O`zbekiston musulmonlari idorasi

Jahon sammitida O‘zbekiston tajribasi yuqori baholandi

11.11.2024 5510 8 min.

E’tirof

Dolzarb mavzuga bag‘ishlangan global sammit

Bugun butun dunyo go‘yo ko‘zda qalqqan bir tomchi achchiq yosh singari ulkan muammolar girdobida qolib ketyapti. Agar ko‘zni yumsa, yoshdan ayrilishi, yummasa, achchiq va sho‘r ashk ko‘zni achitgani singari iqlim o‘zgarishlari ham global muammo sifatida barchani birdek bezovta qilyapti.

Hozir jahon hamjamiyati iqlim o‘zgarishini insoniyat oldida turgan eng jiddiy muammolardan biri deb tan olmoqda. Ayni davrda bu global muammo oqibatida insoniyat xo‘jalik faoliyatining barcha qirralari, xususan, qishloq xo‘jaligidan tortib energetika, transport harakati, zamonaviy nanotexnologiyalardan foydalanish va boshqa sohalarda zudlik bilan hal etishlishi shart bo‘lgan masalalarni kun tartibiga qo‘ymoqda.

Boz ustiga, qit’alar va yirik-yirik davlatlar misolida suv toshqinlari, bo‘ronlar, o‘rmon yong‘ini, cho‘llanish jarayonlari kuchayishi, zilzila kabi tahdidlar chindan-da dunyo afkor ommasini jiddiy o‘ylashga majbur qilmoqda.

Shu maqsadda joriy yilning 5-6 noyabr kunlari Ozarbayjon poytaxti Boku shahrida BMTning iqlim o‘zgarishi konferensiyasi (UNFCCC COP29) doirasida Jahon diniy yetakchilari global sammiti bo‘lib o‘tdi.

Mazkur nufuzli tadbirda hukumatlar, xalqaro tashkilotlar, taniqli diniy yetakchilar, olimlar va ekspertlarning 300ga yaqin vakili qatorida yurtimizdan O‘zbekiston Prezidenti maslahatchisi Muzaffar Kamilov, O‘zbekiston musulmonlari idorasi raisi, muftiy Nuriddin Xoliqnazar, Din ishlari bo‘yicha qo‘mita raisining birinchi o‘rinbosari Davronbek Maxsudov ishtirok etdi.

Tadbirning birinchi kuni ishtirokchilar tomonidan global iqlim o‘zgarishining sabab va oqibatlari, tabiatni asrash, ekologik muammolarning oldini olish masalalari muhokama qilinib, bu borada barcha diniy konfessiyalar vakillari oldida turgan muhim vazifalar yuzasidan taklif va mulohazalar bildirildi.

Anjumanda O‘zbekiston delegatsiyasi rahbari Muzaffar Kamilov ma’ruza qilib, mintaqada, xususan, mamlakatimizda iqlim o‘zgarishining salbiy oqibatlarini kamaytirish, tabiiy boyliklardan oqilona foydalanish va biologik xilma-xillikni yanada boyitish yuzasidan qilinayotgan sa’y-harakatlar, o‘ziga xos tajribalar haqida so‘z yuritdi. Jumladan, so‘nggi yillarda O‘zbekistonda amalga oshirilayotgan “Yashil makon” loyihasi, unda turli diniy konfessiya va milliy markazlar vakillarining faol ishtiroki, loyiha doirasida har yili yurtimizda 200 million tup daraxt ekilib, yangi yashil hududlar barpo etilayotgani alohida ta’kidlandi.

Sammit ishtirokchilari tomonidan O‘zbekistondagi iqlim o‘zgarishining oldini olish borasidagi mazkur sa’y-harakatlar, yashil hududlarni ko‘paytirish borasidagi chora-tadbirlar va ilg‘or tashabbuslar yuqori baholandi.

Tadbirning ikkinchi kuni 30 ga yaqin diniy yetakchi va ulamoning ma’ruzalari tinglandi. Chiqishlarda iqlim o‘zgarishi insoniyat oldida turgan eng jiddiy muammolardan ekani, bu borada BMT konvensiyasining ahamiyati, atmosferaga issiqxona gazlari chiqarilishini kamaytirish, o‘sib borayotgan global ekologik tahdidlarga kompleks javob qaytarishda jahon diniy yetakchilarining roli kabi mavzularda chiqishlar qilindi.

