning as'hoblaridan: «Rasululloh sollallohu alayhi vasallam Qur’onni qanday hizbga ajratar edilar?» deb so‘radik. Ular: «Uchta, beshta, yettita, to‘qqizta, o‘n bitta, o‘n uchta (sura) va «Mufassal» hizbi», deyishdi» (Tabaroniy va Tahoviy rivoyati).
Davron NURMUHAMMAD
[1] Hizb – bo‘lak degani bo‘lib, Qur’ondan har kun uchun vazifa sifatida ajratib olingan bo‘lakka nisbatan ishlatilgan. Mufassal – Qur’onning Hujurot surasidan boshlab oxirigacha bo‘lgan qismi.