Пиар деган нарса бор. Бу кўпроқ ўзини реклама қилишга уриниш, рейтингини кўтаришга чираниш маъноларига яқин келади.

Бу нарса кўпроқ оммавий ахборот воситалари, интернет сайтлари, телеграм, инстаграм каналлари, фейсбук саҳифалари ва газеталарда учрайди.

Пиар – бирор воқеани беришда, унинг сарлавҳасини “ўзига тортадиган”, “жарангдор”, “жимжимадор”, “ҳеч қаерда учрамаган”, “ўқисанг ҳам ўқийсан, ўқимасанг ҳам ўқийсан” қабилида бериш орқали кўзга ташланади.

Бундан эса фақат обуначиларнинг сонини кўпайтириш, ўз рейтингини ошириш, машҳурликка эришиш, шов-шув кўтариш каби нарсалар мақсад қилинган бўлади. Яна бошқа бирор мақсад ҳам кўзда тутилган бўлиши мумкин.

Шунингдек, маълум гуруҳларнинг ёки шахсларнинг манфаатини кўзлаб, ахборотни яхши текширмай ёки атайин бузиб тарқатиш, бунинг ортидан келадиган ижтимоий, ҳуқуқий, руҳий-маънавий ва бошқа оқибатларини ўйламаслик ҳоллари учрамоқда. Буларнинг барчаси амалдаги қонун нормаларига зиддир.

Динимизда шуҳратга интилишдан қайтарилади. Шуҳратнинг офати ҳақида кўплаб кўрсатмалар келган.

Аллоҳ таоло Қуръони Каримда айтади: “Кимки бу дунё ҳаётини ва унинг зийнатини хоҳласа, бу борадаги амалларининг (самараси)ни тўлиқ берурмиз. Улар бунда камситилмаслар. Ана ўшаларга охиратда дўзах оловидан бошқа ҳеч вақо йўқдир. Бу дунёда қилган ишлари ҳабата бўлди ва қилган амаллари ботил бўлди” (Ҳуд сураси, 15-16-оятлар).

Оятда бир ишни дунё ва унинг зийнатига эришиш учун қилган кимсаларга охиратда насиба бўлмаслиги, аксинча, дўзах олови уларни кутиб тургани баён этилмоқда.  

Абу Ҳурайра розияллоҳу анҳудан ривоят қилинади: “Расулуллоҳ соллаллоҳу алайҳи ва саллам бундай деганларини эшитганман:

“Қиёмат куни ҳисоб-китоб қилинувчи инсонларнинг аввалгиси шаҳид бўлган инсондир. Уни келтирилади ва Аллоҳ унга неъматларини танитади. У уларни тан олади. Аллоҳ унга: “Неъматларга эга бўлиб нима амал қилдинг?” деб сўрайди. У: “Сенинг йўлингда курашдим, ҳатто шаҳид бўлдим” дейди. Аллоҳ айтади: “Ёлғон айтдинг. Сен “Бу одам ўта журъатли” дейишлари учун курашга кирдинг ва бу гап айтилди” дейди. Сўнгра буюрилади ва уни юзи билан судраб олиб бориб жаҳаннамга ташланади.

Кейин илм ўрганиб ўргатган, Қуръон ўқиган одам келтирилади. Аллоҳ унга неъматларини танитади, у уларни тан олади. Аллоҳ унга: “Неъматларга эга бўлиб нима амал қилдинг?” деб сўрайди. У: “Сен учун илм ўрганиб, ўргатдим, Сен учун Қуръон ўқидим” дейди. Аллоҳ айтади: “Ёлғон айтдинг. Сен “Бу одам олим” дейишлари учун илм билан шуғилландинг, “Бу одам қори” дейишлари учун Қуръон ўқидинг ва бу гап айтилди” дейди. Сўнгра буюрилади ва уни юзи билан судраб олиб бориб жаҳаннамга ташланади.

Кейин Аллоҳ унга кенгчилик бериб, турли моллар ато қилган киши келтирилади. Аллоҳ унга неъматларини танитади, у уларни тан олади. Аллоҳ унга: “Неъматларга эга бўлиб нима амал қилдинг?” деб сўрайди. У: “Сенинг йўлингда Сен рози бўладиган нима иш бўлса, барчасини қолдирмай садақа қилдим” дейди. Аллоҳ айтади: “Ёлғон айтдинг. Сен “Бу одам жуда сахий” дейишлари учун садақа қилдинг ва бу гап айтилди” дейди. Сўнгра буюрилади ва уни юзи билан судраб олиб бориб жаҳаннамга ташланади”.

      Муовия розияллоҳу анҳуга ушбу ҳадис айтилганда қаттиқ йиғлаган эканлар, ҳатто ҳушларидан кетиб қолган эканлар. Ўзларига келгач: “Аллоҳ ва Расули рост айтадилар” деган эканлар.

Уламолар, буюк устозлар ҳам шуҳратнинг офати ҳақида кўп таъкидлаганлар.