Xalqaro anjumanda O‘zbekiston musulmonlari idorasi raisi, muftiy shayx Nuriddin Xoliqnazar ham so‘zga chiqib, yurtimizdagi taniqli ulamolar, imom-xatiblar va soha xodimlari “Tabiat – Alloh taoloning omonatidir” shiori ostida targ‘ibot-tashviqot ishlarida, “Yashil makon” umummilliy loyihasida faol ishtirok etayotgani to‘g‘risida atroflicha ma’lumot berdi.

Manfaatli muloqot va uchrashuvlar

O‘zbekiston delegatsiyasi Jahon diniy yetakchilari global sammiti doirasida qator uchrashuv va muloqotlar o‘tkazdi. Jumladan, delegatsiya vakillari Ozarbayjon Bosh vaziri Ali Asadov bilan uchrashdi.

Muloqotda O‘zbekiston va Ozarbayjon o‘rtasidagi o‘zaro manfaatli hamkorlikni rivojlantirish, mamlakatlarimizning an’anaviy yaqin va do‘stona munosabatlarini yanada mustahkamlash, ilm-fan, madaniyat va diniy-ma’rifiy sohalaridagi hamkorlikni rivojlantirish masalalari yuzasidan fikr almashildi.

Uchrashuvda Jahon diniy yetakchilari global sammitining ahamiyati haqida so‘z yuritilib, mazkur tadbir xalqlar va turli din vakillari o‘rtasidagi munosabatlarni mustahkamlashga katta hissa qo‘shishi, bu borada qardosh mamlakatlar diniy yetakchilari o‘rtasidagi hamkorlik juda ham muhim ekani ta’kidlandi.

Ali Asadov o‘z so‘zida yurtimizda amalga oshirilayotgan ijobiy o‘zgarishlarni yuksak baholab, bundan keyin ham O‘zbekiston Ozabayjonning eng yaqin ishonchli hamkori bo‘lib qolishini ta’kidladi. Shuningdek, u O‘zbekiston Prezidenti tashabbusi bilan Fuzuliy shahrida umumta’lim maktabi bunyod etilganini e’tirof etib, bu muhtasham maktabni ozarbayjon xalqiga tuhfa qilgani uchun davlatimiz rahbariga chuqur minnatdorlik izhor etdi.

Shuningdek, Ozarbayjon Respublikasi Diniy tashkilotlar bilan ishlash davlat qo‘mitasi raisi Ramin Mamedov bilan uchrashuvda so‘nggi yillarda ikki davlat o‘rtasidagi ko‘p tomonlama hamkorlik yangi bosqichga ko‘tarilgani, ozarbayjon xalqi o‘zbek xalqining do‘stona munosabatini doim his qilishi, boshqa sohalar kabi diniy-ma’rifiy sohada ham tajriba almashish o‘zaro manfaatli bo‘lishi ta’kidlandi.

O‘z navbatida, jamiyatda yot g‘oyalarga qarshi kurashish, masjidlar va imom-xatiblar faoliyatini samarali tashkil etish masalalarida hamkorlik ikki davlat uchun foydali bo‘lishiga alohida urg‘u qaratildi.

Samimiy va do‘stona ruhda o‘tgan yig‘ilishda Kavkaz musulmonlari idorasi raisi, shayxulislom Ollohshukur Poshshozoda bilan ham suhbatda bo‘lindi.

Muloqotda ikki mamlakat o‘rtasidagi aloqalarni yanada rivojlantirish borasida davlat rahbarlari tomonidan amalga oshirilayotgan xayrli islohotlar alohida e’tibor qaratildi..

Ollohshukur Poshshozoda joriy yilning oktyabr oyida O‘zbekistonda Prezidentimiz tashabbusi bilan o‘tkazilgan “Islom – tinchlik va ezgulik dini” mavzusidagi xalqaro konferensiya ishini yuqori baholadi. Shuningdek, suhbatda Prezident Shavkat Mirziyoyevning O‘zbekistondagi diniy-ma’rifiy soha rivoji, islom olamidagi buyuk allomalar merosini o‘rganish va jamoatchilikka yetkazishdagi jonbozligini alohida e’tirof etdi.

