Bismillahir Rohmanir Rohiym.
Alloh taologa bitmas-tuganmas hamdu sanolar bo‘lsin.
Payg‘ambarimizga mukammal va batamom salavotu durudlar bo‘lsin.

Sahl ibn Abdulloh Tustariy rahimahullohning jajji o‘g‘li bor edi. Qachon bir narsa so‘rasa, onasi: «Bor, Allohdan so‘ra!» derdi. Shunda bolakay ma’sum qalbi ila sajdaga bosh qo‘yar va Robbidan istayotgan narsasini so‘rar edi. Ona esa, bu asnoda o‘sha narsani burchakka yashirib qo‘yib, hech narsa bilmaganday turardi. Bola iltijosini tugatgach, haligi narsasini topib olardi.

Bu hol bir qancha muddat davom etdi.

Bir kuni uyda hech kim yo‘qligida bolakayning ko‘ngli bir narsa tusadi va odatiga ko‘ra, sajdaga bosh qo‘yib, Allohga iltijo qila boshladi. Keyin esa, u narsani doim oladigan joyidan oldi.

Onasi uyga qaytganida, bolasining qo‘lidagi narsani ko‘rib, qayerdan olganini so‘radi. Sof qalb, sof tuyg‘ular sohibi bo‘lgan bolakay: «Hamisha oladigan joyimdan», deb javob berdi...

«Ko‘ngil sultonlari» kitobidan