Жумладан, Суфён Саврий роҳимаҳуллоҳ “Шуҳратдан эҳтиёт бўлинг! Кимнинг олдига борган бўлсам мени шуҳратдан қайтарди” деганлар.

Бишр ибн Ҳорис раҳимаҳуллоҳ эса “Шуҳратни яхши кўрган кимса Аллоҳга тақво қилмабди” деганлар.

Яъни шуҳратни яхши кўрган одам Аллоҳга тақво қилмаган ҳисобланади.

Жалолиддин Суютий раҳимаҳуллоҳ “Шуҳрат офатдир!” деган ҳикматни ривоят қилганлар.

Баъзида шу пиар қилиш, шуҳратга интилиш, аниқроғи, айрим кўнгли ўксик инсонлар ҳақидаги мақоланинг сарлавҳасини “теша тегмаган” тарзда бериш юракни оғритадиган, қўпол ва ҳақиқатдан узоқ мазмунда бўлиб қолади. Бунинг ортидан ўша мақолада тилга олинган инсонларнинг дилига озор етиши, қалблари “синиши” мумкин.

Бир одамга ёрдам бераман деб ҳаракат бошланади. Аммо ўша ҳаракат нотўғри услубда ва шуҳратни кўзлаб олиб борилгани учун кўзланган натижага эришилса-да, савобдан қуруқ қолинади. Бордию мақолада эслаб ўтилган бемор, қалби ўксик инсоннинг дили оғриса, шунча қилинган меҳнат ортидан гуноҳ ҳам орттириб олинган бўлади.

Ҳозирги кунда мамлакатимизда интернетдан фойдаланувчилар сони 20 миллионга етди. Ижтимоий тармоқлар (“Facebook”, “Instagram”, “Telegram”)да бир кунда 1,6 миллион фойдаланувчи фаолдир. Бунинг ижобий жиҳатлари кўп. Лекин шуниси ҳам борки, ижтимоий тармоқ — бу оғизга келганини айтаверадиган, истаган ахборотини тарқатаверадиган жой эмас. Ундан фойдаланишнинг ҳам ўз қонун-қоидаси бор. Афсуски, айримлар бунга амал қилмаяпти. Сабабсиз агрессия, оммавий ҳақорат ва туҳмат қилиш ҳолатлари ортиб бормоқда. Натижада 2017 йилда 37 минг 805, 2018 йилнинг биринчи ярмида эса 41 минг 841 нафар фуқаро оммавий туҳмат ва ҳақоратда айбланиб, маъмурий жавобгарликка тортилди. Бундан тўғри хулоса чиқариш керак.

Ҳа, ҳозирги кунда айрим кишилар, хусусан, баъзи ёшлар кўчада, ошхонада ёки бирор жойда содир бўлган оғриқли воқеани телефонларига фото ва видеотасвирга олиб, фейсбук, телеграм, инстаграм, одноклассники каби ижтимоий тармоқларда тарқатишга, шу орқали кўп “лайк”, “класс” йиғишга интилмоқдалар. Бировларнинг мусибати устидан шуҳрат қозонишга ҳаракат қилмоқдалар. Бу мусулмончиликка мутлақо тўғри келмайдиган ҳолатдир. Аслида мусулмон одам бир диндош биродарининг бошига мушкул иш тушганини кўрса, суннатда келган дуоларни ўқиб, ўша биродари учраган мусибатдан уни сақлагани учун Аллоҳга ҳамд айтиб, у биродарига соғлик тилаши керак эди.

Хуллас, пиар қиламан, машҳурликка эришаман деб бир инсоннинг қалбини оғритиб, ўзингиз гуноҳкор бўлиб қолманг!

Қилмоқчи бўлган ишингизни тўғри ният ва охиратдаги савоб умидида амалга оширинг. Дунёнинг матоҳини, шуҳратини кўзламанг!

Аллоҳ таоло барчамизни нияти соф, қалби пок, ишлари шариатга мувофиқ бўладиган бандаларидан қилсин!

