5 сентябрь куни Тошкент ислом институтида модуль таълим тизимида янги 2019-2020 ўқув йили бошланиши муносабати билан тадбир бўлиб ўтди. Тадбир Қуръони карим тиловати билан бошланди ва Ўзбекистон мусулмонлари идораси раиси, муфтий Усмонхон Алимов ҳазратлари томонидан янги ўқув шаклини муваффақиятли ўтишини сўраб дуолар қилинди.
Тошкент ислом институти ректори Уйғун Ғафуров сўзга чиқиб, Тошкент ислом институтида жорий этилган Модуль таълим шакли тўғрисида маълумот бериб, янги ўқув шаклига омад ва зафарлаб тилаш учун сўзни муфтий Усмонхон Алимов ҳазратларига берди.
Муфтий ҳазратлари барчани янги ўқув йили билан қутлаб, шундай дедилар:
– Аллоҳ таборака ва таолога беадад шукроналар бўлсинки, юртимизга жуда ҳам улуғ неъматларини бермоқда. Муҳтарам Президентимиз раҳбарлигида мамлакатимизда барча соҳалар қатори диний таълим соҳасида ҳам жуда катта янгиланишлар бўлди. Кейинги йилларда диний таълим муассасаларига кенг имкониятлар берилди, катта ютуқларга эришилди. Диний таълим тизимида Модуль тизими жорий этилиши тарихий воқеа бўлди. Бунинг афзалликлари жуда ҳам кўп, айниқса, масжидларда меҳнат қилаётган ўрта махсус маълумотга эга бўлган иқтидорли имом-домлаларни имтихонсиз ўқишга қабул қилиниши, йилда уч сместр давомида икки ойдан таълим берилиши ва уч йилда олий диний маълумотни қўлга киритилишини алоҳида таъкидлаш керак. Шунингдек, ушбу таълим тизимига қабул қилинган талабалар учун алоҳида бино ажратилди ҳамда синф хоналари, ўқув предметлари, замонавий педагогик ускуналар билан жиҳозланди ҳамда уч маҳал бепул иссиқ овқат ва ётоқ жойлари билан таъминланди.
Сизлар мана шундай яратиб берилган шароитлардан унумли фойдаланиш билан бирга, ўз устларингизда янада самарали меҳнат қилиб, халқимизга муносиб фидокор, юртимизга, динимизга сидқидилдан хизмат қиладиган етук инсонлардан бўлишингизни Аллоҳ таолодан сўраб дуо қиламиз, - дедилар.
Маросимда Ўзбекистон мусулмонлари идораси раисининг маслаҳатчиси Абдуҳаким қори Матқулов, Тошкент шаҳри бош имом-хатиби Нуриддин домла Холиқназаров ва ўқишга қабул қилинган имом-домлалар сўзга чиқишди.
Маълумот ўрнида, мазкур таълим тизимига 2019-2020 ўқув йили бўйича вилоятлар кесимида 120 нафар ўрта махсус маълумотли имом-хатиблар Ўзбекистон мусулмонлари идорасининг вилоят вакилликлари тавсиясига асосан ўқишга қабул қилинди.
Модуль таълим тизими талабаларига қулай шарт-шароитлар яратиш мақсадида, “Вақф” хайрия жамоат фонди томонидан Тошкент шаҳри Мирзо Улуғбек туманидаги собиқ “Олтин тепа” масжиди биноси ўқув хоналари, талабалар турар жойи ва ошхона учун мослаштирилиб, барча зарур жиҳозлар билан таъминланди.
Аллоҳ таолодан барча илм толибларига манфаатли илм ато этишини сўраймиз.

Ўзбекистон мусулмонлари идораси Матбуот хизмати

Янги ўқув йили бошланди. Мактаб ўқувчиларининг юзу кўзларида ҳаяжон. Янги кийимлар, ўқув қуроллари билан билим даргоҳи томон ошиқишади. Бироқ бошқалар каби янги мактаб формаларини сотиб олишга имконияти етмаган оилаларчи? Уларнинг фарзандлари бошқа ўртоқларини кўриб, қандай ўксик бир ҳолга тушар эканлар.

Навоий вилоятидаги марказий масжидлардан бири ҳисобланмиш Ҳазрати Алишер Навоий масжиди хайрли ташаббусни илгари сурди. Имом-хатиб бошчилигида ходимлар масжид ҳисобидан Навоий шаҳар "Янгиариқ", "Ҳаёт", Янгиобод маҳаллаларида истиқомат қилувчи ижтимоий ҳимояга муҳтож оилаларнинг жами 7 нафар фарзандларига мактаб формаси ва ўқув қуроллари учун зарурий бўлган пул маблағларини эҳсон қилдилар.

Энди бу болалар ҳам янги ўқув йилини хурсандчилик билан янгича тайёргарлик билан бошлашадиган бўлишди. Илм йўлида кўрсатилган ғамхўрлик иншааллоҳ келажакда албатта ўз мевасини беражак. Зеро, садақанинг афзали ҳам илм аҳлига кўрсатилганидир. 

Ўзбекистон мусулмонлари идораси Масжидлар бўлими

Шу йилнинг 7-11 сентябрь куни Қуръони каримни ёддан ўқиш ва тафсир қилиш  бўйича  Саудия Арабистонининг  Макка шаҳрида  41 халқаро   Қуръони карим мусобақаси ўтказилади. 

