muslim.uz
Самарқанд шаҳри куни нишонланди
2018 йил 18 октиябр куни Самарқандда кўҳна ва ҳамиша навқирон Самарқанд шаҳрига Амир Темур ордени берилган кун муносабати билан вилоят миқёсида тадбир бўлиб ўтди. Тадбирда вилоят ҳокимлиги, ташкилот ва жамоат бирлашмаларидан вакиллар қатнашдилар.
Байрамни нишонлашга отланган кенг жамоатчилик вакиллари иштирокида дастлаб Амир Темур мақбарасида Қуръон тиловат қилинди.
Кун давомида мактабгача таълим, халқ таълими, касб-ҳунар таълими муассасалари ва олий ўқув юртлари, ёшлар иттифоқи фаоллари томонидан кўргазмалар намойиш қилинди, жойларда турли маънавий-маърифий тадбирлар ўтказилди.
Маълумки, 1996 йил 18 октябрда Самарқандда Амир Темур таваллудининг 660 йиллигига бағишланган тантанали маросимда Ўзбекистон Республикасининг Биринчи Президенти Ислом Каримов томонидан ушбу кунни - Самарқанд шаҳри куни сифатида нишонлаш таклиф этилган эди. Ўша куни шаҳарга Амир Темур ордени топширилди. Мана 22 йилдирки, бу сана кенг нишонланиб келинмоқда.
Самарқанд вилояти вакиллиги матбуот хизмати
"Елпиғич ва музлатгич керак" (Аудиоҳикоя)
ЎМИ Матбуот хизмати
Москвада Ислом Каримов ёдгорлик хиёбони очилди
Бугун, 18 октябрь куни Россия Федерацияси пойтахти Москва шаҳрида Ўзбекистон Республикасининг Биринчи Президенти Ислом Каримов хотирасини кўп йиллар одамлар ёдида сақлаш мақсадида барпо этилган хиёбоннинг очилиш маросими бўлиб ўтди.
Тадбирда Ўзбекистон Республикаси Президенти Администрацияси, сенаторлар, депутатлар, ҳукумат аъзолари, Ўзбекистон Қаҳрамонлари, нуронийлар, ёзувчи-шоирлар, илм-фан ва санъат намояндалари, Россия давлат идоралари, икки мамлакат кенг жамоатчилиги вакиллари иштирок этди. Шунингдек, Ислом Каримовнинг дўстлари, ҳамкасблари, шогирдлари ва бошқа яқинлари қатнашди.
Маросимда сўзга чиққанлар Ислом Каримов раҳбарлиги даврида амалга оширилган ислоҳотлар ҳақида сўзлаб, унинг беқиёс хизматлари туфайли Ўзбекистоннинг дунё миқёсида нуфузи ошгани, халқимиз турмуш фаровонлиги юксалганини таъкидлади. Бугун Ўзбекистонда Президент Шавкат Мирзиёев раҳбарлигида ана шу ислоҳотлар қамрови ва таъсирчанлигини янада ошириш йўлида кенг миқёсли ишлар амалга оширилаётгани эътироф этилди. Шунингдек, Ислом Каримов олижаноб инсоний фазилатлари билан Ватанимизнинг кўп асрлик тарихида ўчмас из қолдиргани ва нафақат Ўзбекистон, балки жаҳон миқёсида катта ҳурмат ва обрў-эътиборга сазовор бўлган улкан шахс ва арбоб сифатида танилгани алоҳида қайд қилинди.
Очилиш маросимида Ўзбекистон делегацияси таркибида Ўзбекистон мусулмонлари идораси раиси ўринбосари Шайх Абдулазиз Мансур ҳам иштирок этди.
Москва шаҳридаги Ўзбекистоннинг Россия Федерациясидаги консуллиги ёнида барпо этилган ушбу хиёбонга Ислом Каримов номи берилди.
Ўзбекистон мусулмонлари идораси Матбуот хизмати
Жўйбори калон мадрасасининг 7 нафар талабасига ўқиш пули тўлаб берилди
Садақани ошкора қилсангиз қандоқ ҳам яхши. Агар махфий қилсангиз ва фақирларга берсангиз, бу сиз учун яхшидир. Сиздан гуноҳларингизни ювади. Ва Аллоҳ қилаётган амалларингиздан хабардордир
(Бақара сураси 271 оят).
Ўзбекистон Республикаси Президентининг 2018 йил 16 апрелдаги «Диний-маърифий соҳа фаолиятини тубдан такомиллаштириш чора-тадбирлари тўғрисида»ги ПФ-5416-сон Фармони асосида Ўзбекистон мусулмонлари идораси ҳузурида «Вақф» хайрия жамоат фонди ташкил этилди.
Фонд томонидан Ўзбекистон мусулмонлари идораси тасарруфидаги билим юртлари талабалари ва ўқитувчиларини рағбатлантириш, намунали ва иқтидорли талабаларни тўлов-контракт пулларини тўлаб бериш учун Фонд томонидан «Илм йўлида кўмак берамиз» акцияси ташкил этилди.
2018 йил 13 октябрь куни ушбу акциянинг биринчи босқичи натижалари бўйича тақдирлаш маросими бўлиб ўтди. Маросимда диний таълим муассасаларининг энг иқтидорли 39 нафар талабаларининг контракт пуллари тўлаб берилиб, ўзининг иқтидори ва қобилияти билан Қуръони каримни тўлиқ ёд олган 15 нафар талаба энг кам иш ҳақининг 10 бараваридан пул мукофотлари билан тақдирланди.
Жумладан Ўзбекистон мусулмонлари идораси тасарруфидаги “Жўйбори Калон” ўрта махсус ислом билим юртининг таълим олиш жараёнида намунали хулқ –атвори ва талим – тарбияси учун 7 нафар талабалари ЎМИ ва Вақф хайрия жамоат фондитомонидан 3 250 000 сўм тўлов контракт билан тақдирланди.
Билим юрти маъмурияти ҳамда талабаларнинг ота – оналари Ўзбекистон мусулмонлари идораси ва «Вақф» хайрия жамоат фондига ўз миннатдорчилигини билдирди.
ЎМИ Матбуот хизмати
Маккадаги сессияда муфтий ҳазратлари нутқ сўзладилар
Бугун, 18 октябрь куни Макка шаҳрида ўтаётган Ислом олами уюшмаси Олий кенгашининг 43-сессиясида дастлабки нотиқлар қаторида Ўзбекистон мусулмонлари идораси раиси, муфтий Усмонхон Алимов ҳазратлари нутқ сўзладилар.
У киши ўз нутқларида мусулмонлар ўртасида бирдамлик, ҳамжиҳатликни кучайтириш, ўзаро аҳилликка эришиш, турли ихтилоф ва фирқачиликка барҳам бериш кераклиги, сессиянинг қабул қилинадиган қарорларида мусулмонларнинг умумманфаатини назарда тутиш мақсадга мувофиқ бўлиши борасида тўхталиб ўтиб, бу ишлар айниқса бугунги кунда давр талаби эканини таъкидладилар.
Шунингдек, Ўзбекистонда олиб борилаётган дин соҳасидаги ислоҳотлар ҳақида гапириб бердилар.
Анжуман иштирокчилари муфтий ҳазратларининг нутқларини диққат билан тинглаб, мазкур нутқдан таъсирланганликларини, ҳазратнинг айтган сўзлари уларда катта таассурот қолдирганини баён этдилар.
Анжуманда муҳокама қилинаётган масалалар ҳақида сайтимизда батафсил ёритиб борамиз.
Ўзбекистон мусулмонлари идораси Матбуот хизмати