#xabar #musobaqa
Bugun, 9 fevral kuni O‘zbekiston xalqaro islomshunoslik akademiyasi va Shayxontohur sport maktabi sport zallarida diniy soha xodimlari o‘rtasida sportning voleybol va shaxmat turlari bo‘yicha “O‘zbekiston musulmonlari idorasi kubogi” musobaqalarining respublika bosqichiga rasman start berildi.
Mazkur bosqichda O‘zbekiston musulmonlari idorasining hududiy vakilliklari tomonidan o‘tkazilgan saralash musobaqalarida g‘olib bo‘lgan jamoa va ishtirokchilar, ularning murabbiylari va hakamlar, shuningdek, O‘zbekiston musulmonlari idorasi rahbariyati, O‘zbekiston Respublikasi Sport vazirligi, O‘zbekiston voleybol va shaxmat federatsiyalari vakillari hamda viloyat bosh imom-xatiblari ishtirok etmoqda.
Ochilish marosimida O‘zbekiston musulmonlari idorasi raisining birinchi o‘rinbosari Homidjon domla Ishmatbekov va Diniy idora raisi o‘rinbosari Zayniddin domla Eshonqulov so‘zga chiqib, ushbu musobaqa respublika bo‘ylab diniy soha vakillarini bir maydonga jamlash, sog‘lom turmush tarzini targ‘ib etish, jismoniy faollikni oshirish hamda o‘zaro hamjihatlikni mustahkamlashda muhim ahamiyatga ega ekani, dinimiz sport bilan shug‘ullanishga chaqirishini alohida ta’kidladi. Shuningdek, bellashuvlar manfaatli va barakali o‘tishini so‘rab xayrli duolar qilindi.
Ma’lumot o‘rnida aytish joizki, musobaqalar O‘zbekiston voleybol va shaxmat federatsiyalari tasdiqlagan tartib-qoidalar asosida nimchorak final, chorak final, yarim final hamda final bosqichlari ko‘rinishida o‘tkazilmoqda. Final uchrashuvlari esa 10 fevral kuni bo‘lib o‘tadi.
Eslatib o‘tamiz, musobaqada O‘zbekiston musulmonlari idorasining Qoraqalpog‘iston Respublikasi, barcha viloyatlar va Toshkent shahar vakilliklari jamoalari o‘zaro bellashmoqda.
Musobaqa yangiliklari va tafsilotlarini kanalimiz orqali kuzatib boring.
O‘zbekiston musulmonlari idorasi
Matbuot xizmati
Bismillahir Rohmanir Rohiym
حدثنا إسحاق بن إبراهيم نا بشر بن عبيد حدثني عبيد الله بن موسى بن معدان عن منصور بن المعتمر عن أبي وائل عن عبد الله بن مسعود قال: قال رسول الله صلى الله عليه وسلم: من أصبح حزينا على الدنيا أصبح ساخطا على الله ومن أصبح يشكو مصيبة أصابها به فإنما يشكو الله ومن تواضع لغنى ذهب ثلثا ذنبه ومن قرأ القرآن من هذه الأمة ثم دخل النار كان من الذين اتخذوا آيات الله هزوا“
Abdulloh ibn Mas’uddan rivoyat qilinadi. Rasululloh sollallohu alayhi va ’alaa olihi vasallam: “Kim dunyo uchun qayg‘ursa, Allohga nisbatan g‘azab qilibdi. Kim o‘ziga yetgan musibatdan shikoyat qilsa, Allohdan shikoyat qilibdi. Kim boylikni deb tavozelik qilsa, gunohining uchdan ikkisi ketibdi. Kim bu ummatdan Qur’on o‘qib, so‘ng do‘zaxga kirsa, demak u Allohning oyatlarini masxara qilganlardan biri bo‘ladi”, dedilar.
Abu Said Haysam ibn Kulayb Shoshiyning
“Musnadi Shoshiy” asaridan
Davron NURMUHAMMAD tarjimasi