Sayt test holatida ishlamoqda!
12 Iyun, 2025   |   16 Zulhijja, 1446

Toshkent shahri
Tong
03:04
Quyosh
04:49
Peshin
12:28
Asr
17:38
Shom
20:00
Xufton
21:38
Bismillah
12 Iyun, 2025, 16 Zulhijja, 1446

Dunyomizni oxiratimiz uchun tark etdik

03.01.2025   3909   2 min.
Dunyomizni oxiratimiz uchun tark etdik

Bismillahir Rohmanir Rohiym.
Alloh taologa bitmas-tuganmas hamdu sanolar bo‘lsin.
Payg‘ambarimizga mukammal va batamom salavotu durudlar bo‘lsin.

Hazrati Umar xalifa bo‘lganidan keyin davlat idora uslubini hazrati Abu Bakr qurgan ijtimoiy va axloqiy meros ustiga bino qildi. U har doim o‘zidan va oila a’zolaridan oldin o‘z xalqini o‘yladi va ularga xizmat qildi. U ba’zan ko‘pchilik qatori och ham qoldi, ba’zan yetimlarni taomlantirdi, ba’zan xalqi bilan birga qiyinchilik va mashaqqatlarning alamini totdi. U ocharchilik va qurg‘oqchilik paytlarida zaytun mevasini yeb, ochligini qondirar edi.

Anas ibn Molikning aytishicha, bir safar ochlikdan uning qorni qulduradi. Hazrati Umar esa barmog‘i bilan qorniga turtib, o‘ziga-o‘ziga: «Qani, qurillayver. Insonlar farovonlikka yetgunicha yonimda undan (zaytundan) boshqa senga beradigan hech narsa yo‘q», dedi.

Agar hazrati Umar xohlaganida, xalifalik davrida boylikka ko‘milib yashash, eng go‘zal kiyimlar kiyishi va eng nafis taomlarni yeyishi mumkin edi. Ammo uning yagona maqsadi har doim zuxd, taqvo, kamtarlik va xalqi orasidagi yo‘qsillar va ojizlarga xizmat qilishdan iborat edi.

Bir kuni uning huzuriga bir hay’at keldi. Ular oldiga qo‘yilgan taomlarni ishtaha bilan yeya boshlashdi. Buni ko‘rgan hazrati Umar oxirat ne’matlarini xotirlab, shunday dedi: «Agar istasam, men sizga o‘xshab go‘zal taomlar pishirtirib yeya olaman. Faqat biz dunyomizni oxiratimiz uchun tark etdik».

Darhaqiqat, hazrati Umar bu dunyoga va uning noz-ne’matlariga mutlaqo e’tibor qaratmagan ulug‘ sahoba edi.

Bir kuni u qizi Hafsaning uyiga bordi. Unga bir kosada sho‘rva olib kelishdi. Qizi sho‘rvaning ustiga zaytun yog‘i quygan edi, buni ko‘rgan otasi shunday dedi: «Bir idishda ikkita aralashmami? Men Robbimga yetishgunimcha ikki xil aralashmani bir joyda yemayman».

Bir kuni hazrati Umar ichish uchun bir narsa so‘radi. Unga asal sharbatini olib kelishdi. Hazrati Umar uni ichmadi va shunday dedi: «Bu (qanday) go‘zal va halol ichimlik! Faqat men Alloh taoloning bir jamoaga tottirgan ne’matlarining lazzatlarini bayon qilib: «Hayoti dunyodayoq huzur-halovatingizni ketkazib, mazasini tatib bo‘lgansiz» (Ahqof surasi 20-oyat) deganini eshitdim. Shuning uchun menga go‘zal narsalar oxiratga qoldirilmay, bu dunyoda berilishidan qo‘rqdim».

«Millioner sahobalar» kitobidan

Boshqa maqolalar

O‘zbekiston xalqiga Qurbon hayiti tabrigi

09.06.2025   7391   4 min.
O‘zbekiston xalqiga Qurbon hayiti tabrigi

Muhtaram vatandoshlar!

Siz, azizlarni, barcha mo‘min-musulmon yurtdoshlarimizni, butun xalqimizni ulug‘ va mo‘tabar ayyom – Qurbon hayiti bilan chin qalbimdan samimiy muborakbod etib, o‘zimning yuksak hurmatim va ezgu tilaklarimni bildirishdan g‘oyat mamnunman.

Jamiki islom ummati uchun qadrli bo‘lgan ushbu shukuhli bayram – Iyd al-Adhoni el-yurtimiz bilan birgalikda tinch va osoyishta muhitda kutib olayotganimiz uchun, avvalo, mehribon va qudratli Alloh taologa behisob shukronalar aytamiz.

Hech shubhasiz, keyingi yillarda Yangi O‘zbekistonda ijtimoiy, xalqchil davlat barpo etish, uning ma’naviy asoslarini mustahkamlash va ta’sirchanligini oshirishda muqaddas islom dini, uning asosiy bayramlaridan biri bo‘lgan Qurbon hayiti ham muhim rol o‘ynamoqda.

