Rasululloh sollallohu alayhi va sallam bunday deganlar: “Qabul bo‘lish jihatidan otaning farzandi uchun qilgan duosi Payg‘ambarning ummati haqqiga qilgan duosi kabidir. Onaniki ham shunday” (“Majma’ul odob” kitobidan).

Ona shafqati otanikidan ustunroq bo‘lgani sababli duosining qabul bo‘lishi ham otanikidan tezroqdir. Bir hadisi sharifda Nabiy sollallohu alayhi va sallam bunday deganlar: “…Onaningi duosi tezroq qabul bo‘ladi”.

Sahobai kiromlar Payg‘ambarimiz sollallohu alayhi va sallamdan buning sababini so‘raganlarida: “Chunki ona otaga qaraganda farzandga yaqinroq. Yaqin bo‘lganning duosi oldinroq qabul bo‘ladi”, deb javob berdilar (“Majma’ul odob” kitobidan).

Abu Hurayra roziyallohu anhudan rivoyat qilingan hadisda Rasululloh sollallohu alayhi va sallam bunday marhamat qilganlar: “Allohning ijobat qilishiga aniq ishongan holingizda duo qiling. Bilingki, Alloh g‘ofil va behuda qalbdan duoni qabul qilmas” (Imom Termiziy rivoyati).

Abu Hurayra roziyallohu anhudan rivoyat qilingan boshqa bir hadisda Payg‘ambarimiz sollallohu alayhi va sallam: “Sizlardan biringiz duo qilsa, rag‘batini katta qilsin (katta narsalar so‘rasin). Chunki beradigan hech bir narsasi Alloh taologa mashaqqat emas”, deganlar (Imom Ahmad rivoyati).

Abu Said roziyallohu anhudan rivoyat qilingan hadisi sharifda Nabiy alayhissalom marhamat qiladilar: “Musulmon banda bir gunoh yoki biror qarindoshi bilan orasi ochilishi (shariatga uyg‘un bo‘lmagan narsalar)ni so‘ramagunicha o‘ziga uch narsa berilmasidan duosi qaytarilmaydi: duosi qabul bo‘lib, dunyoda o‘ziga beriladi yoki duosi oxiratga olib qo‘yiladi yoxud duosi qadar bir yomonlikdan uzoqlashtiriladi” (Imom Hokim rivoyati).

Abu Hurayra roziyallohu anhudan rivoyat qilingan hadisda Rasululloh alayhissalom: «Sizlardan duo qilgach, “Duo qildim, qabul bo‘lmayapti”, deb shoshmaydigan kishining duosi qabul bo‘ladi.

Allohga duo qilinglar va shikoyat qilib: “Ijobat bo‘lmadi, qabul bo‘lmadi”, demanglar», deganlar (Imom Buxoriy rivoti).

Anas ibn Molik roziyallohu anhudan rivoyat qilinadi. Payg‘ambarimiz sollallohu alayhi va sallam buyuradilar: “Jonim qo‘lida bo‘lgan Zotga qasamki, Alloh azza va jalla duosini qabul qilmaydigan bandasiga duo qilishni nasib etmaydi” (Imom Tabaroniy rivoyati).

“Har bir ona bilishi kerak” kitobidan
Nigora MIRZAYEVA tarjimasi