Bismillahir Rohmanir Rohiym
1. Kiyimni kiyishda “Bismillah” (Allohning nomi bilan) deyish.
Rasululloh sollallohu alayhi vasallam: «Allohning zikri va “Bismillahir rohmanir rohiym” bilan boshlanmagan ahamiyatli har bir ishning orqasi kesikdir», deganlar.
2. Libosni kiyishda o‘ng tarafdan boshlash.
Nabiy sollallohu alayhi vasallam: “Agar kiyinsangiz, o‘ngdan boshlang”, deganlar (Imom Termiziy, Imom Abu Dovud, Imom Ibn Moja rivoyati).
Boshqa hadisda: “Sizlardan birortangiz poyabzal kiysa, o‘ngdan, yechganda chapdan boshlasin. Kiyganda har ikkisini kiysin, yechganda har ikkisini yechsin”, deyiladi (Imom Muslim rivoyati).
3. Libosni kiyganda quyidagi duoni qilish:
الْحَمْدُ لِلَّهِ الَّذِي كَسَانِي هَذَا وَرَزَقَنِيهِ مِنْ غَيْرِ حَوْلٍ مِنِّي وَلا قُوَّةٍ
“Alhamdu lillahi allaziy kasaniy haza va rozoqoniyhi min g‘oyri havlin minniy va laa quvvatin”
“Menga ushbu libosni mening tarafimdan hech qanday kuch-qudratsiz kiydirgan Alloh taologa hamdu sanolar bo‘lsin”.
4. Kiyimni yechishda chap tarafdan boshlash.
5. Yechganda ham “Bismillah” ni aytib yechish.
Rasululloh sollallohu alayhi vasallam aytadilar: «Odam bolalarining avrati bilan jinlarning ko‘zlari o‘rtasidagi parda kiyimni yechganda “Bismillah” deyishdir» (Imom Tobaroniy rivoyati).
6. Yangi libos kiyganda duo qilish.
Nabiy sollallohu alayhi vasallam ishton, ko‘ylak, rido yoki salla kiysalar, quyidagi duoni o‘qir edilar:
اللَّهُمَّ لَكَ الْحَمْدُ أَنْتَ كَسَوْتَنِيه أَسْأَلُكَ مِنْ خَيْرِهِ وَخَيْرِ مَا صُنِعَ لَهُ وَأَعُوذُ بِكَ مِنْ شَرِّهِ وَشَرِّ مَا صُنِعَ لَهُ
“Allohumma lakal hamdu anta kasavtaniyhi asaluka min xoyrihi va xoyri ma sunia’ lahu va a’uzu bika min sharrihi va sharri ma sunia’ lahu”
“Allohim, men sendan ushbu libosdagi yaxshilikni va unga bog‘liq yaxshilikni so‘rayman. Men sendan undagi yomonlikdan va unga bog‘liq yomonlikdan panoh so‘rayman” (Imom Termiziy, Imom Abu Dovud, Imom Ahmad rivoyati).
7. Yangi libos kiygan kishining haqqiga duo qilish:
“Baxtli hayot kechiring, shahodat bilan vafot eting” (Imom Termiziy rivoyati).
“Kiyib eskirtiravering, Alloh o‘rniga boshqasini beraversin” (Imom Abu Dovud rivoyati).
Davron NURMUHAMMAD
27 sentyabr kuni O‘zbekiston xalqaro islomshunoslik akademiyasida "Yangi O‘zbekistonda barqaror rivojlanish, tinchlik va islom ma’rifatining xalqaro e’tirofi" mavzusida ilmiy-amaliy konferensiya bo‘lib o‘tdi.
Tadbirda Prezident maslahatchisi o‘rinbosari, xalqaro islomshunoslik akademiyasi rektori Muzaffar Komilov, O‘zbekiston musulmonlari idorasi raisi, muftiy Shayx Nuriddin Xoliqnazar hazratlari, Din ishlari bo‘yicha qo‘mita raisining birinchi o‘rinbosari Davronbek Maxsudov, professor-o‘qituvchilar, soha mutaxassislari va talabalar ishtirok etdi.
Anjuman Prezidentimizning AQSHga amaliy tashrifi va BMT Bosh Assambleyasining saksoninchi sessiyasidagi nutqi mazmun-mohiyatiga bag‘ishlandi.
– BMT Bosh Assambleyasining 80-sessiyasida O‘zbekiston Respublikasi Prezidenti Shavkat Mirziyoyev tomonidan ilgari surilgan g‘oya va tashabbuslar bugungi anjumanga ilmiy-ma’naviy asos bo‘lib xizmat qiladi, – dedi rektor Muzaffar Komilov. – Bu chiqish nafaqat mamlakatimiz, balki butun mintaqa va jahon miqyosida katta qiziqish uyg‘otdi.
Konferensiyada muftiy, Shayx Nuriddin Xoliqnazar hazratlari nutq so‘zlab, jumladan bunday dedilar:
– 2017 yilda davlatimiz Rahbari BMT yuksak minbaridan turib, ushbu tashkilot tarixida ilk marta Imom Buxoriy bobomiz nomlarini zikr qilgan edilar. Bu safar ham buyuk ajdodlarimiz – Imom Buxoriy, Imom Termiziy va Imom Moturidiyning ilmiy-ma’naviy merosini alohida e’tirof etdilar. Zero, bugungi dunyoda islom ma’rifati, bag‘rikenglik va insonparvarlik tamoyillarini jahon hamjamiyatiga yetkazishning dolzarbligi ortib bormoqda.
Shuningdek, so‘zga chiqqan ishtirokchilar ma’ruzadagi tinchlik-osoyishtalikni saqlash, afg‘on xalqiga ko‘mak berish, xavf-xatarlarga qarshi kurashish, dunyoda kambag‘allikka barham berishi, ekologiya, yosh avlod ta’lim-tarbiyasi va ajdodlar ilmiy merosini o‘rganish kabi dolzarb masalalarning mazmun mohiyatiga katta e’tibor qaratdilar.
Anjuman qizg‘in va ko‘tarinki ruhda bo‘lib o‘tdi.
O‘zbekiston musulmonlari idorasi Matbuot xizmati