Ayniqsa, bu bayramning insonparvarlik, ahillik, saxovat va olijanoblik kabi fazilatlari yurtimizda “Inson qadri uchun, inson baxti uchun” degan ezgu g‘oya asosida amalga oshirilayotgan keng ko‘lamli islohotlarga uyg‘un va hamohang bo‘lib, aholining ehtiyojmand qatlamlarini qo‘llab-quvvatlash, keksalar, yoshlar va xotin-qizlar haqida alohida g‘amxo‘rlik ko‘rsatish, kambag‘allikni qisqartirishga qaratilgan dasturlarimiz samarasini oshirishga xizmat qilayotganini alohida ta’kidlash o‘rinlidir.

Aziz do‘stlar!

Bugungi kunda mamlakatimizda turli millatlar va diniy konfessiyalar o‘rtasidagi hamjihatlikni mustahkamlash, vijdon erkinligini ta’minlash, diniy-ma’rifiy merosimizni asrab-avaylash, yosh avlodni milliy va umumbashariy qadriyatlar ruhida tarbiyalash bo‘yicha ulkan ishlar amalga oshirilmoqda.

Bu haqda so‘z yuritganda, islom dinining ezgu tamoyillarini chuqur o‘rganish, buyuk tariximiz va madaniyatimiz durdonalarini, mashhur allomalarimizning boy merosini to‘plash va keng targ‘ib etishga alohida e’tibor qaratilayotganini ta’kidlash lozim. Jumladan, ko‘hna Sharq mo‘jizasi – Samarqand shahri 2025 yilda islom madaniyati poytaxti, deb e’lon qilindi, ulug‘ vatandoshimiz Imom Moturidiyning 1155 yillik tavallud sanasi yurtimiz bo‘ylab keng nishonlanmoqda, Imom Buxoriy, Imom Moturidiy va Imom Termiziy xalqaro ilmiy-tadqiqot markazlari qatoriga, shu yil Buxoro shahrida o‘z faoliyatini boshlaydigan Bahouddin Naqshband ilmiy-tadqiqot markazi ham qo‘shildi.

Poytaxtimiz Toshkent shahrida bunyod etilayotgan Islom sivilizatsiyasi markazi ilmiy-ma’naviy yo‘nalishdagi ulkan va noyob loyiha sifatida el-yurtimiz va xalqaro jamoatchilikda katta qiziqish uyg‘otmoqda. Bu muazzam maskan ko‘p ming yillik qadimiy tariximiz, boy va betakror milliy madaniyatimizning yorqin  timsoli sifatida Yangi O‘zbekiston hayotidagi g‘oyat muhim voqeaga aylanadi, deb ishonaman.

Hurmatli yurtdoshlar!

Shu saodatli kunlarda 15 ming nafar vatandoshimiz muqaddas haj ziyoratini ado etmoqda. Ezgu duo va niyatlar ijobat bo‘ladigan mana shunday munavvar lahzalarda ularni ham Qurbon hayiti bilan samimiy qutlab, Yaratgandan yurtimizga sog‘-omon qaytib kelishlarini so‘raymiz.

Umid qilamizki, muhtaram hojilarimiz jamiyatimizda birdamlik, oila va mahallalarimizda mehr-oqibat muhitini yanada mustahkamlash, yoshlarimiz tarbiyasini kuchaytirish, ularni ilm-ma’rifatga, zamonaviy kasb-hunarlarni egallashga, Vatan himoyachisi bo‘lishga targ‘ib etish, muhtoj insonlarga ko‘mak berishda alohida ibrat va namuna ko‘rsatadilar.

Qalblarimiz quvonchga to‘lgan ushbu fayzli kunlarda xorijiy davlatlarda bo‘lib turgan vatandoshlarimizni ham bugungi ulug‘ ayyom bilan chin dildan qutlab, ularga sog‘lik-omonlik, baxt va omad tilaymiz.

Jahonning uzoq-yaqin o‘lkalaridagi musulmon ummatini ham qizg‘in tabriklab, ularning xalqlari va mamlakatlariga tinchlik, ravnaq va farovonlik tilab qolamiz.

Aziz va muhtaram vatandoshlar!

Hozirgi kunda dunyo naqadar murakkab va tahlikali bo‘lib borayotganini barchamiz ko‘rib turibmiz. Bunday keskin sharoitda yurtimizda tinchlik, o‘zaro hurmat va totuvlik muhitini saqlab, barcha soha va tarmoqlarda fidokorona mehnat qilib ko‘zlagan yuksak maqsadlarimizga yeta olamiz.

Albatta, o‘z tarixida ne-ne sinov va mashaqqatlardan munosib o‘tgan mard va olijanob xalqimiz bunga har tomonlama qodir.

Bu yo‘lda el-yurtimizga mansub mehr-oqibat, o‘zaro birlik va jipslik biz uchun beqiyos kuch-qudrat manbai bo‘lib xizmat qiladi, deb ishonaman.

Siz, azizlarni muqaddas Qurbon hayiti bilan yana bir bor chin dildan tabriklab, barchangizga tinchlik-xotirjamlik, sihat-salomatlik, xonadonlaringizga fayzu baraka tilayman.

Qutlug‘ ayyom barchamizga muborak bo‘lsin!

 

Shavkat Mirziyoyev,

O‘zbekiston Respublikasi Prezidenti