Uchrashuv yakunida shayxulislom hazratlari ikki mamlakat xalqi farovonligi, o‘zaro do‘stlik va qardoshlik aloqalarining rivojini tilab duo qildi.

O‘zbekiston delegatsiyasi a’zolari Rossiya muftiylar kengashi raisi Ravil Gaynuddin hamda Bahrayn Podshohlgigi Islom ishlari bo‘yicha oliy kengashi raisi Abdurahmon ibn Rashid al-Xalifa, Misr muftiysi Nazir Muhammad Ayyod, Misr vaqf ishlari vaziri Usoma Azhariy, Al-Azhar majmuasi vakili Muhammad Duvayniy, Musulmon donishmandlar kengashi bosh kotibi Muhammad Abdussalom, Italiya musulmonlari uyushmasi raisi Imom Yahyo Pallavichini, Mo‘g‘uliston muftiysi Batirbek Xadiys bilan ham muloqot qildi. Uchrashuvlarda xorijlik hamkorlar tomonidan so‘nggi yillarda yurtimizda diniy-ma’rifiy sohada amalga oshirilgan islohotlar alohida e’tirof etildi. Barcha uchrashuvlar iliq va do‘stona ruhda bo‘lib o‘tdi.

O‘zbekiston delegatsiyasi sammit doirasida Fuzuliy va Shusha shahridagi bir qator tarixiy maskanlar ziyoratida bo‘ldi.

Anjuman yakunida Jahon diniy yetakchilari global sammiti deklaratsiyasi qabul qilindi. Hujjatda iqlim o‘zgarishlarining oldini olishda hamkorlik, ayniqsa, ko‘kalamzorlashtirish ishlarini samarali tashkil etish, suvni tejash, qayta tiklanuvchi energiya manbalaridan keng foydalanish kabi yo‘nalishlarda diniy-ma’rifiy soha xodimlarining targ‘ibot-tashqivot ishlarini yanada jadallashtirish lozimligi ta’kidlandi.

Shuningdek, “Jahon dinlari yashil sayyora uchun” shiori ostida o‘tgan yig‘ilishda ishtirokchilar tomonidan quyidagi vazifalar belgilab olindi:

– global iqlim o‘zgarishi, biologik xilma-xillikning yo‘qolishi, atrof-muhitning ifloslanishi, suv tanqisligi kabi umumjahon muammolar sabablarini o‘rganish bo‘yicha birgalikdagi sa’y-harakatlarni jadallashtirish;

– iqlim o‘zgarishiga qarshi kurash bo‘yicha jamoatchilik muhokamalarida faol ishtirok etish;

– iqlim o‘zgarishining salbiy oqibatlarini kamaytirish, tabiiy boyliklardan oqilona foydalanish, tabiat va undagi ne’matlarning muqaddasligini keng jamoatchilikka yetkazishda diniy omillardan unumli foydalanish.

Shu bilan birga, diniy yetakchilar ushbu sammit tinchlikni asrash va nizo va ziddiyatlarni to‘xtatish chaqiriqlari uchun foydali va samarali platforma bo‘lib xizmat qilishiga katta umid bildirdi.

Xulosa shuki, global iqlim o‘zgarishi va ekologik muammolarni bir yoki ikki davlatning sa’y-harakati bilan bartaraf etib bo‘lmaydi. Bunga barcha davlatlar hamjihatlikdagi harakati talab etiladi. Kelgusi avlodlar uchun musaffo osmon, go‘zal tabiat va uning bebaho ne’matlarini bekamu ko‘st yetkazish umuminsoniy burchimiz ekanini unutmasligimiz lozim.

Lutfulla SUVONOV,

“Yangi O‘zbekiston” muxbiri

MА`LUMOTNI IJTIMOIY TАRMOQLАRDА ULАSHING

Maqolalar

“Al-Mavohibul latifa” asarida hadislarni sharhlash uslubi

30.05.2025 4937 6 min.

Muhammad Obid Sindiyning “Al-Mavohibul latifa” asari, albatta, Islom hadisi va fiqh fanini o‘rganishda muhim adabiyotlardan biridir. Uning yoritish uslubi o‘ziga xos va ilmiy tafsirga boydir.

