muslim.uz
Сурхондарёдаги “Шоҳ Машраб” марказий масжиди қайта қуриб битказилди
Қумқўрғон тумани марказий масжиди 2017 йилдан буён қайта қурилаяётган эди, «Шоҳ Машраб» жомеъ масжиди жамоасининг маълум қилишича, масжиднинг янги биноси халқ хашари билан буткул қайта қурилган.
Эслатиб ўтамиз, масжидни тиклаш ишлари 2017 йилнинг бошида бошланиб 23 ой давом этди. Бугун жомеъ масжидининг умумий майдони қарийб 8000 квадрат метрни ташкил қилади.
Энди масжидда 2500 киши намоз амалларини адо этиши мумкин.
Масжиднинг асосий биноси баландлиги 28 метрни ташкил этувчи гумбаз, 43 метрлик катта минорадан иборат. Мажмуанинг лойиҳалаштириш ва қайта тиклаш ишларида меъмор ва қурувчилар Марказий Осиёда масжидлар қуриш қоидаларига тўлиқ амал қилдилар.
Масжид биносининг ички ва ташқи томонларидаги кўплаб нақшлар ҳам Марказий Осиё меъморчилик мактаби анъаналарига мансуб ҳолда яратилди. Масжид ичкарисида гумбаз ва деворларга муқаддас Қуръони Карим оятлари малакали ҳаттотлар томонидан ганч билан ишланиб ёзилган. Янги қурилган мажмуада таҳорат хона ҳам барпо этилди.
Имконияти чекланган инсонлар учун зарур ускуналар, ҳавони тозалаб берувчи қурилма ва кондиционерлар тизими мослаб ўрнатилди. Масжид ҳовлисида дам олиш жойлари ҳам яратилди.
«Шоҳ Машраб» масжиди бундан кейин ҳам Ислом динининг эзгулик, тинчлик, меҳр-мурувват, раҳмдиллик, муҳтожларга ёрдам бериш каби қадриятларини тарғиб қилувчи муҳим маънавий-диний маскан бўлиб қолишини Аллоҳ таолодан сўраб қоламиз.
Ўзбекистон мусулмонлари идораси Сурхондарё вилоят вакили Алиакбархон Сайфидинов эл юрт равнақи учун дуо хайрлар қилди, Саййид Раҳматуллоҳ Термизий “Мўмин мўминга озор бермайди” мавзусида маруза қилди.
ЎМИ Матбуот хизмати
Муфтий ҳазрат “ал-Азҳар”да нутқ сўзлади
Куни кеча, муфтий Усмонхон Алимов ҳазратлари ал-Азҳар университети катта мажлислар залида ал-Азҳар уламолари, шайхлари ва талабалари олдида араб тилида нутқ сўзладилар. Муфтий ҳазратлари Ислом оламининг маърифий марказларидан бири бўлган Миср юрти Қуръони каримда айнан шу ном билан бир неча марта зикр этилгани, бу унинг баракотига далил экани ва ушбу замин юзлаб саҳоба ва тобиъийлар ҳокини ўз бағрида сақлаётганига алоҳида тўхталдилар.
Шунингдек, Миср билан Ўзбекистонни боғлаб турувчи алоқалар жуда қадим тарихга бориб тақалиши, аллома Аҳмад ал-Фарғонийнинг Мисрдаги илмий фаолияти, Қоҳирадаги ўзбакия маҳалласи ўртасидаги минг йиллик қондошлик алоқалари ҳақида сўзладилар.
Муфтий ҳазратлари Ўзбекистон замини қадим маданият ўчоқларидан бири экани, дунё тарихида Мусулмон Ренессанси деб ном олган ўрта асрлар ва ундан кейинги даврларда Ўзбекистон заминидан етишиб чиққан мутафаккирларнинг Ислом илмлари ривожига қўшган ҳиссалари дунё жамоатчилиги томонидан тан олингани ҳамда Бухоро, Самарқанд, Насаф, Фарғона каби заминларда етишиб чиққан алломалар Ислом илмлари ривожи учун жуда катта ҳисса қўшгани тўғрисида батафсил маълумотларни билдирдилар. Шунингдек, Ўзбекистон ва Миср ўртасидаги ҳамкорлик алоқалари янги босқичга кўтарилганини алоҳида таъкидладилар.