Мазкур мусобақа қуйидаги 4 йўналишда бўлиб ўтади: 

1. Қуръони каримни тажвид қоидаси билан тўлиқ ёддан ўқиб бериш билан бирга Қуръони карим сўзларининг маъноларини билиши.
2. Қуръони каримни тажвид қоидаси билан тўлиқ ёддан ўқиб бериш.
3. Қуръони каримнинг 15 порасини тажвид қоидаси билан ёддан ўқиб бериш.
4. Қуръони каримнинг 5 порасини тажвид қоидаси билан чиройли оҳангда ўқиб бериш. Бу йўналиш Ислом ҳамкорлик ташкилотига аъзо бўлмаган ва мусулмонлар камчилик бўлган давлатлар иштирокчилари учундир. Мусулмон давлатлар вакиллари ушбу йўналишда қатнаша олмайди.

Маълум қилинишича, бу йилги мусобақада 103 та давлатдан 146 нафар вакиллар иштирок этади.

Юртимизнинг 2 нафар вакили Тошкент ислом институти талабаси Ҳусниддинов Зуҳриддин қори ва Бухоро шаҳридаги “Мир Араб” олий мадрасаси талабаси Орифжонов Абдурауфхон мазкур мусобақада иштирок этиш учун шу йилнинг 3 сентябрь куни Саудия Арабистонига жўнаб кетди.

Халқаро алоқалар бўлими ходими

Баъзи ота-оналар қориндаги бола ўғилми ёки қиз эканлигини билишга ҳаракат қилаверадилар. Бунинг учун ултратовуш тадқиқоти (УЗИ) қилдирадилар. Натижа улар хоҳлаганича чиқмаса (Аллоҳ сақласин!), хоссатан, қиз бўлган ҳолатда ҳомилани нобуд қилдиришдан ҳам тап тортмайдилар. Шу тарзда ўзларини ўта нодон эканликларини исботлайдилар. Чунки, қанчалик илмий тадқиқот бўлмасин, улар гумонга асосланадилар. Бирор турли аниқ қарор бера олмайдилар. Шунинг учун сизга айтилган нарса, акси бўлиб қолиши ҳам мумкин.

Фарзандлар борасида фақат Аллоҳнинг хоҳишига рози туришдагина омонлик ва хотиржамлик бор. Қиз туғилганида унинг онасига ёмон муомала қилишлик сабабли яна Аллоҳ таолонинг лаънати ва ғазаби ёғилиб қолмасин. Қуйида бир ибратли ҳаётий воқеага диққат қилинг:

Кашмирнинг бир минтақасида бир шахснинг бешта қизи бор эди. Олтинчи марта фарзанд туғилиши кутилаётган эди. Эр аёлига аёлига: агар бу сафар ҳам қиз туғсанг, у ҳолда сени янги туғилган қизинг билан бирга ўлдираман, деди. Муборак рамазон ойининг учинчи охирги кечасида яна қиз туғилди. Тонг пайтида қизнинг онаси дод-вой қилишига қарамасдан, золим ота ўзининг гулдек ҳаёт қизини ёғоч қозончага солиб ўчоқда ёқиб юборди... Бирданига ёғоч қозонча ёрилди ва ўша заҳоти дахшатли зилзила содир бўлди. Золим ота бақрайганча ер остига ғарқ бўлди. Уни ер ютиб юборди... Қизнинг онаси ярадор ҳолатда сақланиб қолинди. Эҳтимол, айнан шу орқали бу қайғули воқеа ошкор бўлгандир....

Тошкент шаҳар “Ҳазрати Али” жоме масжиди имом ноиби

Абдулқайюм Ғофуров таржимаси

Куни кеча 4 сентябр куни  Хоразм вилоятида “Энг маърифатли имом” кўрик танловининг вилоят босқичи ўтказилди. Танловнинг шаҳар-туман босқичида биринчи бўлган имом-хатиб ва имом ноиблари мазкур босқичда Қуръони карим қироати ва тафсири, Ақоид фанидаги мўтабар манба - “Фиқҳул Акбар” китоби,
фиқҳ илми ҳамда ОАВларидаги иштироки, ташаббускорлиги бўйича имтиҳондан ўтдилар.

Ҳакамлар ҳайъатининг якуний хулосларига кўра, иштирокчилар орасида нисбатан юқори кўрсаткич қайд этган  Урганч шаҳридаги “Мискин бобо” масжиди имом-хатиби Абдуллоҳ Машарипов биринчи ўринга муносиб топилди. Иккинчи ўринни Қўшкўпир туманидани “Нур Азиз бобо” масжиди имом-хатиби Мансуржон Мансуров, учинчи ўринни эса Янгибозор тумани “Султон Хўжа бобо” масжиди имом-хатиби Хушнуд Абутов қўлга киритдилар.

 Абдуллоҳ Машариповга танловнинг Республика босқичига янада қунт ила тайёргарлик кўриб, муносиб иштирок этиши юзасидан тавсиялар берилди.

Бундан ташқари, танловга ҳамоҳанг равишда турли номинациялар бўйича масжидларда фаол хизмат кўрсатиб келаётган фидоий ходимлар тақдирландилар.

Ўзбекистон мусулмонлари идораси Масжидлар бўлими