Germaniyaning «Berliner Zeitung» gazetasida O'zbekiston bo'ylab sayohat qilishning afzalliklariga bag'ishlangan maqola chop etildi, deb xabar bermoqda “Dunyo” AA muxbiri. Unda bugungi kunda O'zbekiston poytaxtidan respublikaning go'zal tarixiy shaharlariga qatnovchi “Afrosiyob” tezyurar poyezdida Ipak yo'li yo'nalishlari bo'ylab sayohat qilish mumkinligi ta'kidlangan. Shuningdek, Samarqand shahridagi yangi aeroport bir necha oy oldin ish boshlagani haqidagi ma'lumot o'quvchilar e'tiboriga havola qilingan.

Muallifning yozishicha, Toshkent me'moriy jihatdan O'rta asr yodgorliklari, zamonaviy ko'p qavatli binolari va sobiq ittifoq me'morchiligi an'analari uyg'unligi bilan hayratga soladi.

«Toshkentdan mamlakat bo'ylab sayohatchilar nafaqat ravon avtomobil' yo'llari, balki poyezdda ham sayohat qilishi mumkin, — deyiladi maqolada. – Yilning barcha fasllarida ertalab va kechqurun Toshkentning bosh vokzalidan Buxoro va Samarqand yo'nalishiga qulay tezyurar “Afrosiyob” poyezdi qatnaydi. Maksimal tezligi 230 km/soat bo'lgan ushbu poyezd Buxorogacha bo'lgan 600 km yo'lni uch soatu 40 daqiqada bosib o'tadi – bu aviaparvozdan ko'ra qulay va arzondir”.

Muallif Buxoro va Samarqand shaharlari Markaziy Osiyoning madaniy durdonalari hisoblanishini qayd etgan. “Buxoro shahri 1997 yilda 2500 yoshga to'ldi. Eski shahar markazida Buxoroning diqqatga sazovor joyi - 1127 yilda qurilgan Minorai Kalon joylashgan. Uning balandligi 47 metr, poydevori esa 10 metr, - deya qayd etadi manba. – Samarqand 2750 yildan beri mavjud bo'lib, ushbu shahar dunyodagi eng qadimiy maskanlardan biridir. Ushba qadimiy kent o'nlab bosqinchilardan omon qolgan va qator vayronagarchiliklarni boshdan o'tkazganiga qaramay, u ertaknamo ulug'vorligini yo'qotmagan”.

Maqolada qadimiy o'zbek shaharlarining tarixiy va me'moriy diqqatga sazovor joylari, turli tabiat manzaralari haqida batafsil ma'lumotmotlar o'rin olgan. Ular sayohatchilarda katta qiziqish uyg'otadi.

«Sayyoh sifatida qayerga bormang, xoh mehmon uylarida, xoh bozorlarda yoki shunchaki ko'chada mahalliy aholi bilan uchrashsangiz, siz ta'sirchan mehmondo'stlikni va iliqlikni his qilasiz», deb yozadi «Berliner Zeitung».

O'zbekiston musulmonlari idorasi Matbuot xizmati