Muhammad Obid Sindiy Abu Hanifa rohimahulloh rivoyat qilgan hadisni keltirgach, o‘sha hadisni yana qaysi muhaddislar kitobida zikr qilganini quyidagi tartibda beradi: Imom Buxoriy “Jome’us sahih”da, Imom Muslim “Sahih”da, Imom Molik “Muvatto”da, Abu Dovud, Imom Termiziy, Imom Nasoiy, Ibn Moja, Dorqutniy va Bayhaqiylar “Sunan”larida, imom Shofeiy, Ahmad ibn Hanbal, Dorimiy, Bazzor, Abu Ya’lo Musiliylar “Musnad” larida, Tabaroniy uch mo‘jamida va boshqa zikr qilganlarini sanab o‘tadi. So‘ng rivoyatlarning lafzlaridagi farqlarni zikr qiladi. So‘ng hadisning mazmunida bayon qilingan masalaga oid boshqa lafzlar bilan zikr qilingan hadislarni keltirib, u hadislarni sanadlari va roviylarining ahvolini bayon qilib, hadisning darajasini aytadi.

Shuningdek, Abu Hanifa rohimahullohning musnadida kelgan hadis fiqhiy masalaga hujjat bo‘lishi uchun mutobe’ va shohid hadislarni keltirib o‘tadi. Bu bilan alloma Abu Hanifa rohimahulloh rivoyat qilgan hadis zaifmasligini ko‘rsatib bergan. Shuningdek, alloma hadisni sharhlashda yuqorida sanab o‘tilgan narsalarni zikr qilgach, hadis roviysi bo‘lgan sahobiyga to‘xtalib o‘tadi va uning tarjimayi holini qisqacha keltiradi. Hadis sanadidagi har bir roviyga birma-bir to‘xtalib o‘tadi. Hadisdagi g‘arib (kam uchraydigan) lafzlarni sharhlaydi, undan olinadigan fiqhiy masalani bayon qilishga o‘tadi.

“Al-Mavohibul latifa” kitobni ko‘p olimlar maqtagan. Jumladan, “al-Yani’ al-janiy” kitobining muallifi Muhammad ibn Yahyo Taymiy shunday degan: “Ajoyib kitob bo‘lib, u ham faqih, ham muhaddisga ko‘p foyda beradi”[1].

Muhaddis Shayx Muhammad Rashid No‘moniy: “Al-Mavohibul latifa” asarini o‘qib chiqdim. Hech ikkilanmay shuni aytamanki, Ibn Hajarning “Fath” kitobidan keyin hadis sharhlash borasida bunga o‘xshagan boshqa kitob yo‘q”, degan^{^[2]}.

Hadislarni sharhlash uslubiga qarqalsa, alloma gohida bir hadisni shu darajada uzoq sharhlaydiki, uning sharhini olib alohida kichik bir risola qilsa bo‘ladi. Misol uchun, Haj kitobida kelgan 255-hadisni sharhi 278-betdan boshlanib, 366-betgacha davom etgan. Agar ushbu hadisning sharhini alohida nashr qilinsa, 90-100 betli kichik risola bo‘ladi^{^[3]}.

“Payg‘ambar sollallohu alayhi vasallamning “tongni yorug‘latib bomdodni o‘qishning” savobi buyukroq”, degan so‘zlari bomdodni o‘qish uchun belgilangan vaqtda ikki xil savob borligini bildiradi. Chunki, ismi tafzil bo‘lgan “أفعل” siyg‘asi bir sifatda ikki narsa o‘zaro raqobatlashib, biri ikkinchisidan ustun kelganini bildiradi”^{^[4]}.

Muallif bu yerda arab tili gramatikasidagi ismi tafzilning ta’rifidan kelib chiqib, hadisda aytilmagan yangi bir ma’noni ya’ni, bomdod uchun ajratilgan vaqtda o‘qiladigan namozga beriladigan savob ikki xil bo‘lishi mumkinlini aytmoqda.

