Habar berganimizdek, shu kunlarda yurtimizda o'tkazilayotgan “Deklaratsiyalar muloqoti” xalqaro forumida qatnashish uchun ko'plab xorij mamlakatlaridan martabali mehmonlar tashrif buyurishgan.

Nufuzli forum doirasida xorijlik mehmonlar poytaxtimizning diqqatga sazovor joylarini aylanishmoqda.

Bugun, 17 may kunning birinchi yarmida Nigeriya Argunu shtati amiri Elhaj Samoil Muhammad Mera janoblari O'zbekistondagi Islom tsivilizatsiyasi markazi qurilish jarayonlarini ko'zdan kechirish uchun tashrif buyurdi.

Mehmonga Markaz direktori Shoazim Minovarov va Diniy idora raisi o'rinbosari Homidjon domla Ishmatbekovlar hamrohlik qilishdi.

Mehmon muhtasham binoning tashqi va ichki bezaklari, ularga Qur'on oyatlari va hadislar bilan yozilgan ravoq, eshiklar va darvozalar, muzey qismidagi namuna hudud bilan tanishib, quyidagi fikrlarni chuqur hayajon ila bildirdi:

– Ushbu salobatli binoga Islom dini nima ekanini bilmayotganlarni, albatta, olib kelish kerak. Men O'zbekiston Rahbarining Islom tsivilizatsiyasi markazini barpo etish haqidagi fikrini qo'llab-quvvatlayman. Markaz ishga tushgach, u butun dunyo musulmonlari uchun ma'rifiy ziyoratgohga aylanadi. Markaz ochilish jarayoniga, albatta, Nigeriya sultoni bilan kelamiz, inshoalloh. Olam rivojiga shuncha hissa qo'shgan ajdodlar bilan har qancha faxrlansangiz arziydi”, dedi nigeriyalik mehmon.

Bugun kunning ikkinchi yarmida Markazga Gana Respublikasi sobiq bosh imomi, elchi Umar Sanda Ahmad ham tashrif buyurdi. U kishiga O'zbekistondagi Islom tsivilizatsiyasi markazi direktori o'rinbosari Firdavs ... hamda O'zbekiston musulmonlari idorasi raisi o'rinbosari Ibrohimjon domla Inomov hamroxlik qilishdi.

Mehmonning aytishicha, muqaddam O'zbekiston haqida deyarli hech narsa bilmagan. Ikki kun davomida O'zbekiston tarixi, madaniyati, salohiyati, ayniqsa, oxirgi yillardagi o'zgarishlar to'g'risida chuqur ma'lumotga ega bo'lgani va bundan juda hayratdaligini yashirmadi.

Tashrif davomida Elchi Umar Sandaga Markaz faoliyati, ulug' ajdodlarimiz qoldirgan boy ilmiy meros haqida batafsil ma'lumot berildi. Mehmon katta orzu va havas bilan shunday boy ilmiy salohiyatli Markaz bilan hamkorlik qilishdan boshi osmonga etishini aytib, qabul va ehtirom uchun tashakkur bildirdi.

O'zbekiston musulmonlari idorasi Matbuot xizmati