Ўзбекистон мусулмонлари идораси бутун олам аҳлини ҳамжиҳатликда, илму маърифат устуворлигида яшашга даъват этиш баробарида мана шундай йўлда доимо ҳамкорлик қилишга тайёр эканини муфтий ҳазратлари йиғилиш иштирокчиларига изҳор этдилар.
Ушбу нутқ иштирокчиларда катта таассурот қолдирди.
Ўзбекистон мусулмонлари идораси Матбуот хизмати
Ўзбекистон алломалари: Абу Бакр Қаффол Шоший
ЎМИ Матбуот хизмати
Мисрдаги ўзбекистонлик талабалар билан учрашув
Куни кеча, Мисрда хизмат сафарида бўлиб турган Ўзбекистон мусулмонлари идораси раиси, муфтий Усмонхон Алимов ҳазратлари Миср олийгоҳларида таълим олаётган талабалар ва у ерда меҳнат қилаётган ватандошлар билан мулоқот қилди. Ушбу тадбир Ўзбекистоннинг Мисрдаги элчихонаси ташаббуси билан “Хилтон” меҳмонхонасида ташкил этилди.
Учрашувда муфтий Усмонхон Алимов ҳазратлари Ўзбекистонда олиб борилаётган ислоҳотлар, уларнинг мазмун-моҳияти ва келгусидаги режалар хусусида йиғилганларга сўзлаб бердилар. Шунингдек, ҳар бир талаба ва ватандошимизнинг мурожаатига қулоқ тутиб, уларнинг ҳол-аҳволи сўралди ва келгусидаги ишларига муваффақиятлар тиланди.
Мисрдаги ўзбекистонлик талабалар ва ватандошлар мана шундай юксак эътибор ҳамда амалга оширилаётган хайрли ислоҳотлардан чексиз мамнун бўлдилар. Ҳукуматимиз раҳбарияти, она-Ватанимиз ва халқимизга эзгу тилакларни изҳор қилдилар.
Ўзбекистон мусулмонлари идораси Матбуот хизмати
Шавкат Мирзиёев ўзаро ҳамоҳанг икки илм масканини кўздан кечирди
Президент Шавкат Мирзиёев Самарқанд вилоятига ташрифи чоғида дастлаб Имом Бухорий мақбарасини зиёрат қилди. Қуръон тиловат қилинди. Бу ҳақда Президент Матбуот хизмати хабар берди.
Маълумки, 2016 йили Ислом ҳамкорлик ташкилоти Ташқи ишлар вазирлари кенгашининг 43-сессияси очилиш маросимида Шавкат Мирзиёев Имом Бухорий ёдгорлик мажмуаси ёнида илмий-тадқиқот марказини ташкил этиш таклифи билан чиққан эди. Кейинчалик Президентимиз ушбу марказ лойиҳаси ва қурилиши билан бир неча бор танишди. Унинг мазмун-моҳияти, ҳатто, рангининг қандай бўлишигача белгилаб берди. Бугунги кунда қурилиш ва пардозлаш ишлари ниҳоясига етказилди.
Давлатимиз раҳбари ушбу марказда яратилган шароитларни кўздан кечирди.
Марказ Имом Бухорий ва бошқа мутафаккир алломаларимизнинг бебаҳо илмий-маънавий меросини ўрганиш, улар яратган асарларнинг илмий-изоҳли таржима ва қиёсий матнларини нашр этиш, мамлакатимиз ва хорижий давлатлардаги кутубхоналар, архив фондларида сақланаётган қўлёзмаларнинг электрон нусхаларини тўплаш, уларни халқимиз ва жаҳон жамоатчилигига етказиш билан шуғулланади. Бу ерда аждодларимизнинг бой меросини алоҳида-алоҳида ўрганиш, етук мутахассислар тайёрлаш учун барча керакли шароитлар яратилган.
Марказнинг биринчи қаватида музей ташкил этилган. Унда Имом Бухорийнинг ҳаёти, илмий сафарлари акс этган. Музей марказига «Саҳиҳи Бухорий» китобининг қадимий қўлёзма нусхаси қўйилган.
Музей билан танишар экан, Президентимиз бу жой зиёратчиларга Имом Бухорий ҳақида тасаввур, билим беришини таъкидлади.