Sindiy hadis sharhlashda gohida e’tiqodiy masalalarga ham keng to‘xtalib o‘tadi. Misol uchun asarning “Iymon” kitobida u olimlar orasida Iymonga berilgan ta’rif borasidagi ixtilofni bayon qilib shunday deydi:

“Iymonning shar’iy ta’rifi: Rasululloh sollallohu alayhi vasallam Allohdan olib kelgan narsani tasdiqlashdir. Iymoning bu ta’rifiga barcha olimlar ittifoq qilgan. Ixtilof esa, til bilan tasdiqlash iymon ta’rifiga kirish kirmasligi borasida bo‘lgan. Aksar muhaqqiq olimlar va Ash’ariy: “Iymon Nabiy sollallohu alayhi vasallam olib kelgan narsani tasdiqlashdan iborat. Tasdiqlash deganda tafsiliy^{^[5]} masalalarni tafsiliy, ijmoliy^{^[6]} masalalarni ijmoliy tasdiqlash tushuniladi. Rosululloh sollallohu alayhi vasallam olib kelgan narsalarni tasdiqlashda dalili bo‘lishi kerak degan shart yo‘q. Shuning uchun muqallidning iymoni ham iymon hisoblanadi”, deyishgan. Boshqa olimlar esa iymoning ta’rifida: “Iymon til va qalbning ishi, ya’ni qalb bilan tasdiqlab, til bilan iqror qilish”, deyishgan. Ba’zi olimlar: “Aslida dil bilan tasdiqlash kifoya. Til bilan iqror bo‘lish esa, banda bilan Allohning o‘rtasidagi iymonga aloqasi yo‘q. U shar’iy hukmlarni ijro qilish uchun qo‘yilgan shart”, degan. Imom Nasafiy aytadi: “Mana shu gap Abu Hanifadan rivoyat qilingan. Abu Mansur Moturidiy ham shu fikrni ma’qullagan. Ikki rivoyatning sahihrog‘ida aytilishicha Ash’ariy ham shu fikrga borgan”^{^[7]}.

Muallifning yana bir ajralib turadigan tomoni, u ushbu kitobida boshqa kitoblardan bir narsani naql qilganda faqat o‘zi o‘qigan va kitoblarda uchratgan ma’lumotni keltiradi. U hech qachon kitobda o‘qimay, shayxlardan eshitgan ma’lumotni ushbu asarida zikr qilmaydi. Bir masala borasida ma’lumot berayotganda: “Bu masala borasida men ko‘rgan va mendagi kitoblarda uchratgan ma’lumotim shu” iborasini ishlatib, o‘sha masalani qo‘lidan kelgancha, qodir bo‘lgancha yoritganini aytib o‘tadi. Agar biror manbada uchratmagan bo‘lsa, zikr qilmaydi.

Toshkent islom instituti Tillar kafedrasi

o‘qituvchisi Anvarov Elyorbek

[1] Said Bektosh. Imom faqih muhaddis shayx Muhammad Obid Sindiy. – Bayrut: Doru bashoiri-l-islamiya, 1987. – B. 298.

[2] Sayyid Abdulmajid G‘ovriy. Shayx Muhammad Obid Sindiy va juhuduhu fi hadisin nabaviy.- Bayrut: Dorul irfon, 2015. – B. 36.

[3]“al-Mavohibu-l-latifa” kitobining to‘rtinchi juz 278-366 betlariga qaralsin.

[4] Muhammad Obid Sindiy. al-Mavohibu-l-latifa. – Bayrut: Dorun navodir, 2013. 2-juz. – B. 175.

[5] Tafsiliy tasdiqlash deganda, Allohning borligi, birligi va Uning sifatlari hamda Allohga iymon keltirish kerak bo‘lgan boshqa barcha narsalarga alohida iymon keltirish tushuniladi.

[6] Ijmoliy tasdiqlash degani masalan qabr azobiga iymon keltirish. Uning tafsilotiga kirmasdan, qabr azobining haqligiga iymon keltirish tushuniladi.

[7] Muhammad Obid Sindiy. al-Mavohibu-l-latifa. – Bayrut: Dorun navodir, 2013. 1-juz. – B. 70.

Hadisi sharif

MА`LUMOTNI IJTIMOIY TАRMOQLАRDА ULАSHING

Muallif

Oʼzbekiston musulmonlari idorasi Matbuot xizmati