Abu Hurayra roziyallohu anhudan rivoyat qilinadi. Rasululloh sollallohu alayhi vasallam Bilol roziyallohu anhuga: “Ey Bilol, Islomga kirganingdan keyin savobini eng umid qiladigan amalingni menga gapirib ber. Chunki men jannatda old tomonimdan kavushing ovozini eshitdim”, dedilar.

Shunda Bilol roziyallohu anhu: “Amallarim ichida savobi umid qilinadigan eng yaxshi amalim – agar kechasi yoki kunduzi (tahorat, g‘usl yoki tayammum qilib) poklanadigan bo‘lsam, ana shu poklik bilan nasib qilganicha namoz o‘qir edim”, dedilar (Imom Buxoriy va imom Muslim rivoyati).

Tahorat qilib bo‘lgandan so‘ng o‘qiladigan namoz – “Shukri vuzu’” (tahoratning shukri) deyiladi. Bu namozni tahoratdan keyinoq o‘qish mustahab sanaladi. Namoz o‘qish makruh bo‘lgan vaqtlarda o‘qib bo‘lmaydi.

Siz Bilol ibn Raboh kabi tahorat olib bo‘lishingiz bilanoq ikki rakat bo‘lsada nafl namoz o‘qiganmisiz?

Uqba ibn Omir Juhaniy roziyallohu anhudan rivoyat qilinadi. Rasululloh sollallohu alayhi vasallam: “Qay bir odam yaxshilab tahorat qilsayu, qalbi va yuzi ila iqbol qilgan holda ikki rakat namoz o‘qisa, albatta unga jannat vojib bo‘ladi”, dedilar (Imom Abu Dovud rivoyati).

Davron NURMUHAMMAD