- Дунё харитасида яна бир илмий марказ пайдо бўлди. Бу марказ мамлакатимизга илм, барака олиб келади. Ёшларимизга билим, куч беради. Бу ерда ўқиганлар, зиёратга келганлар катта маънавият, маърифат олади, - деди Шавкат Мирзиёев.
Марказ томонидан 2018 йилнинг ўтган даврида буюк алломаларимиз меросини ўрганиш, кенг тарғиб этиш, нуфузли халқаро марказлар билан ҳамкорликни йўлга қўйиш бўйича тизимли чора-тадбирлар амалга оширилди.
Европа ва Шарқ мамлакатлари, дунёдаги етакчи ислом тадқиқот марказлари, университетлар билан алоқалар ўрнатилди. Жумладан, Буюк Британиянинг Оксфорд ислом тадқиқотлари маркази, Кембриж университети, “Ал-Фурқон” фонди, Британия музейи, Франциянинг Араб дунёси институти, Франция миллий кутубхонаси ва бошқа илм-фан масканлари билан ҳамкорлик йўлга қўйилди.
Марказ илмий ходимлари томонидан “Имом Бухорий таърифи”, “Алоуддин Усмандий Самарқандий ҳаёти ва илмий мероси”, “Лубобул ҳадис асари” каби 17 та китоб нашрга тайёрланди.
Хорижий мамлакатларнинг кутубхона фондларида сақланаётган 535 та қўлёзма ва тошбосма асарларнинг электрон нусхалари олинди. Марказда сақланаётган 1 168 та асарнинг каталоги тайёрланди.
Давлатимиз раҳбари қўлёзма китобларни авайлаб сақлаш, таржима қилиб, халққа етказиш бўйича кўрсатмалар берди.
Имом Бухорий илмий-тадқиқот марказига ҳамоҳанг яна бир олий диний таълим муассасаси - Ҳадис илми мактаби ҳам бунёд этилган. Шавкат Мирзиёев ушбу мактаб билан ҳам танишди.
Ҳадис илми мактабида ўқиш муддати беш йил бўлиб, кундузги таълим шаклида олиб борилмоқда. Мактабга араб тилини пухта ўзлаштирган, ҳадисларни ёд олишга салоҳияти бўлган ўрта махсус диний таълим муассасаларининг 10 нафар иқтидорли битирувчилари саралаб олинган.
Мактабда ҳадисшунослик фанлари билан бир қаторда Қуръони карим, фиқҳ, ақида, тафсир, ислом тарихи каби фанлар ҳамда хорижий тиллардан чуқур билим берилади.
Буюк аждодларимиз асос солган Ҳадис илми мактаби фаолиятини ташкил қилиш мамлакатимиз маънавий тараққиётининг бугунги босқичида муҳим аҳамият касб этади. Ташкил этилган муассаса ўз олдига ҳадис илмининг илмий-назарий асосларини чуқур ўрганиш, хорижий тилларни чуқур ўргатиш, «Устоз-шогирд» анъаналари асосидаги машғулотларни ташкил этиш, дунёвий давлатда диний қадриятларни асраб-авайлаш, ҳадис илми уламолари асарларининг илмий-изоҳли таржима ва қиёсий матнларини тайёрлаш, ўзбек ва хорижий тилларда нашр этиш, илмий семинарлар, конференциялар ташкил этиш, энг муҳими, «Жаҳолатга қарши – маърифат» шиори асосида муросасизлик, экстремизм ва терроризмнинг ҳар қандай кўринишларига илм-маърифат, юксак одоб-ахлоқ билан қарши туришдек катта вазифаларни қўйган.
Келажакда Ҳадис илми мактаби битирувчилари диний фанлар, хусусан, ҳадис илми соҳасида таълим бериб, диний ташкилотларда имом-хатиб, илмий ходим вазифаларида ишлаши, шунингдек, илмий-тадқиқот марказларида илмий ходим сифатида фаолият олиб бориши кўзда тутилган.
Битурувчилар таълимни ўз ихтисослигига кўра, Ўзбекистон Ислом академияси магистратурасида, таянч докторантура ва докторантура босқичларида давом эттиришлари мумкин.
Президентимиз мактабда ўқитиш услубларини такомиллаштириш, халқаро илмий марказлар билан ҳамкорликни ривожлантириш зарурлигини таъкидлади
Ўзбекистон мусулмонлари идораси Матбуот хизмати