muslim.uz
Мирзиёев Имом Бухорий асарлари бўйича ўқув дастурлар ва қўлланмалар ишлаб чиқиш топшириғини берди
Улуғ мутафаккир, ҳадис илмининг султони Имом Бухорий мажмуаси зиёрати чоғида Президентимиз Шавкат Мирзиёев ушбу масканни замон талабларига мос реконструкция қилиш ҳамда унинг атрофида сайёҳлар учун барча хизмат турларини қамраб олувчи меҳмонхона ва инфратузилма объектлари қуриш лойиҳалари билан танишиб, уларни сифатли амалга ошириш учун мутасаддиларга топшириқлар берди.
- Буюк алломаларимизнинг ислом маданиятини равнақ топтиришга қўшган бетакрор ҳиссаси тўғрисида сўз кетганда, энг аввало, ҳақли равишда мусулмон оламида “муҳаддислар султони” дея улкан шуҳрат қозонган Имом Бухорий бобомизнинг муборак номи тилга олинади, - деди Президент.
Маълумки, зиёратгоҳга туташ ҳудудда Имом Бухорий халқаро илмий-тадқиқот маркази бунёд этилмоқда.
- Бу мажмуа нафақат мамлакатимиз халқи, балки бутун ислом дунёси учун қадрли ҳисобланади, - деди Президент.
ЎзА хабарига кўра, марказнинг маънавий-маърифий ишини ташкил қилиш, унинг илмий-назарий концепциясини яратиш ва ана шу асосда ўқув дастурлари ва қўлланмалар ишлаб чиқиш, Имом Бухорий асарлари тадқиқотига алоҳида эътибор қаратиш зарурлиги таъкидланди.
Ўзбекистон мусулмонлар идораси матбуот хизмати
Қалблар ҳам обод этилди
Бугун мамлакатимизнинг барча ҳудудларида умумхалқ хайрия ҳашари уюшқоқлик, ҳамжиҳатлик ва кўтаринки руҳда ўтмоқда. Хусусан, Қашқадарё вилоятида ҳам юртдошларимиз эрта тонгдан ҳашарга отланиб боғ ва хиёбонлар, кўча ва гузарлар, маҳаллалар, қадамжолар, қабристонларни ободонлаштириш ва кўкаламзорлаштиришга киришдилар.
Ушбу хайрли тадбирга муносиб ҳисса қўшиш мақсадида Чироқчи туманидаги “Ал-Бурҳониддин”, Шаҳрисабз туманидаги “Саъд ибн Абу Ваққос” жоме масжидлари имом-хатиблари ҳамда масжид ҳодимлари ёлғиз кексалар, ногиронлар, кам таъминланган оилалар, меҳрибонлик уйларига бориб кўнгилларни ҳушнуд этдилар. Жами тўрт миллионга яқин моддий-маънавий ёрдам кўрсатилди.
Ҳашар баҳона нафақат кўча, ён-атрофлар кўркамлашиб, янада гўзал қиёфа касб этди, балки одамлар орасида оқибат ришталари мустаҳкамланди, қалблар обод этилди.
ЎМИ Матбуот хизмати
281 зиёратгоҳ ва қабристон тозаланади
Наврўз байрами олдидан ўтказилаётган умумхалқ ҳайрия ҳашарида андижонликлар ҳам фаол иштирок этаётир. Ариқ ва зовурлар, кўча, хиёбонлар, қабристонлар тозаланиб, дов-дарахтларга шакл берилмоқда, дею хабар бермоқда ЎзА.
– Маҳаллалар, шаҳар ва қишлоқларда кенг кўламдаги ободонлаштириш ва кўкаламзорлаштириш ишларини амалга ошириш мақсадида ташкил этилган умумхалқ ҳайрия ҳашари вилоятимизда уюшқоқлик билан ўтмоқда, – дейди “Маҳалла” ҳайрия жамоат фонди Андижон вилоят бўлими раиси Улуғбек Абдуллаев. – Икки кун давомида кенг кўламли ободонлаштиририш ишлари амалга оширилади, зиёратгоҳ ва қабристонлар тозаланади, вилоятдаги эҳтиёжманд оилаларнинг уй-жойлари таъмирлаб берилади. Шунингдек, ногирон, ёлғиз яшовчи кексаларларга моддий ёрдам кўрсатилади.
“Маҳалла” ҳайрия жамоат фонди вилоят бўлимидан олинган дастлабки маълумотларга кўра, ҳашарда 1 миллион 22 минг нафардан зиёд киши иштирок этди, 2 минг 575 гектардан зиёд ер майдони ободонлаштирилди, 1 минг 300 километрга яқин ариқлар тозаланди, чиқиндилар чиқариб ташланди, бу ишларни бажариш учун 500 яқин техника воситалари жалб этилди. Бундан ташқари, 281 зиёратгоҳ ва қабристон тозаланади. Вилоят бўйича 479 оиланинг 8 минг 809 квадрат метр ҳажмдаги уй-жойлари ҳашар йўли билан таъмирлаб берилади.