Интернет маълумотлари асосида

Нозимжон Иминжонов тайёрлади

Бугун юртимизнинг ҳар бир гўшасида улкан ўзгаришлар, туб янгиланиш ва бунёдкорлик ишлари шиддат билан давом этмоқда. Бу эса юртдошларимиз қалбида эзгу саъй-ҳаракатларга муносиб ҳисса қўшишга интилиш, эртанги кунга катта ишонч билан қараш туйғусини янада мустаҳкамлаяпти.
Айтиш жоизки, халқимизнинг ҳаётдан рози бўлиб яшашига эришиш йўлида муҳтарам Президентимиз жуда катта ислоҳотларни амалга оширяптилар. Давлатимиз раҳбари томонидан илгари сурилган “Халқ давлат идораларига эмас, давлат идоралари халқимизга хизмат қилиши керак”, деган ғоя ҳаётда ўз ифодасини топаётгани халқ манфаатлари таъминланишига хизмат қилмоқда.
Ана шу мақсад йўлида жамиятнинг барча соҳалари чуқур ислоҳ қилинаётир. Улардан бири халқимизнинг диний-маърифий эҳтиёжларини таъминлаш масаласидир. Диний соҳа ходимларининг замон талабларига жавоб берадиган даражада фаолият юритиши бугунги кунда жуда ҳам муҳим ўрин тутади. Зеро, имом-хатибларнинг ҳудудларда диний вазиятни соғломлаштириш, ижтимоий-маънавий муҳит барқарорлигини сақлаш, миллатлар ва динлараро тотувликни таъминлашдаги ўрни муҳим аҳамият касб этиб келмоқда.
Самарқанд вилоятидаги масжидларда меҳнат қилаётган имом-хатибларнинг касб-маҳоратларини ошириш, юртимиздаги ислоҳотлардан хабардорлигини таъминлаш ва мана шундай амалга оширилаётган хайрли ишларни кенг халқ оммасига етказишда диний соҳа ходимларининг ролини оширишда қилинаётган ишларни қуйидаги лавҳа орқали кўришингиз мумкин бўлади.

Ўзбекистон мусулмонлари идораси Матбуот хизмати

13 декабрь куни Ўзбекистон Республикаси Маданият вазирлигида «Моддий ва номоддий меросни сақлаш» мавзуида давра суҳбати ўтказилди.
Turon24 хабарига кўра, Ўзбекистон Республикаси Маданият вазирлиги қошидаги Маданият ва санъатни ривожлантириш жамғармаси ушбу тадбирни ташкиллаштирди. Унда кўплаб тадқиқотчилар, санъатшунослар, музей соҳаси вакиллари, соҳа мутахассислари ўз-фикр мулоҳазаларини билдиришди.
Улар қаторида тадбирда сўзга чиққан Ислом цивилизацияси маркази директори Шоазим Миноваров Мовароуннаҳр олимларининг жаҳон фанига қўшган ҳиссалари ҳақида батафсил гапириб берди, уларнинг меросини сақлаш ва ўрганиш масалаларини кўтарди.

Ўзбекистон мусулмонлар идораси Матбуот хизмати

Манғистов вилояти бўйича амалга оширилган экспедицияси чоғида аввал минтақа ҳокимияти вакилларига номаълум бўлган қадимги диний иншоотлар топилди, деб хабар бермоқда «Хабар 24» телеканали.
Май ойидан ноябрь ойигача ўтказилган экспедиция чоғида тадқиқотчилар XIX—XX асрларда қурилган бешта масжид ва йигирмадан ортиқ эски қудуқларни аниқлашди.
Sputniknews.kz хабарига кўра, ҳар бир ерости масжидида меҳроб ва бошқа зарур шароитлар мавжудлиги аниқланган.

Ўзбекистон мусулмонлар идораси Матбуот хизмати

Мамлакатимизга ташриф буюрган Саудия Арабистони Қироллиги Савдо-саноат палатаси кенгаши раиси Сами бин Абдуллоҳ ал-Убайдий бошчилигида делегация билан Ўзбекистон Республикаси Давлат туризм қўмитаси раисининг биринчи ўринбосари вазифасини бажарувчи У.Қосимхўжаев учрашув ўтказди.
Давлат туризм қўмитаси матбуот хизматига кўра, учрашув давомида мамлакатимизнинг сайёҳлик салоҳияти тўғрисида роликлар намойиш этилди. Хусусан эркин иқтисодий ҳудудлар, туристик ҳудудлар ва зиёрат туризмини ривожлантириш имкониятлари ҳақида ахборотлар тақдим этилди.
Саудия томони Ўзбекистоннинг сайёҳлик салоҳияти ва ҳамкорлик учун имкониятларни юқори баҳолашди.
– Саудия Арабистонининг 2030 йилгача белгиланган режалари мамлакатга инвестицияларни жалб қилиш билан бирга чет давлатларига сармояларни йўналтиришни ҳам ўз ичига олган, – деди Сами бин Абдуллоҳ ал-Убайдий. – Ўйлайманки, мамлакатларимиз ишбилармон доиралари ўртасидаги учрашувлар, музокаралар Саудия Арабистонининг Ўзбекистонга инвестиция киритишини енгиллаштиришга хизмат қилади.
ЎзА билдиришича, Саудия Арабистони делегацияси таркибида озиқ-овқат, қишлоқ хўжалиги, тўқимачилик саноати, минерал ресурслар, қурилиш, электроника каби соҳаларда фаолият олиб борувчи 20 дан зиёд компания вакиллари ўрин олган. Саудия Арабистони Қироллиги Савдо-саноат палатаси вакиллари азим пойтахтимизнинг диққатга сазовор жойларини, хусусан, "Ҳазрати Имом" мажмуасини зиёрат қилдилар. Меҳмонлар мажмуадаги тарихий обидалар, мақбаралар ва "Ҳазрати Усмон Мусҳафи" тарихи билан таншидилар.

Ўзбекистон мусулмонлар идораси матбуот хизмати