Хайрия ҳашари уюшқоқлик билан давом этмоқда.
Ўзбекистон мусулмонлар идораси матбуот хизмати
Самарқанд катта ўзгаришларга юз тутмоқда
Президент Шавкат Мирзиёев Самарқандга ташрифини ҳар галгидек Ҳазрати Хизр мажмуасини зиёрат қилишдан бошлади.
Бу ҳақда давлат раҳбари матбуот хизмати хабар бермоқда.
Давлатимиз раҳбари Ўзбекистон Республикасининг Биринчи Президенти Ислом Каримов қабрига гул қўйди. Ўтганлар хотирасига Қуръон тиловат қилинди.
Имом Бухорий мажмуаси зиёрати чоғида қадамжони янада обод қилиш, Имом Бухорий номидаги илмий тадқиқот маркази қурилиши, унинг илмий назарий асосларини яратиш масалалари муҳокама қилинди.
Давлатимиз раҳбари вилоятнинг Оқдарё, Иштихон ва Пастдарғом туманларида бўлиб, ҳудудлардаги ижтимоий-иқтисодий ислоҳотларнинг бориши билан танишиб, халқ билан мулоқот қилди.
Ташрифининг иккинчи кунида Президент Шавкат Мирзиёев Миллий гвардия бўлинмаси фаолияти билан танишиди.
Тизимда амалга оширилаётган ишлар, ҳарбийларга яратилаётган шароитлар ҳақида ахборот берилди. Қўшинларнинг қурол-аслаҳа ва алоқа воситалари таъминланиши, ҳарбий хизматчиларнинг жисмоний ва жанговар тайёргарлигига эътибор қаратилди.
Ўзбекистон Қуролли Кучлар Олий Бош Қўмондони вазиятни доимий таҳлил қилиш, хатарларнинг олдини олдини олиш, жамоат хавфсизлигини мустаҳкамлаш бўйича кўрсатмалар берди. Жалолиддин Мангуберди, Амир Темур каби буюк саркардаларимиз ҳарбий маҳоратини ўрганиш, ўқув-тактик методикани ривожлантириш, ҳарбий хизматчиларнинг жисмоний ва руҳий тайёргарлигини ошириш зарурлигини таъкидлади.
Шавкат Мирзиёев замонавий ҳарбий техника ва қурол-яроғларни кўздан кечирди. Таклиф этилаётган ҳарбий кийимлар билан танишди.
Ҳарбий либослар миллийлигимизни акс эттирадиган, тарихда қоладиган бўлиши керак. Шунинг учун бу масалани ҳар томонлама ўйлаш, лойиҳаларни халқ муҳокамасига қўйиш зарур, деди давлатимиз раҳбари.
Президент Шавкат Мирзиёевнинг Самарқанд вилоятига ташрифи ниҳоясига етди.
Ўзбекистон мусулмонлар идораси матбот хизмати
Эрига итоатсиз аёлнинг дуоси қабул бўлмайди
Аллоҳ таоло айтади: “Хотинларингизнинг итоатсизлигидан қўрқсангиз, аввал уларга панд-насиҳат қилинган, сўнг (яъни, насиҳатларинг кор қилмаса) уларни ётоқларида тарк қилингиз, (улар билан бир жойда ётманг, яқинлашманг), сўнгра (яъни шунда ҳам сизларга бўйсунмасалар) уринглар. Аммо сизларга итоат қилсалар уларга қарши бошқа йўл ахтарманглар. Албатта, Аллоҳ энг юксак ва буюк бўлган зотдир” (Нисо сураси, 34-оят).
Пайғамбаримиз соллаллоҳу алайҳи вассаллам айтдилар: “Уч тоифа одамнинг намози мақбул бўлмайди ва бирорта яхшилиги осмонга кўтарилмайди. 1) Қочоқ қулнинг то хўжайинларига қайтиб, қўлини уларнинг қўлларига қўймагунча; 2) Эрини ғазаблантирган, норизо қилган аёлнинг то эри ундан рози бўлмагунча; 3) Ва мастнинг то ўзига келмагунча” (Ибн Ҳиббон, Ибн Хузайма ривояти).
Ривоят қилинадики, аёл қиёмат куни биринчи бўлиб, намоз ва эридан сўралади.
Аллоҳ барча аёлларни эрига итоат қилишга насиб қилсин. Албатта, У марҳаматли ва саховатли зотдир.
Ойбек САМАРҚАНДИЙ,
“Кўкалдош” ўрта махсус ислом билим юрти талабаси
ЎМИ Матбуот хизмати